نامۍ: حەمەجافر
نازنام: کەریمی
نامۊ تاتەی: حەمە ڕەشید
نامۊ ئەڎێ: ئایشۍ
ڕۊ پېڎابېیەی: #1_7_1320ک#
ڕۊ مەرڎەی: #27_4_1348ک#
یاگۊ پېڎابېیەی: #زاوەر_هۆرامان#
یاگۊ مەرڎەی: #ئورمییە#
$ژیۋاینامە$
لای هەڵۆی بەرزە فری بەرزە مژی
چۆن بژی شەرتە، نە وەک چەندە بژی
مامۊسا هەژار
مامۊسا حەمەجافری کەریمی جە ڕۊدیارو (1\7\1320ک) جە دەگاو (زاوەر) ی جە ئەڎای بېیەن، تاتەش حەمە ڕەشیڎ و ئەڎاش ئایشۍبېیېنە.
دەورانو سەرەتایی مەدرەسەیش تاکو کەڵاسوو پەنجی جە وانگاو (زاوەر) یەنە وانان، پەی درېژە دای بە وانای لوان پەی شارو (نودشە) ی و چاگە کەڵاسو ششیش تەمامنان.
جە ساڵو (1337ک) ی لوان پەی دانشسراو عەشایری ئیسلام ئابادی و ساڵێو چاگە دەورەش دېیەن و جە ساڵو (1338ک) ینە بېیەن بە مامۊسا. جە دەگایەکاو (زاوەر، کێمنە، هانەگەرمڵە و نوریاو) بە وانیارا دەرسش دان و خزمەتش کەردەن.جە پاڵو دەرس دایەنە خەریکو ڕوەش هەنگەری و فەعالیتی سیاسی بېیەن.هەوڵش دا جە هەر یاگێوەنەبۊ خەڵکی جە کارو بارو وەڵاتی و دەسەڵات دارە زاڵمەکا ڕژیمو شاهنشاهی ئاگاڎار کەرۊوە.
مامۊسا مروڤێ زەحمەت کېش، دڵسوز و خەمەوەرو خەڵکی بېیەن.لایەنگیرو هەژارا و بۍ دەسەڵاتا بېیەن.پەی کۊ کەردەی کەڵتور و فەرهەنگو هۆرامانی هەوڵش دان ، بەڵام بە داخەو ئەجەڵی مۆڵەت نەد٘ا تاکو هەرمانەکاش بە ئاکام یاونۊ.
چنی بڕېو جە هام ویر و هام فکرەکاش جە ساڵو 40 تاکو 47 موبارەزەو وېشا جە ناوچەو هۆرامانېیەنە دژو ڕژېمو شاهنشاهی دەس پەنە کەرا.
جە ئابانو (1347ک) جە دەگاو (نوریاو) ی ساواک دەسبەسەرش کەرۊ و بەرۊش پەی زیڼانو کرماشانی و چاگەیچ دماو ماوێوی ڕەوانەو تارانیش کەرا.بەینێوتەریچ ڕەوانەو زیڼانو جەلدیانو ئۆرومیەیش کەرا و چاگە پېشنیارش پەنە مڎا کە تۊبەنامە بنویسۊ تاکو قەنارەش نەڎا.بەڵام مامۊسا بە ورەی پۆڵایین و ویری بەرز ئینەیە قەبووڵ نمەکەرۊ و سەرو ویر و ئەندېشەو وېشەو پاشەگەز نمەبۊوە. جە ڕۊ16گۆڵان ( ئوردیبەهشت) ساڵو (1348ک) جە دادگایوی نمایشی بە قەنارە مەحکووم کریۊ و جە 27 گۆڵانی چنی دوۍ نەفەرا جە هامڕەزماش تیر ۋاران کریۊ و هەر جە جەلدیانو ئۆروومیەیەنە ئەسپەردەو خاکی کریۊ.
مامۊسا حەمە جافر جە ئاخر پەلەو قورئانێویەنە کەجە دەوران حەپسیەنە هام دەم و ڕەفیقو شەو ڕۊیش بېیەن، وەسیەت نامۍو پەی تاتەیش منویسۊ:
(تاتە گېیان تەقدیر پاسنەنە کوڕەکەت ئە پی جۊرە ژیوایش تەمامیو، هیچ ورکێوت نەبۊ، ئۊمېڎوارەنا ئەڎای ڕەحمینەم و واڵە و بڕاڵە ئازیزەکېم، ژەن و زاڕۊڵەکېم و ماباقی قەوم و کەس و کارۍ بەخشام و چەنەم بویەرا و گەرڎەنم ئازاڎ کەران.
جە تەمامو دۊسا و ڕەفېقا و ئاشنایا کە مەیا پەی فاتیحە وانای داوا کەرە گەردەنم ئازاڎ کەران.
ڕۊ جومعەی مزگیەنە جە خەڵکوو دەگاکېما داوا کەرە، گەردەنم ئازاڎ کەرا و دۊعاو خەیریم پەی کەران.
تاتە گېیان لاڵیەوتەو وەنە بلی پەی شار و دەگاکا (پاوەی، نەوسوڎە، نۊدشە، کێمنە، هانەگەرمڵە، نوریاو) ، گېڵی هەرکەس حەقش ئینا سەرمەو دەیشەو، یا حەڕاڵم کەرا. بە تەمامو خەڵکوو ئا شار و دەگایا واچە گەردەنم ئازاڎ کەران.[1]
نویستەی و کۊ کەردەیوە: ئاریا یوسفی