ب دەستووری خودێ
ھات چارشەمبووا ئەولی
دوڕ ب ڕەنگا خەملی
ئەڤ دنیا پێ دکەملی
***
ئێزدانێ مە ب رەحمانی
ھێڤێن ھاڤێتە بەحرێ و پێ مەیانی
دخانەک ژێ دەخنی
ھەفت تەبەق عەرد و عەزمان پێ نژنی
***
مەلک فەخرەدین وا دکرە رایە
ئەوی و ھەر چار برایە
ڤێکرا دکن تەبایە
دگۆت : عەزمان راوەستیا بوو ب دوعایە
***
ل دەستپێکێ خودێ دوڕەک ژ نووا خۆ ڤاڤارت .
پەدشێ من دوڕ ژ خۆ ڤاڤارە
دوڕ قەندیلە کەمالدارە
قەندیلێ نوور ستارە
***
پەدشێ من دوڕ ژێ بوو
حسناتەک ژێ چێ بوو
شاخا موحبەتێ لێ بوو
***
خودێ ھەفت ملیاکەت ژ نووا خۆ نژنین و ھندەک ساخلەتێن پەدشایی د بەر وان کرن . ملیاکەت د ھەر و ھەرن و ھەردەم د حزرەتا پەدشایدانە و ل ژێر فرواراوی کار دکەن ، ھەر ملیاکەتەکی کارەک پێ ھاتیە سپارتن و ب گۆرەی فەرمانا خودێ دایە وان ، ئەو ملیاکەت ژ دەر خودێ بۆ کەسەکی دی پەروەستە نەبن.
عزراییل، جبراییل ، میکاییل، دەرداییل
شمقاییل ، عەزازییل، ئسرافییل
ئەون ھەر ھەفت مەلەکێت کبیر
ژ بەری ئادەم ب چەندین بەدیل
ددستێ واندا مفتە و کلیل
دراوەستاینە ل حزرەتا مەلکێ جەلیل
***
پەدشێ من دنیا ئاڤاکر ژ دوڕا گەوھەرە
سبارتبوو ھەر ھەفت سورێت ھەر و ھەرە
تاووسی مەلەک کرە سەروەرە
***
پشتی چەندین بەدیلان ، خودێ و ملیاکەت پێک شێورین کو کنیاتێ ب ئافرینن .
پەدشایە و ھەر ھەفت سوڕێت خەولەنە
وێ رایەکێ د ناڤ خۆدا دکەنە
ئێقین دێ کنایاتەکێ ئاڤا کەنە
***
دەمێ خودێ مەزن دگەل ملیاکەتان شێوری و ڤیای کنیاتێ دورست بکەت ، دەنگ ل دوڕێ کر ئەو دوڕا ژ نوورا خۆ ڤاڤارتی ب رەنگا خەملی و دوڕێ خۆ ل بەر ساف و ھەیبەتا خودێ مەزن نەگرت و بژقی و ژ بژقینا دوڕێ ئاخ و ئاف و بای و ئاگر پەیدابوو.
کرە رکن و رکنی
دوڕ ژ ھەیبەتێ ھنجنی
تاقەت نەما ھەلگری
***
تاقەت نەما ل بەر ب سەبری
دوڕ ب رەنگا خەملی
سۆر بوو سپی بوو سەفری
***
ب پژیقینا دوڕێ کنیات پەیدابوو و بووە بەحرەکا بێ سەر و بن . ڤێجا پەدشا دگەل ملیاکەتان ل سەر وێ بەحرێ گەریان و دەست ب دانانا ھەر چار کنارێن کنیاتێ کرن ، پشتی دەمەکی عەرد نە مەیی ھەتا خودێ فروار دا لالش بھێتە خوار و کرە ھێڤێنێ عەردی و عەرد پێ مەیی و شینکاتی ل سەر پەیدا بوو :-
پەدشێ من ل مەرکەبێ دبوو سوارە
پەدشایە و ھەر ھەفت یارە
تێک سەیرین چار کنارە
ل لالشێ سەکنین گۆت ؛ ئەڤە حەق وارە
***
حەق وارە و سەکنین
پەدشێ من ھێڤێن ھاڤێتە بەحرێ و بەحر مەینین
دوخانەک ژێ دوخنی ھەر ھەفت عەسمان پێ نژنین
***
عەرد مابووی بەھتی
ب خدودەکی خەدتی
گۆ عەزیزێ من ؛ عەرد بێ وێ سوڕێ ناتەبتی
***
پشتی چل سالی ب ھژمارە
عەردی ب خۆ ڕا نەگرت حەشارە
ھەتا لالش د ناڤدا نە دھاتە خوارە
***
لالش کو دھاتە
ل عەردێ شین دبوو نەباتە
پێ زەینین چقاس کنیاتە
***
پەدشایێ من ل شەمبوویێ دانا ئەساسە
ل چارشەمبوویێ بڕی کراسە
ل ئینیێ کر خلاسە
***
پشتی عەرد و عەزمان ھاتینە ئافراندن خودێ مەزن ژ چار توخما : ئاخ ،ئاڤ بای ،و ئاگر ، قالبێ ئادەم نژنی.
خودایێ مەیی رەحمانی
چار قسم ل روویێ دنێ دانی
ئێک ئاڤە، ئێک بایە ،ئێک ئاخە ،و ئێک ئاگری
قالبێ ئادەم ژێ نژنی
***
ھەر وەسا د باوەریا مە ئێزدیاندا ل رۆژا شەمبوویێ قالبێ ئادەم دەستپێکرییە و ل رۆژا ئینیێ ب داوی ئینایە و رۆژا چارشەمبوویێ گیان دبەرکرییە.
ل شەمبوویێ دانا ئەساسە
ل ئینیێ کر خلاسە
پشتی ھەفت سەد سالە ھەفت سوڕ ھاتنە دۆران و کاسە
ل چارشەمبوویێ بڕی کراسە
***
ئانکو پشتی ھەفت سەد سالی ، ھەر ھەفت ملیاکەت ل دۆر قالبێ ئادەم جەمیان و ڤیان گیان ( روح) بچتە بەر ، بەلێ روح قاییل نەبوو و گۆت: بلا ل باوە خویابت ، ھەتا فروارا خودێ ژ منڕا نەئێت ئەز ناچمە د بەر قالبیدا.
پشتی ھەفت سەد سالە ، ھەفت سوڕ ھاتنە ھنداڤە
قالبێ ئادەم مابوو بێ گاڤە
گۆتنە روحێ : توو چمە ناچییە ناڤە ؟
***
روحێ گۆت : ل باوە ئاشقا مەعلوومە
ھەتا بۆمن ژ بانا نێن شاز و قدوومە
نیڤەکا روحێ و قالبێ ئادەم زۆر تخوومە
***
ڤێجا ل رۆژا چارشەمبوویێ ، پەدشا و ملیاکەت ھاتنە ھنداڤی قالبێ ئادەم و ل بەر دەنگێ شاز و قدووما « دەف و شەباب » سەما کێشان و خودێ کاسا ژیانێ ب سەر ڤەکر و گیان ل قالبێ ئادەم ئێوراند :
شاز و قدووم ھاتن و حدری
نوورا محبەتێ ھنگفتە سەری
روح ھات و ل قالبێ ئادەم ئێوری
***
یێ تەما خودێ یە.[1]