نەک هەر من
بەشۊ چوارەمۍ
میرزا ئۆلقاڎر، درېژەو نزاکاشەنە پەی وەکېڵ و مامۊیش، دامانو پیرەکا مەگېرۊن، ئەچاگۆ وەرە وەرە مەیاوۊ پانیشت، شېخەکانو هۆرامانی، پیرو سەی ساڎەقی، بەرزنجەی، پیرمە سووری، کاک ئەحمەدو شېخی، شېخ مارفی تاتەیش، بابا گوڕگوڕ، دماتەر ماچۊ: یا حەق، من گردو ئا پیرامە ئاوەردۍ حاجەت، بە ڕەحم و بەزەیی ۋېت و خاسی ئا پیرا، وەکېڵ و مامۊش ناوەران زەرەر.
وە بارگەی شېخ ڕەش پیر خەرقە شڕ
وە سەیید خەلیل وە باوا گوڕ گوڕ
وە سەیید سادق پیری شارەزور
وە بارگەی بوڵەند ئاغەی پیرە سوور
وە شای شېخ عیسا بەرزنجە یانە
وە شېخ کڵاو قووچ دایېم دیوانە
وە کاکە ئەحمەد، وە سەیید مەعرووف
شەمس بېپەردە، ماهی بېخسووف
وە نەوەڎ و نۊ پیر هەورامان
یەکایەک دەخیل مەگېرو دامان
وە سەراجەدین، وە بەهائەدین
وە زیائەدین، وە حیسامەدین
گرد دۊعاگۊیان نە دەرگای داوەر
وەکېڵ و مامۊش ناوەران زەرەر
وە مەعسوومەی قوم، ڕابعەی مەحزوون
وە حەق حورمەت هاجەرەخاتوون
وە هەفت عەوداڵان جە سەراچەی بەرز
وە هەرسێ دەروېش جە کۊی لنگەلەرز
باجەتی باتن شېخ عەبدولغەفوور
بەسیر جە مەخلوق، جە نەزا و جە دوور
وە پیر باباشیخ ماڵ جە بېساران
وە سەعد و سەعید جە کۊی عاشقان
بە سولتان ئیسحاق ماڵ جە بیدبەر
وەکېڵ و مامۊش ناوەران زەرەر
وە کۊسەی هەجییج، وە پیر ئیسماعیل
وە مەڵا مەقسوود، قازی جبرەئیل
وە باوا زامان جە گرد دەرد حاڵی
وە نفوس پاک باوا فەقیاڵی
وە بارەگای پاک شېخ دین تەمیز
پیر پەڕ هیممەت موحەممەد عەزیز
وە کۊنەپۊشان خاک سەرچنار
وە پیر میکائیل، باوا یادگار
بەشق پیر ۋسەین، هەم وە پیر ئەحمەد
وە هەفت براڵە، وە پیر موحەممەد
وە نیکی پەڕچن شەهلای مەعروفی
وە حاجی عوسمان خەتات کوفی
وە بابا عەبدول نە هەر جا مەوجوود
وە حاجی عەیوەز، وە سەیید مەحموود
وە دووشەش ئیمام کول ئاوارە
بەو گرد شەهیدان زەخم قەدارە
وە سەیید تەها، وە سەیید ئەخزەر
وەکېڵ و مامۊش ناوەران زەرەر
وە نۊ مەسجدان، پیران پاوە
ڕجا قبولان وە لای خوڎاوە
باجەتی مەحموود میرئاڵای حیجاب
عەلەم دار فەر شای شیرین ڕکاب
وە شای شېخ حەسەن وە بابا غازی
وە شېخ بایەزید، خوڎا لېش ڕازی
وە سەیید مەحموود، وە سەیید عەلی
وە سەیید نیزام، ماباقی وەلی
وە حاجی غەریب نە جای نیهانی
هەم وە چل تەنان جە حەوز خانی
باجەتی ئەنفاس بابای دینەوەر
وەکېڵ و مامۊش ناوەران زەرەر
وە شای پیر عوسمان ساحیو کەرامەت
یا حەق یانە گشت ئاوەردم حاجەت
وە زەردگ سوار هەم وە نۊسوار
وە کاکە جانە و سوڵتان شېخ موردار
وە شای میرعومەر، میر نوورانی
مەنزڵ نەپای تەخت قەڵای هیلانی
یا حەق بە خاتر ئەی گرد پیرانە
ئەی گرد ئەولیای گەردن گیرانە
ئەی دەفعە جە لای سالار سەفدەر
وەکېڵ و مامۊش ناوەران زەرەر.[1]