تارېخو ئەدەبیاتو یارسانی
بەشۍ ویس و هەشتەمە
ڕۊ حەشری جە لاو یارسانەکاوە:
بەپاو ویر و باوەڕو یارسانەکا ڕۊ قیامەتی جە دەشتەو شارەزوورینە خېزیۊ، چوونکم شارەزوور خاکێ پیرۊزەن، پېسە ئایینەکا تەری، کە هەر یۊشان خاکێ پیروزو وېشان هەنشا، باوەڕشان چامنەن کە قیامەت سەرو ئا خاکەیشاوە خېزیۊ، عابیدینو جافی ماچۊ:
بە پێی وتەی سەرەنجامم
لە شارەزوورە ئەنجامم
یارم لەوێ دەدا کامم
لە بادە پڕ دەکا جامم
ساڕێش دەکا ڕێش و زامم
تا بگەمە هەمی دامم
من عابیدینی هەورامم
دڵداریی جوانی خواجامم
جە شېعرێ تەرەنە عابیدینو جافی ئانەیە پیشانە مڎۊن کە کەس و کارو وېشش جیائاستەن، پەشتیش کەردېنە ناوچەو سازانی و ڕوەشکەردېنە پەردیوەری بېیەن بە یار و پاڕەوۊ سوڵتان سەهاکی:
داوودم تۆیی، دەلیل و پیرینم
ئەم جار ساڕێش بوو، زۆخ و برینم
ئەوەڵ و ئاخیر، شاهی دێرینم
هاتگم بۆ بەزم، جەمی سوڵتانی
کەمترینی کەم، بەو غوڵامانی
دەرچووم لەناو، قەومی سازانی
چېگەنە کە ماچۊ (شاهی دێرین) مەبەسش سوڵتان سەهاکەن.
دمای ئانەی عابیدینو جافی بە خزمەتو سوڵتان سەهاکی میاوۊ، ئی واتەو گوشگېرتەیە مېیانشانە ڕوەمڎۊ:
عابیدین ماچۊ:
مەلا لەینە پێ خۆشە
بەزمی مەردان پێ خۆشە
بنیام ساقی لەو هۆشە
سەریان لە ژێری کەوشە
وەرن لە نوێژ کەن تۆبە
تۆبەی ئیخلاس یەک نۆبە
سەهاک خودای دوو سەوبە
ئەچی شېعرېنە (سوڵتان سەهاک) ی بە خوڎاو هەردوە دنیاکەی مزانۊ.
سوڵتان سەهاک جوابش مڎۊوەو ماچۊ:
ها قبوول بیا، ها قبوول بیا
ڕەجای عەبدینتان ها قبوول بیا
دیدەم وە ڕەحمەت پەنات دییا
مورغوم وە مەیلتان وە وەست ئەو ئەشیا
تا حەماڵ کۆڵش نەوەرۆ وەجا
نمەیان پەنەش ئوجرەت کراها
ماناش:
ئانە من قبووڵ بییا، سایەو دوعاو عابیدینی من قبووڵ بییا، خەتا بە ملو وېتان، تا حەماڵ کۊڵەکەیش نەیاونۊ مەنزڵە، کرۍ مانیای و ڕەنجیش پەنە نمەڎریۊ.
زوانو عابیدینو جافی جە شېعرەی میللییۆ نزیکەن، بەڵکم بە فرەیی شېوە زوانی جافی بەپاو ناوچە جوغرافییەکا فاڕیۊن، پەوکەی چا ناوچانە کە نزیکېنۍ بە دیالێکتو کرمانجی ۋارینی زوانی کوردی، شېوە زوانەکەشا تېکەڵاوەن، ئی بەرکۆتەیە زیاتەر جە ناوچەو شارەزووری و لاو وەرنیشتو ڕوخانەو سیروانینە هەسش پەنەکریۊن.[1]