لەیلۍ مەجنوون کەرد
بەشۊ چوارەمی
دمای گوفتەکا مەجنوونی، لەیلی ئاما وە گوفتار، ماچۊ: چ خێرتەن، ئی لافاو و هەڵسا پەی چېشی؟ عالەم جە داخت گرد ماتەمەن، گەر پەی لەیلېن، ئینا لەیلۍ، من ئامێنا پەی لاو تۊ گیان و دڵم کەردەن بە فیڎات. بە حوکمو قادری، مەجنوون هەناسێ سەردش هۊرکېشا، واتش: ئەی لەیلۍ، شای شەکەر ڕازان، ڕاسەن کە من تۊم وە ئاوات وازان، بەڵام عەشقو من مەجازی نېیەن، هەقیقیەن، خوڎای بانیسەر پاسەش کەردەن مەیل، من ئاوارە و کەش و کۊی، توویچ جە دووجەیل.
یە چە خەیرتەن چېش پەنەت ئامان
ئەسرین ڕېزناتەن سەر تا وە دامان
تاڵەت نەقشەی نیک سەحفەی سەنگ بیەن
هەردان جە داخت گرد دڵ تەنگ بیەن
ئەر پەرۍ لەیلەن یە مەیل لەیلۍ
یەشېوەی چوون شەوق جەمیل لەیلۍ
وېت شاڎکەر وە لەیل خاڵ توحفەی بېگەرد
مەر خۊفت جە کېن مەجنوونی چۊڵ‌گەرد
مەجنوون یە لەیلۍ جەمین جامەکەت
مەجنوون یە لەیلۍ دڵە و دامەکەت
مەجنوون یە لەیلۍ ئامان وەلای تۊ
گیان و دڵ کەردەن یەکسەر فیدای تۊ
مەجنوون یە لەیلۍ سەردار ڕەندان
مەجنوون یە لەیلۍ شای زوڵف کەمەندان
مەجنوون یە لەیلۍ نازار باوان
مەجنوون یە لەیلۍ گوڵ غونچە‌ی ساوان
بە حوکم تەقدیر تاک تەنیای فەرد
مەجنوون جەو دەمدا کېشا ئاهی سەرد
واتش هەی لەیلۍ شای شەکەر ڕازان
ڕاسەن من کە تۊم وە ئاوات واسان
بەڵام عەشق من مەجازی نیەن
دڵ وە بەڎنامی تۊ ڕازی نیەن
دڵەی من هەرزە و هەرجایی نیەن
کەس چوون من عەشقش ئیلاهی نیەن
کەس چوون من سەراف دانەناس نیەن
کەس جە من فېشتەر پەی تۊ خاس نیەن
کەس چوون من مەجنوون شەیدای لەیل نیەن
کەس چوون من جەمەیل دەروون کەیل نیەن
یە پۊس و کەڵپۊس عەوداڵ مەجنوون
یە جەستەی خەستەی زوخاڵ مەجنوون
یە دیڎەی پەڕهەرس سەیلات مەجنوون
یە وېڵ مەکان وڵات مەجنوون
یە ناڵەی دڵ‌سۆز بېدار مەجنوون
یە ئەسرین گەرم بە زار مەجنوون
یە ماوای کۊی هەرد دووجەیل مەجنوون
یە شەرت و یە شۊن یە مەیل مەجنوون
یە باڵای چوون قەوس کەمان مەجنوون
یە جەمیلەی جۊی چەمان مەجنوون
گیانم بیناییم دیڎەم نە ڕېتەن
چوون شېوەی تەمام مەحبووبی پېتەن
پادشای شاهان بە لوتف و کەرەم
کەماڵ و جەماڵ تۊ ۋستەن وە هەم
ڕاسەن من سەودای دەروونم بېشۊن
بەڵام ئەی حەرفە چە لایەق وە تۊن
چە لایەق وە قەیس ئەراگېڵتەن
وە مەجنوون عەشق سەرعی وېڵتەن
مەر نام حەقم وە حەق نەوەردەن
دین تەرسائیم ئەختیار کەردەن
یە تۊ مەواچی بۍ ئیمانیەن
نە دەرگای گەردوون نافەرمانیەن
مەر مەزەی قامەت جە سەر بەرشیەن
لایەق وە ڕەویەی مەجنوونی نیەن
پەی چېش عەشق من ئیلاهی هەقەن
هەق حەبیب هەق زات موتڵەقەن
لەیلۍ من فەڎای غەمزە و نازت بام
لەیلۍ من فەڎای ڕېزەی ڕازت بام
مەجازی نیەن، عەشق من هەقەن
هەق حەبیب هەق زات موتڵەقەن
وەش ئامای وە خەیر هەی بەرگوزیدەم
خاک پاڵاکەت وە بان دیدەم
خالق ڕۊی ئەزەڵ پاسەش کەردەن مەیل
لەیلۍ ئه و مەسکەن مەجنوون ئه و دووجەیل.[1]