زەلیلی زامم...
میرزا ئۆلقاڎر ئەچی شېعرېنە، باس جە زەلیلی وېش، شەیڎاییش، مەجنوونی و دېوانەییش، مەحبووسیش مەکەرۊن، باس جە بیابان گېڵیش مەکەرۊن، ئانېچە گرد پەی خاڵەو لەیلۍ شاو گوڵ ئەڼامۍ، پەی شیرینۍ نۊبەر نەمامۍ، هەرچن بېیەن بە واتەو سەرزەنەشتو خاس و عامی، هەڵای ماچۊ: گەر فەلەک بڎۊ دەوامم، سیوای ئا یارە نازارۍ، چەنی هیچ کەسی نەبۊن سەفا و سەلامم.
زەلیل زامم زەلیل زامم
های موسڵمانان زەلیل زامم
دووساخ پا بەند خەیاتەی خامم
شەیڎای نمەد پۊش شای گوڵ ئەندامم
مەجنوون چۊڵ‌گەرد بۍ عەقڵ و فامم
ڕسوای خاڵ لەیل شای جەمین جامم
فەرهاد کۊ کەن مەحبوس دامم
کوشتەی شای شیرین نۊ بەر نەمامم
هەوەسیای هاژەی شېری بۍ ڕامم
واتەی سەرزەنشت مەخلووق عامم
مەست مەیخانەی عەشق ئەیامم
سەر ئەفراز ڕۊی (یوم‌القیامم)
ڕازانش دەردەن پەی سوبح و شامم
هەنی جەی دنیا تەرکەن کەلامم
وەختەن تازە بۊ جە نامان نامم
وەی گشت زەوقەوە هیڵای ناکامم
بەرشېیەن نەموشت ڕشتەی زەمامم
خەستەی غەرق هوون تەمامی جامم
سەفەری سەفەر مەنزڵگەی شامم
ئیرادەی تەواف (بیت‌الحرامم)
پېکیای پەیکان شیرین مەرامم
دڵ ڕېش بەینەت شای گوڵ ئەندامم
شەرتەن ئەر فەڵەک بڎۊ دەوامم
هەنی توخوڎا چاوبەند غوڵامم
سیوای ئه و دڵبەر شای پەری سامم
چەنی کەس نەبۊ سەفا و سەڵامم
ئەگەر ژارمار تەنخوڎای تەعامم
بڕېزۊ نە تۊی پیاڵە و جامم
شیرەی شیرینی عەین مەرامم
مەرهەمەن پەرۍ زام ئەندامم
ئەر بەی گەرد پاش بگنۊ وە بامم
مەبۊ دەوا پەی دەرد زوکامم
میرزا من قاڎر مەجنوون قامم
نەک ناشی و نەزان ناپوختە و خامم
ڕەجاڵی بەردەن هۊش چەنی فامم
وەی تەورە دایېم وېڵ ڕاهی شەقامم.[1]