ئەگەر مەجنونەنی، مەشۊم تەنیا (لەیلۍ) ت گەرەکەبۊ:
ئەحمەد پریسی، شاعېر و هامڕاو مەولەوی، دوۍ واڵېش مەبان، یوۋەشا نامېش (لەیلۍ) نە کە دڵوازەو مەولەوی بیېنە،
قەدەر پاسنەبۊ لەیلۍ نەوەشە گنۊ، ئەحمەڎ پریسی براش گلەیۍ جە گەردوونی کەرۊن کە چەنی کریۊن لەیلۍ نەوەشە گنۊ جەوەختێنە لەیلۍ شیفانە پەی زامو ئانېشا کەبەختەشا پېسەنە بەختەو (مەجنون) ی، هەم شیرینیش دەوان پەی ئانېشا کە چەرخشا پېسە (فەرهاد) ی چەرخیان؟
لەیلۍ شیفای زام مەجنوون بەختانەن
شیرینیش دەوای فەرهاد ڕەختانەن
حەیف نېیەن فەلەک چەواشەی چەپگەرد
شیفا وە ئازار، دەوایی وە دەرد.
دیارەن گەر کەسێ عاشق نەبۊن پېسە مەولەوی نمەتاوۊ هەم زاتو ئانەی نمەکەرۊن دەس بەرۊ پەی ئی شېعرۍ، هەر مەگەر جە دوورۆ پەی جوانیەکاش بڎیۊ، بەڵام مەولەوی چونکم ناخشەنە عاشقو واڵەکۍ ئەحمەڎ پریسین (لەیلۍ) ن، ئازایانە هەڵمەتە بەرۊ سەرو ئەحمەڎ پریسی و بە شېعرێ زەریفتەرە ڕۊنەقش زیاتەر کەرۊن.
مەولەوی مەڵامەتو نەوەشییەکەی مزانۊ، ئاگاداریچەن کە ئانە نەوەشی لاشەی نېیەن، بەڵکم نەوەشی دڵ و دەروونییەن، کە گەرمی کوورۍ مەیلیشەنە پەی قەیسی چۊڵگەردی، کارش نە تۊی دەروون و دڵو لەیلۍ کەردەن:
گەرمی کوورەی مەیل قەیسی چۆڵ گەردەن
تەئسیر نەتۆی دڵ لەیلێ ئاوردەن
بەڵ نەتاو ڕەقیب وە دەرد مەشهورەن
وەرنە دەردو لەیل هەی نە یەک دوورەن
دیارەن قەدەرو خوای پاسە بۊ کە لەیلۍ خاسەبۊوەو دمای ماوێ شوو کەرۊ، مەولەویچ بە شعرێ داوا کەرۊ ئەحمەد پریسی کە مادام لەیلۍ نەبیە بە نسیبم، بەڵکم واڵەکۍ تەرەش کەنامېش (بەگیجۍ) نە بۊ بە هامسەرەم، ڕەنگە بوۋەو لەیلۍ بڎۊ.
قسەیێ ئەکەم بەڕێ و جێ بێ
کە (لەیلێ) نەبو با (بەگیجێ) بێ.
ئەحمەد پریسی فرە بە ئاقڵانە و جوان جوابش مدۊوە و ماچۊ: وەختێ تۊ وەڵتەر مەجنوون بییەنی، چەنی دمای لەیلۍ دڵ فاڕی و داواو بەگیجۍ مەکەری؟
قسەیێ ئەکەی بێ ڕێ و جێ بێ
تۆ کە (مەجنوون) ی چۆن (بەگیجێ) بێ.[1]