بابەت: یاداشت
نووسین: #شێرکۆ عادل دەباغ#
چۆن تووشم بوو بەتوو شى سیاسەتەوە!
لەبەر خاترى گەلى کوردى قارەمان نەبوو، لەبەر فەلسەفەى مارکسیزم نەبوو، ئەوە دواتر بوو کە تێکەڵاوى فکر و مەعریفەتبووم و قسەمان لەسەر ئەوشتانە هەبوو:
لەنێوان پۆلى پێنج و شەشى سەرەتایى بووم وەک زۆربەى منداڵانى تر لە سەرەتاى هاوینەوە دەبوایە بە کار و کاسپیەوە خەریک بووینایە و نە سوڕاینایەتەوە لە کۆڵانەکان، پێشتر بیرۆکەیەک لەمێشکم دابوو حەزمدەکرد تاقى بکەمەوە، کە لەگەڵ باوکم دا لە شارى بەغدا لە بازاڕە جەنجاڵەکەى شۆڕیجە جامێ ئاوى بۆکڕیم (چوونکە لە سلێمانى لەبەر ماڵان و دوکاندار و مزگەوتەکان ئاوى مەرکانە یان شەربە هەبوو خەڵکى بۆ خێر، ئاوى سازگارى کارێزەکانیان ئەبەخشیەوە) وتم باوکە ئاو بەپارەیە! وتى: نا هى بابلگیشە بە خۆڕایە!
هەر لە یەکەم ڕۆژى تەحتیلەوە سەتڵ و جامێکى فافۆنى تازەى بریسکەدارم کڕى کە تازە داهاتبوو (لە گەڕەکى سەرچیمەنەوە هەتا دەچووم بۆ ناو بازاڕ سەتڵەکەم دەکرد بەسەرما و گۆرانى هندیم ئەوتەوە (هێ دۆستى) : نیو جام ئاو بە پێنچ فلس، جامێکى پڕ بە دەفلس، تێر بخۆرەوە بە پانزەفلس، ژنى وا هەبوو خوی و پێنچ شەش منداڵى تێردەکرد بە پانزەفلس هێشتا ئەى وت: ئەیەڕۆ ئاویش بوو بەپارە!منیش ئەم وت: نیوقاڵب سەهۆڵ بە سی و پێنچ فلسە پورێ گیان.
بۆ دواى چەند ڕۆژێ کە لەبەر دەرگاى گەورەى قەیسەرى نەقیب ئاوم دەفرۆشت ، نیوەى منداڵ و پیاوى دەست فرۆشى ئەو بەر مەیان و قەیسەریە بوون بە ئاوفرۆش!؟ منیش ڕۆژێکیان لەداخا سەتڵ و جامە فافۆنەکەم بە لەقە شکاند و وازم لە ئاوفرۆشتن هێنا و سەتڵە شک او جامە فافۆنەکەم بردە گوزەرەکانى خوارەوە بۆ دووکانى ڕیسایکلینى فافۆنەکۆن و مس فرۆشەکان و فرۆشتمەوە و بە پارەکەى گەڕام بزانم چى هەیە تا بیفرۆشمەوە و قازانجى لێبکەم، گوێم لە ژنێک بوو بە دووکاندارێکى وت پیلى گەورەتان هەیە؟ بۆ ڕادوێکەمان بۆ ئەخبارى شەو! منیش ڕام کردە بەردەمى و وتم پورێ بوەستە ئێستا بۆت دەهێنم وتى: ئازاکە زوبێرۆ ، ڕام کرد بۆ قەیسەرى نەقیب و لە دووکانى جووملە فرۆشەکان کە هەموو دەست فرۆشەکان لەوێ شتیان ئەکڕى و ئەفرۆشتەوە پیلى گەورە و وەسەتم کڕى و بۆ ژنەکەم بردەوە ئیتر ماوەیەکى باش پیلم فرۆشت، تا ڕۆژێکیان لەبەر دەرگا گەورەکەى قەیسەرى نەقیب هەر کەسم ببینیایە پێم دەوت: پورێ پیلت ناوێ؟ دادە پیلت ناوێ؟ خاڵە پیلت ناوێ؟ تا ڕووم بوو بەڕووى ئەمنێکى عەرەبى ڕەشتاڵەى درێژى سمێڵ فش هەتا توانى نووکى پێى خستە سەر پێیەکم و بە هەموو هێزى خۆى زللەیەکى لێدام تەواو سوور هەڵگەڕام، زانیم جێپەنجەکانى لەسەر ڕوومەتم دەرچووە! ئەو بەر مەیانەى کە هەرا و هۆسە و جمەى دەهات هەموو بێدەنگبوون و کەس نە جووڵا و نقە لە کەس نەهات هەستم کرد هەموو خەڵکى زۆریان پێ ناخۆشبوو تەواو پەستبوون و بێدەنگ بوون منیش هەموو هەوڵم لەسەر ئەوەبوو کە سەر دانەوێنم و فرمێسک بە چاومانەیەت و چاوم بڕیبوە چاوى و ئەویش زۆر بەڕقەوە سەیرى دەکردم و قاچى لانەدەبرد (ئەى ویست ئازایەتى و ترسى خۆى بۆ خەڵک بسەلمێنێ) ! ، ئەمنەکە بە بەدلەى بەعسییەکانەوە بوو، دەبڵ دەمانچەى پێبوو کلکى دەمانچەکانى دەرخستبوو! ، پاش کەمێ باڵى فشکردەوە و بەناو بازاڕەکەدا ڕەت بوو خەڵکەکەش و ڕدەوردە دەستیان کردەوە بە مامەڵەى ڕۆژانەى خۆیان، لەو ڕۆژەوە بڕیارمدا هەرچى زووە گەورەبم و تۆڵەى ئەو زللەیە بکەمەوە!
ئەوکاتەى من زۆر منداڵ بووم تازە #مام جەلال# خەریکى درووستکردنى یەکێتیى بوو کاک #مەسعود بارزانی# تازە خەریکى پێک هێنانى قیادە موقەتەبوو کاکە #حەمەى حاجى مەمەحمود# یش لەسەرتاى دەستپێک و ناوبانگیدابوو، منیش بڕیارم یا حزبێک درووستکەم لەسەر کاغەزێک نووسیم: حزبى تیشک و چووم بۆ لاى ڕەفیقەکانم هیوایان هەبوو لەترسا کە دەیبینى ڕایدەکرد چونکە تازە سەردەمى #مولازم موحسین# بوو زۆربەیان پێم پێدەکەنین، ئیتر لەو ڕۆژەوە هەستم دەکرد پێم ناوەتە ناو دنیاى سیاسەتەوە بۆیە وازم لە حزب درووستکردن هێناو چاوەڕوانى ڕۆژگار و هەلێک بووم تا گەورەتربووم و لە پانزەساڵى کە لەلاى شاعیر ک#اکەى فەلاح# ئیشم دەکرد چوومە دنیایەکى ترەوە و خولیاى دنیاى ئەدەب و هونەر و سیاسەت بووم و هەوڵم ئەدا پەیوەستبم بە گرووپێکەوە لەدژى حزبى بەعس چالاکبم. [1]