فەلسەفەو درووس بېیەی دنیێ دلۍ ئایینو زەردەشتینە:

فەلسەفەو درووس بېیەو دنیێ، چېرو ڕوشنایی ئاوێستاینە، جە دوۍ هېزا پېڎا بیېنە، پی تەرزە:
1.هېزو ڕۊشنایی.
2.هېزو تاریکیی.
سەرو ئا بنەمێوە جەهان بېیەن بە دوۍ بەشېوە: (لەشکەرو ڕۊشنایی) و (لەشکەرو تاریکیی) ، سەردارو لەشکەرو ڕۊشنایی نامېش (ئاهورامەزدا) ، سەردارو لەشکەرو تاریکیچ نامېش (ئەهریمەن) ەن.
(ئاهورامەزدا) یانی: سەروەری زانا، یان سەروەری ژیر، کە وەراوەرەن چەنی (العلی العلیم) ، زەردەشتیەکۍ ماچان ئاهورامەزدا ئینا سەری گرڎ چېوێوە، ئاگاش جە گرڎ چېوێن، هیچ چېوێ پېسە ئاڎیی نېیەن.
(ئەهریمەن) بە ماناو: ڕەمزو تېکدەری: مەردەی: تاریکی: پیسی: خراپی: دروۍ، سەرەمڕە چەنی ئاهورامەزدای ئینا جەنگەنە.
ئاهورامەزدا، کە خوڎاو خێرېن، شش یارمەتیدەرېش هەنۍ، کە نەمرېنۍ.
بەپاو ویروباوەڕو زەردەشتیەکا، پېسە ئاوێستانە نویسیان ئاهورامەزدا سەرەتا ڕوحەکېش خەلقۍ کەردېنۍ، پەی یەرۍ هەزار ساڵا حوکمش سەرەرە کەردېنۍ، ئینجا ئەهریمەن جەهانو تاریکیۆ ئامان پەی دلۍ جەهانو ڕۊشنایی، دماتەر ئاهورامەزدا جەهانی مادیش، بە شش قوناغۍ، بە یەرۍ هەزار ساڵۍ وەش کەردەن، پی تەرزە:
1.میدیۆزرم:چی قوناغەنە (ئاسمان، هەسارەکۍ، ڕاو کاکېشانی) ش وەش کەردېنۍ.
2.میدیۆشم:چی قوناغېنە ئاویش وەشە کەردېنە.
3.پیتی شهیم:چی قوناغېنە زەمینش وەش کەردەن.
4.ئەیاترم:چی قوناغېنە (دار و درەخت، گژوگیواو، سۊزایی) ش وەش کەردەن.
5.میدیارم:چی قوناغېنە بېجگە مروڤی، گردو گېیانداراش وەشۍ کەردېنۍ.
6.هەمسپدمدم: چی قوناغېنە (مروڤ) ش وەش کەردەن.
بەپاو (یەشتە کۊنەکا) دۆرەو ژیوای دواڼزە هەزار ساڵۍ بەردەوامەن، یەرە هەزار ساڵی ئەوەڵینەنە، هەر دوە جەهانو (ئاهورامەزدا و ئەهریمەن) ی جە حاڵەتو بېدەنگینە بیېنۍ، دمای ئا زەمەنەیە ئەهریمەن دلۍ دنیاو تاریکیۆ زیانەرە بە نېیازو ئانەی دنیاو ڕۊشنایی خاپوورە کەرۊن، ئاهورامەزدا جەنگێ نۊ هەزار ساڵیش چەنی کەردەن، چوونکووم ئاهورامەزدا هاگاڎارو گردو چېوەکا بېیەن، زانانش ئا جەنگە بە شکەستو جەهانو تاریکی کۊتاش مێ، ئەهریمەن جە تەرسېنە پەی یەرۍ هەزار ساڵا بە ئیفلیجی دلۍ تاریکینە مەنەنۆ، چا ماوەنە ئاهورامەزدا دەسش کەردەن بە درووسکەردەی دنیێ.[1]