فیدای سنعت بام
بەشۍ یەرەمە
تەریقەتو نەقشی سینە بە سینە ئاما، مەنزڵەی تازېش ڕۊشنەنە، پیرێ زانای عاریف، یاگېش دلۍ جڼ و ئینسینە باڵانە، ئاڎییچ شېخ عەبدولقادری گەیلانین.
شېخ عەبدولقادر دمای وەرگېرتەی تەریقەتی، دەسشکەرد بە ئیرشاد، چڼەها کافرېش موسوڵمانۍ کەردۍ، چڼەها موسوڵمانېش وە (ئەولیێ)کەردۍ.
میرزا ئۆلقاڎرو پاوەی چی بەشەنەو ئەچی مردگاو تەریقەتینە فرە مدرۊ، فرە سەرسامەن بە شېخ عەبدولقادری گەیلانی، مەدح و سەناش کەرۊن، ماجۊ منییچ نامم عەبدولقادرەن، هانام بە تۊن.
گا چەنی تیور مەبی وە شەهباز
پەی چەرخ هەفتەم مەکەردش پەرواز
مەیاوا وەلای قەبرستان فەرش
دەس دراز مەکەرد پەی گوشوارەی عەرش
زومرەی بزورگان شېخان فازڵ
زاهیدان دەور پیران کامڵ
جە مەرتەبەی شېخ سەراسیمە بین
حەسەد مەوەردن وە شای (محی الدین)
جامی پەڕ جە ئاو کیاستن پەرېش
تا کە حاڵی بۊ ئەو جە کار وېش
دەس بەرد یەک گوڵی توحفەی بۊ گوڵاو
وە چەند شاڎیی و زەوق ۋست وە بان ئاو
یانی من ئه و گوڵ ئه و بەغدا جامەن
نەوان وېنەی ئاو پاشۊرەی پامەن
دەس کەرد وە تەعلیم ئیرشاد یاران
ئیسم بوزورگیش ۋیەرد جە شاران
دەنگی تەلیلەش مەشیی وە فەرسەنگ
کەش و کۊ و ئینسان گرد ماما وەدەنگ
دەنگ دایەرەش جە کەیوان مەویەرد
دنیا جە زوڵمات یەکسەر خاڵی کەرد
خاستەر جە سککەی زەرب نادری
شایع بی ڕوتبەی (عبدالقادر)ی
سامان دا سوورەت ئەعماڵ یاران
ڕەونەق دا وە کار تەریقە داران
جەو دما سوڵتان (متصرّفین)
تاج ئەولیای (قطب العارفین)
وە پای کەرامات زۊر نیهانی
ڕوو کەرد وە ئەولاد (جان ابن جانی)
وە تەوفیق حەق دانای داوەری
دەس کەرد وە ئیرشاد ئەجڼە و پەری
تەلیلە و تەکبیر ۋست نە دلېشان
بەرشین جە قانوون قەڎیمی وېشان
چن هەزار کافر وە ئیسلام ئاوەرد
چەند موسڵمانان وە ئەولیا کەرد
تەکیەو تەریقەو تەوحید و تاعەت
مزگی و مەدرەسە و جمعە و جەماعەت
وە زەرب هیممەت ئەعلای کائینات
تەسخیر کەرد تەمام موڵک مەخفیات
جەهان تا جەهان وەلایەت کەرد ساف
شاباڵ جەزبەش یاوا وە کۆی قاف
مەخلووق ئەو زەید بۍ زیاڎ و کەم
گرد بی وە دەروېش شای (غوث الاعظم)
دەگایی ئەتراف ئەهالی شاران
جەبەڵ نشینان خېڵی وەر غاران
جە بەین وېشان سوحبەت مەکەردەن
وە عەبدولقادر سەوگەند مەوەردەن
شای (قطب الاقطاب) بازی ئیلاهی
ئەولاد ئەشرەف ڕەسولڵاهی
هەی فیدای ڕوتبەی ئەعلای بەرزت بام
فیدای موعجزەی عیسا تەرزت بام
سەرحەڵقەی پیران یا عەبدولقادر
پەنای فەقیران یا عەبدولقادر
قوتب ڕەبانی یا (غوث الاعظم)
شاهی گەیلانی یا (غوث الاعظم)
کانی کوَی گەوهەر یا عەبدولقادر
شېخ پەڕ جەوهەر یا عەبدولقادر
نامەردیم کەردەن یا (غوث الاعظم)
هانام ئاوەردەن یا(غوث الاعظم)
عسیانم بۍ شۊن یا عەبدولقادر
نامم نام تۊن یا عەبدولقادر
هەرچن ڕوو زەردم یا عەبدولقادر
دەوا کەر دەردم یا عەبدولقادر
هەر کەس سەر وەخاک ئاسانەت ساوا
جە دین و دنیا وە مەتڵەب یاوا.[1]