چناری هەوڵی
بەشۊ دوەمۍ
دلۍ سەرچەمەو (هەوڵی) نە، میرزا ئۆلقاڎر چنارێ باڵا بەرز مەوینۊ، ملۊنە پاڵش، پېسە شاهەنشاو چنارا تەماشەش کەرۊن، چن پەرسێش وەنە کەرۊن، سەوگەندش مڎۊ بە زاتو خوڎای، کە ماوای یەکەمەش، وەختێ تووڵە نەمامێ بۍ، چکۊ بېیەن، چ کەسێ تۊش جە ماواو وېت هۊرکەندەن، ئاردەنیش پەی ئېگەی، ئارۊ چی دەماخت بەرزەن، مەڵامەت چېشەن، من وەڵتەر هەوڵیم دیەن، چۊڵ و هۊڵ، بایەقۊش چەنەش مەوانان، بەڵام ئیسە زەوق و شاڎیی تۊ جە چېشیەن؟
عەرز کەردم واتم نەونەمام نۊ
نیەن جەی دنیا وېنەی باڵای تۊ
بوویەر جە تەقسیر عەرز بەندەی شېت
جە ڕووی گوستاخی هەرچی پەرسوو لېت
بۊ بەشق ئەو کەس نەزا و نەمەردەن
تۊش وە شەهنشای چناران کەردەن
سا جەڕای گەردوون بکەر سەوابێ
سەر ئەفرازم کەر وە یەک جەوابێ
مەکان ئەسڵیت نەکام کوڵاو بۍ
جای توڵ توفڵیت نە کام شەتاو بۍ
کۍ تۊش جە ماوای قەدیم ئاوەردەن
ئەی جاگە پەی تۊ موشەخەس کەردەن
تۊ ئاراستەی کام خرەدمەندەنی
دەس نەمام کام خاتر ڕەندەنی
یادگار شوون کام نۊجوانی
پەروەردەی تەعلیم کام باخەوانی
هەر ساڵ من مامام سەیران باڵات
مەدیم بۍ ڕەنگی ئەوراق کاڵات
هەوڵی هەم عاجز کەلاوە کۊنە
باڎەقوش مەوەند جە باتی سۊنە
ئارۊ تۊ وەیتەور دەماخت بەرزەن
زەمزەمەی شاڎییت وە هەزار تەرزەن
منیچ فرسەتم غەنیمەت زانا
تۊماری عەرزم نە پایەت وانا
جوابم چېشەن سەوڵ سەوزەپۊش
ڕېزەی ڕاز تۊم با بەیۊ نە گۊش
هەرکاتێ زانام ئه و باڵا بەرزە
چوون بادی سەڕسەڕ ئامانە لەرزە.[1]