سەرمەشق تەعلیم...
نامۍ میرزا ئۆلقاڎری پەی سەیید بەهای شەمسی.
سەرەتا میرزا مەگنۊ تاریفدای سەیید بەهای، ئەرەستوی دەوران، ئەفلاتوونی ژیر، دانای پەڕ هونەر، حەکیمی دەردان. پاسە دیارەن میرزا ئۆلقاڎر ئی نامە شېعریېشە جە جوابو نامێوە سەیید بەهای پەی میرزا ئۆلقاڎرین، کە میزا جوابەکەنە ماچۊ: من کەی شایانو ئانەینا کە زاتێ پېسە تۊ بە نامێ سەرم کەریۆ.
سەرمەشق تەعلیم مەشتاقان مەشق
زەڕاب زەڕسەنج زەڕاب‌خانەی عەشق
ئەرستوی دەوران دانای پەڕهونەر
بەحر علوومات کان کۊی گەوهەر
مونشی ئینشای خاس مونشەئات فەرد
حەکیم دەردان دەوابەخش دەرد
سەرمایەی شاڎیی بزورگەواران
سەفای سینەی ساف سەفوەت شیعاران
پاکباز پاک‌دڵ، پاکیزەی پاکان
شوعلەی شەمع جەمع گشت شەرەف‌ناکان
پاکان وە پاکی وە پاک ئاوردەن
پەنا وە بارگەی شای پاکان بەردەن
چېش واچوون ئەوەڵ یا عەبدولمەتین
هەم ئاخر وە دین بەهای دنیا و دین
نامەکەت یاوا نامەکەم دەق کەرد
خامەکەت خەیاڵ خامەم شەق شەق کەرد
مەزموونت گوم کەرد ڕاگەی مەزموونم
فیکرت تاراج دا مایەی دەروونم
ئەلفازت یەک یەک دیونا دەردم
فەردت بی ناسخ کتابچەی فەردم
وېنەی ستاران ئەبیەزی پەڕنوور
شوعلە نمایان نە ئەوج دەیجوور
تا قەمەر نەکەل سەرکېشۊ وە بەر
ستاران ببان گشت وە خاکستەر
تۊ چوون ئه و قەمەر من چوون ستارەم
چە قابل وە مەدح ڕەمز و ئیشارەم
ئەوسافم کامەن وجوودم چېشەن
پای فەردم وە فەرد هام فەردان ڕېشەن
حەیرانم جە فەرد بېگەردت ئاخ ئاخ
بۊی فەرد مەهجوور مەڎۊم نە دەماخ
هەی دەخیلت بام یە جە کۊت ئاوەرد
سا کەی جەلای کۍ مەشق عەشقت کەرد
سەڕافیت جە لای کام سەڕاف زانا
عیرفانت جە لای کام عارف وانا
کەسب کەماڵت جە لای کام کامڵ
کەردەنت وەی تەور تۊ وە نەقش دڵ
جەلای کام ئوستاد دەروون کەردی کەیل
کۍ نۊشا مەی پېت جە مەیخانەی لەیل
یا جبرەئیلت دایم ئوستادەن
یا خزر جە خاو تەعلیمت دادەن
یا وەی تەور فەردت ساحیب تەئسیرەن
ئەڵبەت هەر پەڕته و ئەنفاس پیرەن
بەڵام پیر کام پیر، پیر بۍ نەزیر
(قطب‌الاتقیا) شای ڕەوشەن زەمیر
نوقتەی دایەرەی نۊتاق ئەخزەر
دەریای فیوزات بەحر پەڕ گەوهەر
وە ئیشارەی عەین کیمیای نەزەر
خاک پاک کەردەن وە تەڵای ئەخزەر
هەر جە سەرکۆی شەرق تا موڵک خاوەر
دنیا جە زوڵمات کەردەن منەوەر
یا ئاگا جە ڕیز گشت قەزا و قەدەر
بە خوڎا کەس نېیەن غەیر جە شاە عومەر
پەی دین و دنیا ئەر پەرسی خەبەر
پیرەن دەستگیرەن دەلیلەن ڕەهبەر
هەرکەس بنمانۊ هونەر یا جەوهەر
ئه و شا عومەرەن وە دانای داوەر
ڕاسەن تۊ سەیید ئەولاد پاکی
سەردار سەروەر هەم شەرەفناکی
فەیز شاعومەر بەرز کەردەن پایەت
هەر مایەی ئەوەن بی بە سەرمایەت
خسووس ئه و سەروەر پەڕ حەیا و حەلیم
شېخ بەهرەمەند محەممەد سەلیم
سالکتەر جە گرد سالکان دەور
ئاگای مەخفیات پشت پەردەی هەور
(محبوب القلوب) گرۊی دینداران
سەرحەڵقەی ئیخلاس تاعەت گوزاران
دەخل دڵ جە لاش جابەجا نەکەی
دایېم جە حزوور پا کۊتا نەکەی
وەسڵشان تەواف ئەهل یەقینەن
هیجرشان هیجران دنیا و هەم دینەن
تەنخوای من کەرە بەندەی سیواکش
بۊسەدەر وە دڵ سەرپەنجەی پاکش
چراغ هیمەت نەمان خامۊش
نەکەرۊ جە یاد بەندە فەرامۊش
یادی هەم جە باب تەعریف یاران
میرزا میرزایان نەجابەت داران
عەزیز جەرگەی عەزیزان دڵ
وەشېوە ئەتفاڵ وە شعوور کامڵ
مەحموود ممتاز عاقبەت مەحموود
نامیەی نایاب (نادرالوجود)
مەدح ڕەوانت پەرۍ من کەردەن
زاهیرەن زیرەت وە کرمان بەردەن
بنچینەی موحکەم کەی خەرەڵ مەبۊ
دوڕدانەی گەوهەر کەی بەدەڵ مەبۊ
مەکتووب حیکمەت کەی مەبۊ وە شەرع
سا کۊن کۍ دیەن ئەسڵ بۊ وە فەرع
چوون نژادشان چین چین هەر ئەسڵەن
ئەوانیچ ئاخر خۊ هەر ئه و فەسڵەن
چوون مەبان خارج جە ئەسڵ وېشان
عیلم ئەفلاتوون هەر کەمەن پېشان
ئینشاالله بڎۊ حەق دەوامشان
بەربشۊ نە ڕوبع مەسکوون نامشان
فەرمابېت ئەلکە تەمام بۍ پەردەن
وېش‌ئاسا جە تۊ، وېش ئاڵۊس کەردەن
بایی سفڵەروو تار و توور بازەن
مەزاقش چەنیم خەیلێ ناسازەن
دەست کەچ و پاقوڵ بۍ حەیا و شەرمەن
سەگ‌پدەر دایېم بازارش گەرمەن
کەچەڵ هەم بەو تەور توند بە ئاڵشەن
توخم کاکەشەن گوو بە حاڵشەن
جاری مەوقوف بۊ وەسف‌نامەی ئەو
ڕۊشنی بەسات با گېڵۊ بە شەو
جە تەنخوڎای تەعزیم دۊعا و سەڵامش
جەی ڕەقعە هەنی خەتمەن بە نامش
جەلای میرزایان مەلاعیزەش کەر
وەسف عەلی وەیس باوەر وە نەزەر
با قی وە سەلام دۊس دور مەنزڵ
مەرهەم ڕوی زام دەوای ئېش دڵ
قاڎر تا زیندەی ڕووی سەرزەمینەن
سەنا گۊی باڵای بەهائەدینەن.[1]