فەلەک خامۊش کەرد
بەشۍ یەرەمە
میرزا ئۆلقاڎر، درېژەو شیوەنەکەیشەنە پەی (سەی نیزامەدینی و سەی ئیبراهیمی) باس چانەیە کەرۊن کە حەتتا مەڵڵاو مزگی پاوەشاری تازیەبارەن، ئا ۋتارۍ کە موانۊشۆ گەر سەی نیزامەدین ماناش نەزانۊ، گەر سەی ئیبراهیم گۊشش چەنە نەگېرۊن، ئیتر مەشۊم سەفاو ئا جمعەیە چېش بۊ. میرزا نامۍ چڼەها کەسایەتیا شارو پاوەی مارۊن کە دمای کۊچۊ ئا دوە پیا خاسەیە چەنی سەفاو وەشیشا بارش کەردەن.
فەڵەک مەر ئەجەڵ پەرېش بی نازڵ
بیۍ واڎە بەردش وە سای سەرای گڵ
ئه و تېغ جەوهەر ئاڵای دەبانە
ئه و لەعل بەدەخش ئەسڵ کارخانە
ئه و شیر پەڕسام نەڕووی مەیدانە
هیچ کەس جەی دنیا قابل نەزانە
ئه و سەروی ئازاد باغ بەهەشتە
ئه و عەترە شەوبۊی جەڼەت بیۍوەشتە
ئه و قاپی بوڵەند حاتەم دەستوورە
ئه و کان کەماڵ دەریای شعوورە
ئەجەڵ وە فەرمان فەرد تەنیای تاک
بیۍواڎە بەردش وەسای سەرای خاک
ئیسە جە گەردش چەرخ مینا ڕەنگ
مەحبووسەن جە بەند ئەلحەڎ سەرای سەنگ
هیچ نېیەن وە تەنگ ئېش و نیشەوە
ئەویچ ها وەلای بابۊی وېشەوە
مەیل ز‌ی ڕۊحش نەمەندەن نە دڵ
نە چەنی خارج نە چەنی داخڵ
ئاخ پەی سەی نیزام کۊرەن بیناییم
داخ پەی جوانی سەیید ئیبراهیم
جەوساوە تەشریف خەیرتان بەردەن
عالەم گشت تەمام چوون مەردە مەردەن
ئه و هەرکۊ مەڎیۊ شین و زاریەن
واوەیلای عەزیم بیۍقەراریەن
مەخسوسەن یەکسەر ئاغە ڕۊشانەن
موخلیسان تاسەی دین تۊشانەن
زومرەی پاوەشار خانەگاە یەکسەر
ڕۊی ڕۊشن بېیەن وە (یوم‌المحشر)
سەیید موستەفا ئەوەند کەردەن داڎ
خوتبەی جەماعەت هیچ نەمەندەن یاڎ
سەیید نیزام نەبۊ مەعناش بزانۊ
تووخوڎا جەی دما پەی کۍ بوانۊ
سەیید ئیبراهیم گۊش نەگیرۊ لېش
سەفای ئه و جمعە هەنی چېش بۊ چېش
سەیید عەبدول ڕحمان ئەفغانش بەرزەن
هوون ئەسرینش وە هەزار تەرزەن
خەم پەرېش بېیەن وەنەقش زەمیر
دەرس و تەدریسش گرد شیەن جە ویر
سەیید (سعدالله) وە شین و زاری
دایېم مەناڵۊ وە دەدر کاری
سەیید موحەممەد زامش کاریەن
ئەسرین نە دیڎەش چوون سەیل جاریەن
سەیید ئەحمەد تەمام ئەوگارەن زامش
وەختەن ها نەبۊ جە نامان نامش
سەیید کاکە ئەحمەد یەکجار بەدحاڵەن
زار و زەویر و مات و مەلاڵەن

هیچ ئاگا نېیەن کەس جە دەرد کەس
یانەی دەروونش بېیەن بە قەقنەس
سەیید (فخرالدین) ئەلوەداش گەرمەن
سەیید سەعید جە نۊ بانگش بیۍشەرمەن
شەوان تا وە ڕۊ وە دەشت و دەردا
پەی سەیید ئیبراهیم مەڎۊ وە سەردا
سەیید وەهاو جە داخ ها گیان سپەردەن
یاوان وە قەیران غەڕغەڕەی مەردەن
خۊ مەلا جەلال کارێ ئامان پېش
بېزارەن جە گیان جە زیندەگی وېش
نېش خەم یاوان وە ڕیشەی جەرگش
قەڵاخی کەردەن سەرتاپای بەرگش
حاجی (خیرالحاج) وە گەشکی مەشهوور
نە کەیف نە ئاهەنگ نە شاڎیی و سروور
ئومېڎش بڕیان جەرگش سەد پارە
غەیر جە فەراری نەدارۊ چارە
سەیید جەعفەر دووزام کاری ئاوردەن
نەجاتش نېیەن مەگەر بە مەردەن
یە وە ئه و ئامان وە هیچ‌کەس نامان
مەر جە کەلوهەڵ ڕٍاهی ئیمامان
سەیید مومن بېیەن وە عەوداڵ بەڕ
سەرزەمین وە هوون ئەسرین کەردەن تەڕ
خۊ (خدامراد) تەمام ئەوگارەن
جەرگش وە ئەڵماس فەتار فەتارەن
ماچۊ هەی هانا هەی داڎ هەی بېداد
ڕەنج سەدساڵەم فەڵەک دان وە باڎ
تەکیشان وستەن وە پای مەزاران
شەوان تا وەڕۊ، ڕۊ تا ئېواران
خسووس خاتوونان حەرەم سەرایان
قەمەر تەلعەتان خورشید لەقایان
خاتوون خانپەروەر خەمین و خەمناک
هەناسەی سەردش یاوان وە ئەفلاک
شەوان تا وە ڕۊ چەنی قرچەی ئېش
چوون مار زامار پېچ مەڎۊ بە وېش
ئاهش وېنەی تەم پۊشان سەزەمین
پەی مەرگ ناکای شای نیزامەدین
ئەم جار هەم خاتوون خورشید خەمبار
چەمیدەی هیجران جەفای ڕوزگار
پەی فەوت ناگای سەیید ئیبراهیم
قامەتش بېیەن وە دایەرەی میم
ماچۊ سەرتاپام زووخاڵەن ڕۊڵە
دمای تۊ شاڎییم بەتاڵەن ڕۊڵە
قامەتم بېیەن وە چەوگان ڕۊڵە
خەم وەردەن وە هەم چوون کەمان ڕۊڵە
دەردم دەدر کەس نەزانان ڕۊڵە
ڕەنگم وېنەی ڕەنگ خەزانەن ڕۊڵە
خۆراکم بېیەن وە زووخاو ڕۊڵە
جەرگم سۊ مەڎۊ چوون کەواو ڕۊڵە
ئەی وەی جە قرچەی زامانم ڕۊڵە
زووخەن تا گۊشەی دامانم ڕۊڵە
جە داخت دەردم دێویان ڕۊڵە
بازاڕ شاڎییم شېویان ڕۊڵە
یانەی خەیاڵم خاپوورەن ڕۊڵە
بینایی دیڎەم بۍ نوورەن ڕۊڵە.[1]