سەیرەن!
جاران ویر و باوەڕی کۆمونیستی زاڵبۍ ملو ویرو و ئەندېشەو بەشێ جە خەڵکە ڕۊشنویرە خۊڼڎەوارەکەیرە، هەرچڼ ئایدیۆلۆجی کۆمونیستی زادەو ئەقڵێن کە جە دنیاو سەرمایەداریی و بازاری ئازادەنە ژیوان، چەنی ئانەیچە ئەچېگەو فرەو وەڵاتەکاو دنیای یەرەمینە وەشباوەڕیێ درۊس بېیەبۍ کە مەتاوان چېرو سایەو ئایدیۆلۆجیێ چامنەینە زوڵم و زۊرو دەرەبەگایەتی و نادادی بنبڕ کەران.
مامۊسا گۆرانی شاعېر چا سەردەمەنە پېسە ئا خەڵکا فرە دڵوەش بېیەن کە تەۋژمەو کۆمونیستی ئېگەیچ گېرۊوە و ئا مانیفێست و پەیامە کە مارکس و لینینی پېسە مەشخەڵێ دانشا دەسو هاوڕێ ستالینی ڕزگارشان کەرۊن.
شەبەقێک لە ڕۆژی مارکس و لینین
مەشخەڵ بوو بۆ دەستی هاوڕێ ستالین
گوران داوامەکەرۊن جە لاوە کوردەکا پېسەو دیاری ئا ویرو باوەڕەیە باراوە پەی خەڵکی جە وەڵاتە کۆمونیستەکاوە،
لاوی کورد کە گرتی ڕێی گەڕانەوە
بە دیاری ئەم بیرو باوەڕانەوە
بەیداخێک هەڵئەکا وێنەی تۆ لەسەر
بۆ گشت لای وڵاتی ئەکا بە سێبەر
ئانەی یاگۍ سەرنجیەن گورانی شاعېر ئاواتەوازەن کە چېرو سایەو کۆمونیستینە میللەتو کوردی وېش ڕزگار کەرۊن و تەمامو وەڵاتی ئاوەڎان کەرۊوە، بە تەعرێ ئاوەو دەرەی هۊرۋزان پەی سەرو کەشان، ڕاوبان بەران پەی سەرو گردو لووتکەو کەشەکان و کەراشان بە قەسر و یانە.
وەڵوینیێ فرە وردەن کە گۆران ئەچا سەردەمەنە ئارۊش دېیەن! کورد یاوان بە دەسەڵات و ئاویش یاونێنە پۊپەو کەشەکاو سەرو گرڎ تەپېوێ و بەرزایێوە یانەو باخش وەشکەردەن و چواردۆرش تەلبەڼ کەردەن!.
ئاوی چەم ئەکێشین بۆ سەر لووتکەی شاخ
بەردی ڕەق دەردێنین، جێی ئەکەین بە باخ
لەسەر هەر لووتکەیەک، تەپۆڵکەو یاڵێ
هەر بن داربەڕوویەک ئەکەین بە ماڵێ
نەوتمان، کارگەمان، بەرهەمی کانمان
نادزرێ و نرخەکەی دێتە گیرفانمان.[1]