ڕۊ زوانی ئەڎایی پیروز بۊ
بێ گومان زوان نەتەنیا کەرەسەو پێوەنڎین، بەڵکوو بەشێوی گرینگ جە وێبیەو (ھویت) ئانزانین. ئانزان تاوۆ وەڵات و ئەڎا و تەنانەت خانەوادەیش بازۆ جیا، بەڵام ھەر یاگیەنەبۊ و پەی ھەر یاگیەتەری کە بلۆ، نمەتاۋۊ زوانی ئەڎاییش بازۆ جیا. ئانزانێو کە زوانی ئەڎاییش خاس فێر بیەبۆ و پا زوانە پەروەردە کریابۊ، ئیتر ئا زوانەبۊ بە ئامیانوو گرسای وێبېیەیش و کەس نمەتاۋۊ چەنەش جیا کەرۊوە. ئانزان ھەر بە زوانی ئەڎاییش وەرمەکاش وینۆ و چەنی وېش قسێ کەرۊ و ھەر پا زوانیە تاوۆ ھەست و سۊزی ڕاسینش بەروزۆ.
زوانی ئەڎایی ھەرپاسە بەشێوەن جە فەرھەنگوو ئانزانی و گرد زوانێوەیچ بەشێوەن جە سەروەتوو سامانی فەرھەنگی گردو مرۊڤایەتی. ھەر پیبۊنەوە و چی وینگەوە یونسکۆ قۆڵێش ھۆرماڵاینێ و ڕۊ 21 مانگەو فوریەیش پەی پارێزنای زوانی ئەڎایی تەرخان کەردەن و گرد ساڵێو بە چالاکیێ جۊراوجۊرێ مەینە مێڎان و داوا جە گرد ئانزانێو کەرۊ کە زوانەکەیش پېسەو مافێوی سەرەتایی وېش و پېسەو سەروەت و سامانېوی گەردوونی پارێزنۆ .
بێ گومان فۆتیای ھەر زوانێوە نە تەنیا پاشێل کەردەی مافە سەرەتایەکاو ئانزانین، بەڵکوو فۆتیای ویبېیەی قسەپەنەکەراو ئا زوانینە و ھەرپاسە فۆتیای بەشێوە جە سەروەت و سامانی فەرھەنگی مرۊفایەتین.
ئەر فۆتنای زوانێو بە ئەنقەس جە لاو لایەنێو یان دەسەڵاتێو ئەنجام دریۆ، بۍ ئی لاو ئۆ لا ئی کردەوە ملۆ چوارچېوەو تاوانەو ژێنۆسایدی زوانی. ژێنۆسایدی زوانی بەشێوەن جە ژێنۆسایدی بە گردی. ژێنۆسایدیچ گەورەتەرین تاوانەنە کە جە تارێخوو مرۊڤایەتیەنە وەرانوەروو کۊمەڵگاو مرۊڤایەتیەوە کریاێنە و بەپاو یاسا میادەوڵەتیەکا گەورەتەرین سەزایچش ئینا شۊنیوە.
ھەر چی وینگەوە ئېمەی ھەورامی زوانیچ مشۊ ھەست بە وەرپەرسی وەرانوەروو زوانەکەیماوە کەرمۍ و نازمێ چینەیە زیاتەر وزاش پەراوێزەو و بە خشکێ ڕاو فۆتیایش پەی وەشە کەرا.
موختار کەریمی.[1]