نەک هەر من
بەشۊ دوەمۍ
میرزا ئۆلقاڎر، مەگنۊ تاریفدای وەکېڵ و مامۊیش، باس جە شان و شەوکەتیشان مەکەرۊن، کە چن سامناکۍ و بە هەیبەتۍ بیېنۍ، بەڵام ئیسە جە سای چەرخیای چەرخی چەپگەردی، زنجیر لە پاو بۍ دەسەڵاتېنۍ، دماتەر مەگنۊ لاڵیایۆ ئەو زاتو هەققی، ئەو پېخامئاوەری و ئیماما، کە وەکېڵ و مامۊش ناوەران زەرەر.
وەکېڵ بەو باڵای ئاڵای ڕەندەوە
بەو شانوو شەوکەت دڵ پەسەندەوە
بەو تەرز و تەمکین بەو کەماڵەوە
بەو جبە و جەوشەن توڕە و باڵەوە
خەریک مەینەت عەزاب دەردەن
ئەجەڵ وە ناکام زەنجیرش کەردەن
وە دەست زاڵم دین دشمەن ماتەن
وېڵ دەس بەستە نەرد نەهاتەن
چوون دار سەرکەل ئەرواش وە پاوە
دیوان دېوشەن وە بای فەناوە
عەبدولغەفوور بەگ ئەو سەهمناکە
ئەو چابوک سوار شېر بېباکە
ئەو مەرد مەیدان ئەژدەر نە دۊشە
ئەو تافتە و ترمەی کشمیری پۊشە
ئەو تېغ جەوهەر ئاڵای دەوانە
هیچ کەس جە دنیا قابل نەزانە
ئیسە گرفتار ڕەوق زەنجیرەن
دووساخ زاڵم بابی بېپیرەن
دووچار بەڵای ناگەهان ئامان
سالار چوون یەزید ئەوان ئیمامان
ئاخ جە خوان زین ئەسپان وېشان
بکېشان هەر نەوع سا ماما پېشان
نەک وەی تەور، وە دەس، جەلاد بېدین
دەست و پا بەستە بگنان وە زەمین
ئاغە من هانا وەلای کۍ بەروون
داڎ دەرد وېم جە لای کۍ کەروون
هانا هەر وە تۊن یا خوڎای کەریم
یا خوڎای بېباک ڕەحمان و ڕەحیم
یا دەلیل خەیر، خەیرول موحزەرین
یا ئەجابەت‌خوڎای سەما و سەرزەمین
یا بینای بېچوون فەرد فریاد ڕەس
یا زات ئەقدەس پەی بېکەسان کەس
یا کان کەرەم، یا دانای داوەر
وەکېڵ و مامۊش ناوەران زەرەر
یا ڕەسولاالله حەبیب نازار
موستەفای ئەمین شای بوراق‌سوار
شاسوار عەرش ساحیب تەخت و تاج
لامەکان تەیکەر مهمان معراج
شفا خوای ئۊمەت ڕەسول سەروەر
وەکېڵ و مامۊش ناوەران زەرەر
یا ئەبووبەکر سدیق ئەکبەر
یا فاروق لەقب شای ئیمام عومەر
یا ئیمام عوسمان بەحر مەعانی
کاتب الاوراق وەحی ڕەبانی
یا دڵ دڵ سوار کەنەندەی خەیبەر
وەکېڵ و مامۊش ناوەران زەرەر
یا ئیمام حەسەن جای قەزا و بەلا
شەهید مەیدان دەشت کەربەلا
یا خەیرول ئەناس فاتیمەی بەتول
فەرزەند عەزیر گوزیدەی ڕەسول
یا دەست عەباس بوڕیدەی خەنجەر
وەکېڵ و مامۊش ناوەران زەرەر
یا بارەگای بەرز گشتین سەحابان
یا ڕەجا قبوڵ عسمەت مەهابان
یا حەی، باجەتی ئەنبیاهان گشت
وە مەلایکان فریشتەی بەهەشت
بە حەق حورمەت مەحرەمان فەرش
بە زۊر بازووی حاملان عەرش
باجەتی ئەدراک نەفس شماران
بە حەق کاتب، قەترات باران
بە چوار مەلائیک ئەعلای زی شەوکەت
دایېم موقەڕەب بارەگای وەحدەت
بە خروس عەرش پەڕ و باڵ ئەو
مەزانۊ چەندسات ۋیەردەن جە شەو
وە سەڎای ئەزان ئەلاهۊ ئەکبەر
وەکېڵ و مامۊش ناوەران زەرەر
وە ڕەوزەی بەهەشت جای غیلمان و حور
مەسجدول ئەقسا وە بەیت ئە‌لمەعمور
وە خەت سەدرەی لا حەولەوەلا
وە مەسافول ئان جای قەزا و بەلا
وە چەرخ فەڵەک نوور و ماهوو خۋەر
وەکېڵ و مامۊش ناوەران زەرەر.[1]