فەلەک خامۊش کەرد
بەشۍ دوەمە
میرزا ئۆلقاڎرو پاوەی، بەردەوامەن جە لاونایۆ سەیید نیزامەدینی و سەیید ئیبراهیمی، باس جە شەهامەتی و پیاوەتی و یانەو مانیشان کەرۊن، باس جە دڵ و دەروونی پاکیشان و دەس بڵاویشان کەرۊن، سفرەو خوانشان، یانەو مېمانشان، میرزا ئاڼە خەمبارەن ئاواتش مەردەیەن، دماتەر دڵوەشی وېش و کەسوکارەکەیش کەرۊن کە سەیید نیزامەدین ئیسە یاگېش وەشەنە، ئیسە لوان خزمەتو تاتەی ڕەحمەتیش، شاڎۍ بیېنێ بە یۊترینی.
ئه و دارای تەوزیع فەرمایشاتە
ئەو شیرین شەربەت ئاوی حەیاتە
پەی دین دیڎەش ئیمانم هەردەن
لاڵ بام سەی نیزام وەفاتش کەردەن
ئەو نەسایحات دڵ‌پەسەندیدە
ئەو ڕېزەی ڕازان یەک یەک سەنجیدە
ئەو ئائینە نەقش ڕیشەی دڵ پاچە
سەر وېنەی شمشېر مەودای دووحاچە
ئەو تەکیە و تفاق ئه و سفرەی عامە
ئەو خوان سەد ڕەنگ توحفەی تەعامە
ئەو سەخا و کەرەم بېخۊف و بیمە
ئەو بەرزی هیممەت عەتای عەزیمە
ئەو گۊی حەسەنات جە مەیدان بەردە
فەرموودەی خوڎا وە جا ئاوەردە
ڕەنگم چوون خەزان پاییزان زەردەن
لاڵ بام شېخ نیزام وەفاتش کەردەن
ئه و کۊچ ساڵان هەواران کەردە
تەشریف ئەو هەوار مەزاران بەردە
ئەو هامسا یانەی بەهەشتی باقی
ئاخر کۊچش کەرد دەخیل های ساقی
جامی جەو بادەی عارفان وەردە
یاران جە مەینەت ڕستگار کەردە
پېمدەر دەخیلم پای خەیاڵ لەنگەن
مەسافەی بېسات زیندەگیم تەنگەن
با منیچ نە ڕای سەرمەزاراندا
هەی کەروون وە شۊن کۊچ یاراندا
جە دمای ئاغەی شای نیزامەدین
با گوم بۊ جەستەم نە ڕووی سەزەمین
حەکیمان زامم ئالوودەی دەردەن
لاڵ بام شېخ نیزام وەفاتش کەردەن
پېسە جە فەوتش کەواوەن جەرگم
مەرگش نیشان دان نیشانەی مەرگم
چەمان خاترش ڕەنجیان وە خار
چوون جە خانەگا بیەن دڵ ئازار
جەو ساوە تەشریف شەریفش بەردەن
جە ڕەسم قانوون دنیا ۋیەردەن
نە مەیلش چەنی ئەهل سادەتەن
نە هۊشش جە لای ئەهل وەڵاتەن
نە زومرەی ئەحباب وە چەم مەدارۊ
نە مەیل سەفەر تەوېڵە دارۊ
بازی شېخ حەسەن کەردەنش ئاوا
بېزارەن جە زەید جە موڵک و ماوا
نە عەزم هەوار پورت شاوەشەن
نە مەیل دیدار ئەهل پاوەشەن
نە ﮪەوای مەجلیس دیواخانشەن
نە پەی حکومەت پای دیوانشەن
نە یاد یاران دەروون پەڕ داخان
نە سەیر سەهەند گوڵ گەشت باخان
نە دید و بازدید سادات هەم‌دەم
نە مەیل فەرزەند نە تاسەی حەرەم
بازی شېخ حەسەن نەقش زەمیرەن
چوونکە جای خاسان خاکش دڵگیرەن
سەودای هیچ کەسش نەمەندەن جە سەر
بېزارەن جە ڕای موڵک سپیوەر
چەنی بابۊی وېش بەوتەور بیەن شاڎ
جه و بۊنۆ کەسش نەمەندەن جە یاڎ
سا با ئەو مەوسوول وەسڵ بابۊش بۊ
دڵ شاڎ وە مەنزڵ هەوارگەی نۊش بۊ
بەلای ئەی شوعرای بېهۊش کەم فام
دېوانەی خرف لېوەی خەیاڵ خام
دەروونت وە ئېش جۊش وەردەن وە جۊش
سەیید ئیبراهیم کەردی فەرامۊش
نەمەندەن جە دڵ زەڕەی ئاگاهیم
پەی فەوت شەوکەت سەیید ئیبراهیم
ئاخ پەی ئه و سەروەر سوپاسالارە
داخ پەی ئه و جەوهەر چابووک سوارە
ئەو توڵ ساوای نەمام باخە
ئەو نەوهاڵ تەڕ عەرعەر دەماخە
ئەو تەوار تۊڕ بازی تەڕلانە
ئه و نوور دیڎەی خوېش و بېگانە
چەرخ چەپی واز بی ڕای دوور مەنزڵ
بېوادە بەردش وە سای سەرای گڵ
ئەو شوعلەی جەماڵ شەمس کۊی شەرقە
ئەو شای کەچ کڵاو نە فەرق فەرقە
ئەو مەلبووس خاس شۊخ ئەلوانە
ئەو دیبای ڕەنگین زیبای شاهانە
ئەو چەرخنای چەم دیڎەی شابازە
ئەو گفت و شنوود ئه و ڕېزەی ڕازە
ئەو چەتفەو دەسماڵ بۊی (ماءالورد)ە
نە سای ئەو گەردەن مینای بېگەردە
ئەو ڕۆستەم سوار پیلەتەن زادە
ئەو شای بیجقەی دارا سیفاتە
ئەو شان و شەوکەت خەسرەوان بېزە
ئەو قەد و قامەت قیامەت خېزە
ئەو قاش ئەبرۊی قەوس قەشەنگە
ئەو نیشان تەمیز بەیداخ جەنگە
ئەو قتووی سەدەف گشت خاتەم بەندە
ئەو پەردەی گوڵاب خەندەی نیم‌خەندە.[1]