تارېخو ئەدەبیاتو یارسانی
بەشۍ سی و دوەمە
پەرسەی دوەمەو یارەکا قرمزی:
بەشێ جە یارانو قرمزی چەنەش پەرسان: ئېمەی یارسانی ئەهلوو هەقی چی مەشۊم ڕۊچۍ گېرمۍ؟
قرمزی جوابشان مڎۊۋە:
شا کەرەم کەردەن، ڕووزە بایتلەن
هەر کەس ڕووزەش کرد، زەهری قاتیلەن
ز شەرت بنیامین، هەم ئەو عاتیلەن
ماناش:
شا کەرەمش کەردەن ڕۊچۍ باتڵەنە، هەر کەسێ ڕۊچۍ گېرۊن پېسەنە زەهری کوشندە ۋەرۊن، بەپاو مەرجەکا بنیامینی کەسێ بېکارەن.
دیسان قرمزی ماچۊن:
تەمامی ئەعزاش میکە بو ڕووزە
ئینکاری ئەزەل، نە ئاتەش سوووزە
ئەهلی هەقانم، مەدا من ڕووزە
ماناش:
گردو ئەڼامەکا بۍ ۋاردە نمەکەرە، ئانەی ئینکاری ئەزەلی کەرۊن، بە ئاییر مەسۊچۊن، من ئەهلوو هەقینا، ڕۊچۍ نمارە پەی من.
کاکە پیرە ماچۊ:
پاشا ئەمانە، دڵ پڕ ئەندۆوە
هەر کەس ڕووزە گرت، قەومی نەنۆوە
داخل وە میللەت، هەفتا گرۆوە
ماناش:
پاشا، ئەچی چېوا دڵش پەڕ غەمو پەژارەن، ئا کەسە ڕۊچۍ گېرۊن جە قەومو نەبییەین، ملۊنە دلۍ حەفتا تاقمەکەو جەحەڼەمی.
کاکە عەرەب ماچۊ:
دۊست پادشام کەرد، مووچەی ناچان
وەزەمین ناچە چووب دوو حاچان
نیشانە نەنۊ، سویل وېش پاچان
ماناش: پاشام مووچەش پەی گردو زیڼەوەرا بڕیۆ
سەرو زەمینیۆ، لوۋا شۊنەو گرد زیڼەوەرێرە
نیشانۍ تازۍ ئانېنۍ، سمېڵېش پاتېنێ.
کاک ڕەحمان ماچۊ:
هەر کەسی کە یار، نەگېرۊ ڕووزە
سێ ڕووزە گیران، نە ئاتەش سووزە
خاران نەزانان، یەک ماھ سێ ڕووزە
ماناش:
هەر کەسێ دوسەن، با ڕۊچۍ نەگېرۊن
گەر یەرۍ ڕۋۍ ڕۊچۍ گېری، بە ئاییرو جەحەڼەمی نمەسۊچی
برایانۍ ئېمە نەزانانشا، یەک مانگ یەرۍ ڕۋېن.
عزرائیل ماچۊ:
یا ڕووزە نەیۆ، یا شا ئەمانە
هەر کەس ڕووزە گرت، ئەو بۍ سامانە
ئاخر کە شکار، گورگ دەمانە
ماناش:
با ڕۊچۍ نەبان، دەخیلەنا پاشا
ئانەی ڕۊچۍ گېرۊن، ئا کەسە بۍ سامانەن
دماجار مەبۊن بە نەچیرو دەمو ۋەرگا،
چېگەنە مەوینمۍ شەعائیرۍ یارسانەکا بە شېعرەو ئاواز بەرۋزیا، ئی دەسوورۍ سەرو زوانو ئەولیا گۆرەکاشاوە ئامێنۍ دلۍ، گەر گۆرۍ یارسانەکا شاعېرېچ نەبیېبا، قسۍ و مۊچیاریەکېشا دماتەر خزیێنېنە دلۍ قاڵبو شېعرا بە زوانی هۆرامی.
واچۍ (قرمزی) کە نازنامەن، واچێوە ئازەربایجانی (تورکمانی) یەنە، بە ماناو ڕەنگۍ (سوور) ۍ ئامێنە.
بېجگە چانەیە، جە کتېبو (سەرەنجام) و یارسانینە، چن شېعرێ بە زوانی تورکمانی هەنۍ کە چانېشانە جە کوردیۆ فاڕیێبا پەی سەرو زوانی تورکی، چونکم بەشێ جە یارسانەکا بە نەژاد تورکمانېنۍ، چەنی ئانەیچە زوانی ڕەسمی ئایینەکەیشا هەر هۆرامین.[1]