میرزا ئۆلقاڎر بە نامەشېعریێ داوا مەکەرۊن ڕەفېقێش پەی ئانەی (مەقاش) ێش پەی وەشکەرۊن، دیارەن ڕەفېقەکەش تەنەکەچی بییەن، بەڵام میرزا بە تەرزێ فرە زەریف داواش وەنەکەرۊن پەی پەنەۋازیەکەیش.
میرزا سەرەتا سەوگەندش مڎۊ بە وەشەوستەرین کەسیش کە هامسەرە دڵوازەکېشەنە، دیارەن بە وەشەویسی ئاردېنەش، ئینجا مەگنۊ تاریفدای مەقاشەکەی، پېسە جەزبەو موقناتیسی بکېشۊن، پېسە مەقاشو کارخانەو ئینگلیسی برمانۊ، پەی ئانەی میرزا هەتا ڕوێ عومرش مەنەبۊ، ئافەرین بکیانۊ پەی دەسکاری و دەسڕەنگینیش.
میرزام بۊ وە عەشق
میرزام بۊ وە عەشق مەیل هەرجاران
بە وەفای قەڎییم مابەینی یاران
بەو شەرت و ئیقرار چەنی لەیل کەردەت
وە گیانی ئازیز تازە ئاوەردەت
وە ئارەزووی دڵ وە کام یاواکەت
وە دیڎەی دڵبەر سەوڵ ساواکەت
وە باری خاتر خەستەی پەڕخاران
وە توڕڕەی چین‌چین زوڵف نازاران
خەم زەدەی خەمان دەرد ئەوگارم
هەنی چی فېشتەر مەدەر ئازارم
مەدە وە خەیاڵ ماجەرای مازی
مەشیۊ مەقاشێ پەرېم بسازی
بەڵام کام مەقاش باڵای مەقاشان
شیرین‌تەر جە ڕەنگ نەقش نەققاشان
بکېشۊ چوون کېش جەزبەی مقناتیس
بمانۊ وە تەرح کارخانەی ئینگلیس
سافیش جە خەیاڵ هۊر ۋیەردە بۊ
شەوقش جە جامان گرەو بەردەبۊ
دەرزی و مودبیرە و حەڵقەش دیار بۊ
پەسەندی مەجلیس شاهۊ خونکار بۊ
ڕەقەم وەش تەرکیب سەوهان کاری بۊ
دایېم با جە لام یادیگاری بۊ
مومتاز بۊ چوون لول دانسقەی خارا
بکیانەش پەرېم وە بۍ مودارا
(قادر) تا ئەوڕۊ مودەی عومرش بۊ
ئافەرین واچۊ پەی دەسکار تۊ.[1]