میرزا ئۆلقاڎر، نامێوە مەکیانۊ پەی ڕەفېقێش کە دیارەن سەفەرش کەردەن پەی مەنزڵێ دوورۍ، دووری ڕەفېقەکەیش بە سزا وېناکەرۊن، چونکم دیارەن دووری و غوربەت فرە خەفەتبارەن. میرزا جە نامەکېنە ماچۊ: من شەوان جە وەختو خاویمەنە ئینانا چەنی تۊ، بەڵام وەختێ خەبەرم بۊوە دیسان ڕەنجەڕۊ، نېیەنی پاڵمەنە، میرزا شۊنەو ڕاویارێ یان سەیاحێ خاسیرە گېڵۊ کە سەوقاتیێش پەی بکیانۊ، بەشکم ساکن بۊ دڵ نە کەف و کوڵ، دمایی داوامەکەرۊن ئەو ڕەفېقەکەیش وەختێ نامەکېم مەیاوۊن دەستا، نەگندۍ خەیاڵو دوورە وەڵاتا، یانی گەرەکش نېیەن ڕەفېقەکەیش چڵاکنۊرە کە کەوتەن دوورە وەڵاتا.
میرزام سزا دیم
میرزام سزا دیم، میرزام سزا دیم
ڕۊیە جە ناکا وېم بە سزا دیم
وە ئەمر تەقدیر خوڎا ڕەزا بیم
پەرۍ مەینەتان تەن وە قەزابیم
چەنی مەینەتان دایېم خەریک بیم
شەو و ڕۊ چەنی خەم هام شەریک بیم
وە یادڎ تۊوە هەر نە وەسواس بیم
نە گوفت و شنوود یاران بېباس بیم
نەزانام پەی چېش تۊ تەشریف بەردی
زەمزەمەی بیسات شاڎییم تۊر کەردی
ئەو وەهار نۊ پەی من بی وە خەم
سەر داوە وەنەم هەم خەم و ستەم
تەشریف خەیرت لواوە شاران
خەم وە جا ئاستی پەرۍ هاویاران
چەوساوە میرزام تۊ تەشریفت بەرد
هەر وېش مەزانۊ تاک تەنیای فەرد
شەو جە خاودا من ڕەفیق تۊم
چوون بیڎار مەبوون دیسان ڕەنجەڕۊم
حاڵیم بی زانام، بۍ قەرارەنی
تەوەللای مەینەت دووری یارەنی
شەوان تا وە ڕۊ ئینتزارەنی
چەمەڕای ڕاگەی ڕاویارەنی
کۊن ڕاویارێ خوېش و دڵسۊز بۊ
سەیاح شاران هەم غەریب دۊز بۊ
تا پەیت کیانوو من بە دیڎە و دڵ
بەڵ ساکن کەرۊ دڵ نە کەف و کوڵ
ئیزهارت کەردەن هەم ئەو دۊعاگۊ
بڎەروت تۆفیق خوڎای شەو و ڕۊ
هەم بەو حاجەتی پاکی پېغەمبەر
سەعادەت بەخشۊت خوڎاوەند جە سەر
چە لایەق وە من ئەی ساحیب کەماڵ
هیممەت کەرۊ پەیت، وەیس یەمەن ماڵ
ئیزهارت کەردەن پەرۍ هەواران
خسووس ئاتەشگا نشینگەی جاران
میرزام وەگیانت جە دۊسی تۊوە
نەکېشام وە سەر، وەفراو نۊوە
عەیش و شاڎی و زەوق، وەر هەرد و زاخان
گردین بەتاڵەن میرزام جە داخان
بەند هەمرۊڵە تا وە لاوەردە
بی لا هام ڕەفیق هیجران ئاوەردە
هەردی کانی ۋشک، تا دارە ملە
ئەویچ پەڕ کەندەن هیچ مەکەر گلە
بەرملەی گالان تا وە کېلە کۊن
ڕەفیق وە گیانت ئەویچ شەیدای تۊن
هەم میلان دەرە، تا وە باوەمەڕ
هەیمای پەی لوات نەکەردەن باوەڕ
هەم مەشی مەردان تا وە لاخڕان
فغانش بەرزەن ئامان سەڎ ئامان
هەم بەندی بېگڵ تا کانی بەرە
دوودشان جە داخ من زیاتەرە
کانی کەوتە پیچ هەم حەسەن ئاغە
میرزام گیانو تۊ ئەویچ پەڕداخە
هەرد و کۊ و کەمەر سارا و کۊساران
زەگارەن پەرۍ غەریب نە شاران
بەڵی هام ڕەفیق وەسیەتم ئیدەن
یەک تەنیا حەرفێ وە تۊم ئومیدەن
جەو دەم نامەکەم مەیۊ وە لاتان
نەگنی ئەو وەسواس دوورە ۋڵاتان
کوان نە ئەسرین بەندە گرد کەیلەن
دیارەن دنیا بېوەفا و مەیلەن
جە عەقڵ و جە هۊش جە فکر و جە فام
هیچ کۊتا مەکەر باقی وەسەلام.[1]