ناونیشانی بابەت: تیمێک لە قوتابییانی زانکۆی سۆران دوو سەرکەوتنی مەزنی نێودەوڵەتییان تۆمار کرد

لە درێژەی کار و چالاکییەکانی ڕێکخراوی (IREX) ی ئەمریکی لە ڕێگەی سەنتەرەکانی کاری زانکۆکان، پۆلێک لە قوتابییانی زانکۆی سۆران لە دوو چالاکی نێودەوڵەتی شان بە شانی زانکۆکانی ئێراق و ئەمەریکا و ئوردن بۆ ماوەی (6) ھەفتە و (8) ھەفتە بەشداربوون.
چالاکیی یەکەم بریتی بوو لە (Global Solutions Conversation) ، تایبەت بە گفتوگۆکردن لەسەر ئالێنگارییەکانی جیھان بە پشتبەستن بە (17) ئامانجە بەردەوام و پێشکەوتووەکانی نەتەوە یەکگرتووەکان. قوتابییانی زانکۆی سۆران ڕۆلێکی بەرچاویان ھەبوو لە گفتوگۆکان و پێشنیارکردنی چارەسەری پێویست و وەک یەکێک لە چالاکترین تیمەکان ھەڵبژیردران.
چالاکیی دووەم بریتی بوو لە پێشبرکێیەک لەژێر ناونیشانی (Global Solutions Sustainability Challenge) ، تایبەت بوو بە دۆزینەوەی چارەسەرێک بۆ یەکێک لە ئالێنگارییەکان لە ڕێگەی دورستکردنی بەرھەمێک و ناساندنی بۆ بازاڕی کار. قوتابییانمان توانییان بەرھەمێک بۆ مەبەستی پاککردنەوەی ئاوی بەشە ناوخۆییەکان دورست بکەن کە بریتی بوو لە (فلتەرێکی جێگۆر و بوتڵێکی شوشەیی) .
شایەنی باسە، تیمی زانکۆی سۆران لە قۆناغی پێش کۆتایی توانی یەکێک بێت لە (5) تیمی سەرکەوتوو، لە قۆناغی کۆتاییش وەک تاکە زانکۆی ھەرێمی کوردستان و ئێراق توانی پارێزگاری لە مانەوەی بکات. لەسەر ئاستی جیھانیش توانی پلەی دووەم بەدەست بێنێت و ببێتە یەکێک لە براوەکانی خەڵاتی دارایی چالاکییەکە.
وەک سرووشتی چالاکییەکان، تیمی زانکۆکانی ئێراق و ئوردن لەگەڵ تیمی زانکۆکانی ئەمریکا یەکدەگرن بەمەبەستی دورستکردنی تیمێکی نێودەوڵەتی، بۆ ئەم جارە ھەردوو تیمی زانکۆی سۆران لەگەڵ دوو تیمی زانکۆی (Cumberlands) ی ویلایەتە یەکگرتووەکانی ئەمەریکا یەکیان گرت.
شایەنی باسە، ھەردوو تیمی زانکۆی سۆران لە لایەن مامۆستا (سەروان سدیق حەسەن) سەرپەرشتی دەکران.[1]