شین پەی محەمەد بەگو وەکېڵی
بەشۍ یەرەمە
میرزا ئۆلقاڎر، باس جە شېوەو مەراسیموو تازیەی کەرۊن، دمای کۊچی دمایینی محەمەد بەگو وکېڵی، چەنی ژەنو کناچۍ و زارۊڵەکېش تازیەبارېنۍ، پۊشاکی سیاو و قەترانیشان پۊشان، چەنی بە ناخوون ڕوومەتی گۆڵ ئاساشان زامڎار و هوونین کەردەن. میرزا دمای ئێنەیە وېش هاوارش چەنە هۊرزۊ، پەی پیێوە نامڎاری، کە بە خەسرەو و فەرەیدوون و ئەسفەندیاری وېناش کەرۊن، بە واتەی سیفەت و ئەتوارە زەریفەکاش شینش پەی کەرۊن.
پەی کەرد شاماران گېسوی حەبەش تار
یەخەی ئەشەد بۊش دڕی تا بە وار
وە مەودای ناخوون ئەڵماس ئەزرەق
گول گول کەرد وە هوون گۊنای گوڵ وەرەق
لیباس قەترانی پۊشان وە قامەت
وە عەزم ئەبەد تا ڕۊی قیامەت
کزەی جۊش دڵ لەرزەی نیمەشەو
یاساخ کەرد خوراک بەتاڵ کەردەن خەو
زیندەگی بە وېش ها حەرام کەردەن
چوون شاسواری وېنەی تۊش مەردەن
ماچۊ هەی سەردار سەنگی سامم ڕۊ
ئەی سپا و سالار خاس و عامم ڕۊ
ئەی شای بوڵەند بەخت کەیکاوسم ڕۆ
ساحیب سپا و سان تەپڵ و کوسم ڕۆ
شەهنشای جەمشید جەم نگینم ڕۆ
ناپەیدای ئەقلیم هند و چینم ڕۆ
شای بەهمەن باهوو بۍ نەزیرم ڕۆ
سانی زوالقەڕنەین ئەقلیم‌گیرم ڕۆ
تووس زەڕین کەوش نه و زەڕ بەختم ڕۆ
تاق هەفت ئەوڕەنگ تاج و تەختم ڕۆ
دارای دەریا دڵ خۊش ئیقباڵم ڕۆ
شاهنشای خەسره و کەمەر لاڵم ڕۆ
فەرەیدوون فەڕ بوڵەند پایەم ڕۆ
شای ئەسفەندیار کۊتا مایەم ڕۆ
شای حوکم ڕەواج حوکم ڕانم ڕۆ
جە ڕووی عەدڵ و داد نەوشیروانم ڕۆ
پیلەتەن دەستوور قارەمانم ڕۆ
نەوەی زاڵ سام نەریمانم ڕۆ
سام فەرامەرز جەهان‌گیرم ڕۆ
زەوارەی زۆرچەنگ پەڕ تەدبیرم ڕۆ
جاداری جای گشت کەیانانم ڕۆ
باش باڵا دەس گشت خانانم ڕۆ
ئاغەی کەرەم‌دار حاتەم تەورم ڕۆ
همەت چوون واران دارای هەورم ڕۆ
بزورگا عالەم نامدارم ڕۆ
مەعروف دەوڵەت شای خونکارم ڕۆ
شیری پەڕخرۊش ڕوی مەیدانم ڕۆ
بزورگا جەرگەی بزورگانم ڕۆ
یار سایەدار وەفادارم ڕۆ
نگادارەندەی گوڵ جە خارم ڕۆ
ساحیب سەلتەنەت تەم تراقم ڕۆ
میر خاتر تەڕ خوش مەزاقم ڕۆ
شای میرشکاران شکار دوسم ڕۊ
سەرزین زبەرجەد پڵەنگ پۊسم ڕۆ
کوشەندەی قیفان کەڵ ڕەمانم ڕۆ
ئاغەی سەیادان هام‌دەمانم ڕۆ
ساحیب کارخاس ئاغە گیانیم ڕۆ
ئاشق وە که و ڕاو جای هەڵانیم ڕۆ
دایېم سەفەرکېش گەرمەسېرم ڕۆ
شاهسوار ڕەزم دەنگ دلیرەم ڕۆ
کانی کۊی گەوهەر ئەسلِمەندم ڕۆ
شای شەوکەت شوعار دڵ پەسەندم ڕۆ
دوس مەولایان نەفەس پاکم ڕۆ
ڕەفیق شېخان شەرەفناکم ڕۆ
ئەمیر خەڵوەت ئەمیرانم ڕۆ
مەعروف پای تەخت شای تارانم ڕۆ
خامۊشی چرای شەمع ماڵم ڕۆ
لەعل بەدەخشان دانەی لاڵم ڕۆ
ڕۊشنی ڕووی پاک سەر زەمینم ڕۆ
قیبلەگای یەقین دنیا و دینم ڕۆ
سایەبان فەوق سایەی سەرم ڕۆ
حیجاب سڕپۊش دەشتوو دەرم ڕۆ
هەی داد هەی سەردار هەی سەرخېڵم ڕۆ
هەی خان هەی سەرهەنگ هەی وەکېڵم ڕۆ
نەخل نازپەروەر پای سەرئاوم ڕۆ
شای نۊجوانان کەچ کڵاوم ڕۆ
دەریای مەعریفەت جەیحون جۊشم ڕۆ
«اصطفا و اگلس»ترمەپۊشم ڕۆ
پەی ئەهل علوم دڵ پەردازم ڕۆ
چەنی فەقیران ئولفەت سازم ڕۆ
مەرحەمەت ڕەنگین حاتەم نەخشم ڕۆ
ئاغەی خەتاپۊش عەتابەخشم ڕۆ
توتی شەکەرخان خۊش تەقریرم ڕۆ
میرزای دەفتەری خۊش‌تەحریرم ڕۆ
نەمام پەی کریای سەحنەی باخم ڕۆ
شای میناگەردەن وەش دەماخم ڕۆ
ئیستە وېنە شیر تەنیای تاکم ڕۆ
مەحبوس زەنجیر سەرای خاکم ڕۆ
وەکېڵ پەی شەوکەت شانو شېوەی تۆ
شەرتەن تا مەحشەر هەر بواچوو ڕۆ
وە فدای سەفا و سەیر کەس نەدارت بام
وە فدای هات هەی هات میر شکارت بام
وە فدای ئەملاکات زەید و ماوات بام
وە فدای عەمارەت تازە ئاوات بام.[1]