نەک هەر من
بەشۊ یەکەمۍ
میرزا ئۆلقاڎرو پاوەی، باس جە کارەساتو زیڼانی و قەنارەدای دوۍ کەسا جە شارو پاوەی کەرۊن (وەکېڵ و مامۊش) ، کە دیارەن دەسەڵاتدارا ئێرانی زیڼانی کەردېنۍ.
پاسە دیارەن لەشکەرو دژمەنی شاڵاوەی گۆرېش ئاوەردېنە پەی سەرو ناوچەکەی، خەڵک بە گۆره و گولانه، چېرو پاو سوپێوە کافرۍ و زاڵمېوە ناڵانشان، دماتەر وەکېڵ و مامۊش یەخسیرۍ کریێنۍ و بریێنۍ، میرزا باس چانەیە کەرۊن هەکە زیڼانی کەردەی ئا دوە پیایە نەک هەر من، بەڵکم گردو خەڵکیش ماتەمبار کەردەن.
نەک هەر من...
نەک هەر من تەنیا چەواشەن تاڵەم
خەم ۋەشتەن وە بان فەرق گرد عاڵەم
وە حوکمی فەرمان لایەمووتەوە
زەنجیر وە گەردەن پا وە کۊتەوە
بڵەند بی سەڎای شەیپوور شاهیی
سەرباز و لەشکر ڕەوان بین ڕاهیی
جە سەڎای ڕۊڕۊی زەعیفەی مەزڵووم
جە زیڕەی توفڵان بېگونای مەعسووم
سەنگ سەرکوان گرد مەبی وە ئاو
وەحش و تیور گرد ئاما وە جواو
کەردەن وە سەردا خاک ڕووی سارا
ڕېزان ئەسر هوون وە بۍ مودارا
یە بەوان ئامان وە هیچکەس نامان
مەر جە کەربەلا ئەهل ئیمامان
جەی سەندەڵ سەرای دەنگ ئابنووسی
گاهێ ماتەمەن، گاهێ عرووسی
گاهێ شاڎیی و زەوق، گا حکوومەتەن
گاهێ دەرد و خەم، گاگا زەحمەتەن
ئیرادە کەردەن کەس نەبۊ دڵشاڎ
فەڵەک هەی هانا، هەی داڎ، هەی بېداڎ
ئەنگوشتت پەی کۍ نەڎا وە ماشە
باڵای بەخت کېت نەکەرد چەواشە
دشمن بېپایان، بەڎگۊ هەم وافر
حاکم سالارەن، جەلاد گرد کافر
نەسەقچی بۍ دین، کېشکچی ناڕاس
فەڕاش و پاکار گرد خوڎا نەشناس
سا دیڎە کۊربای، دڵ لەتار لەتار
فەردانە مەیدان پای تەخت سالار
وەکېڵ بکېشان وە پای سېدارە
عەبدولغەفوور بەگ بدان قەنارە
ساهەی دڵەی تەنگ پارە بای وە تېغ
ئەی دیڎە کۊربای، وە سەر مەودای سېخ
توو خوڎا جە کۊنی مەرحوومی وەکېڵ
پالتاوی جاران بدەی وەلای پېڵ
فەوج فەوج لەشکر جوانڕۆ جەم کەر
بەڎکاران خەفیف، دشمن ماتەم کەر
دیسان شکست دەر وە تیپ خانان
دنیا خاپوور کەر پەی نۊ جوانان
برا و فەرزەندت ها گرفتارەن
دووساخ زەنجیر بەند سالارەن
بېگونا و تەقسیر، بۍ سوچو خەلەل
کەفتەن نە توڕدام مەهلەکەی ئەجەل
لاڵ بام گیرەنی نە پای سەنگ سەرد
سا هەرچی کریان گرد بېتۊیی کەرد
وەرنە وە یەک سات تەدبیرت مەکەرد
زوڵم جوانڕۊت فەوری لامەوەرد
یاوە زۊر و زات، یا سەڎا و ئیخلاس
برا و فەرزەندت مەکەردی خەلاس
نگونت مەکەرد فرقەی زیب و زشت
نەجاتت مەڎا وە بەگزادان گشت
ئەی چارەی سیا، ئەی بەڎبەختی بەخت
ئیسە چېش کەروون جەی ماجەرای سەخت.[1]