چی ڕۊمانەو (چنارە) ی، ڕۊمانێوە زاییفەنە؟
بەشۍ: چوارەمە
دوەم:
(ئەنوەر) هامساو یانەو پەروانەین و ساڵەهای ساڵا عاشقوو پەروانەین، پەروانە شوو کەرۊ و شوەکەش جە تەسادفێوەنە مرۊ و وڵکڵە هەتیم گنۆ. دماو چن ساڵا ئەنوەر و پەروانە کەین و بەین مەرزنارە و شۆنوو ماوێوەرە عاقیبەت یاوا بە هەنگەری و زەماوننە کەرا. نویسەر دایېمە بەحسوو وەشەویسی ئەنوەری پەی وڵکڵەی کەرۊ. ماچۊ فەرقش نەبۍ چەنوو زاڕۆڵەو وېش پەیش و ڕیک پېسە تاتێوە نازش کېشێ و ئێ دەورشرە.
سەرەڕاو ناڕەزایەتی حەلیمەی (ئەڎاو ئەنوەر)ی ئی وەشەویسیە درێژەش هەنو (پەروان)ێچ بە بېیەیو ئەنوەری هیچ وەخت هەست پانەی مەکەرۊ (وڵکڵە) بۍ تاتەن. وەختێ پەروانە دوەگېیانەنە بە زاڕڵەو ئەنوەریوە، ئەنوەر بە دەسو ڕژیموو پالەوی گیریۆ و کەراش زیننان. جە درێژەنە وەختێو پەروانە سەرو لەمموو زاڕۆڵەو ئەنوەریوە وېش و زاڕۆڵەکەش مرا، ئەنوەر جە زینناننە بە ژنیەی ئی خەبەری شێتبۊو و تەنانەت ماوێوە بەراش شێتخانەو زیننانی. ساڵانێوە فرە ویەرۆ و ئەنوەر چن زیننانێ فاڕاشۆ و سەرداری براش جار بە جار سەرش مدۆ وەنە و ملۆ مەلاقاتش. هەر سەردارا کە هەواڵوو کۆچی دماینو پەروانېش مدۆ پەنە. نویسەر هەمیشەی ماچۊ ئەنوەر شەوەکاو زیننانینە هۊشوو وېیەردەی کەرۊوە. هۊشوو وەشەویسەکېش کە پەروانێبۊ. هۊشوو وڵکڵەی. هۊشوو چنارەی و دنیاو ئا ڕواشە. بەڵام، وەختێ ئەنوەر زینناننە مزیۊرە و ملۊوە پەی چنارەی، دماو ئانەی ملۊوە یانە و سەردای زیارەتوو پەروانەی کەرۊ، تەنانەت پەی یەکجاریچ مەپەرسۆ ئەرۍ کۆن وڵکڵە؟ ئەر پەروانە مەردێنە ئەی وڵکڵە کۆن؟ کەسېوە کە دایېم نویسەر بەحسوو هەست و نەستوو ئەنوەری کەرۊ پەی ئا زاڕۆڵەی و پېسە کوڕو وېش زانۊش و ئیسەیچ چوون پەروانە مەردێنە، پېسە تەنیا یادگاروو پەروانەی مشۊم وەشەویسیەکەش ئاننە تەر زیاد بیەبۆ، پەی چېشی خەبەرش مەپەرسۆ و مەواچۆ چېشش سەر ئەمان؟ چی بەشوو ڕۊمانەکێنە پەرسای ئەنوەری پەی وڵکڵەی و گېڵای شۊنیشرە ئشیێ نۆقتە عەتفی دوەمین بیێ پەی ڕۊمانەو چنارەی. بەڵام ئینە وڵکڵەن کە دماتەر مێوە پەی دەگاو چنارەی و ئەنوەری وینۆوە. پا جۊرە کە نویسەر ماچۊ، وانەر یاوۆ پانەی:
ئەر وڵکڵە نەلێوە پەی چنارەی شۆنوو ئا گرد ساڵارە، ئەنوەر تاکو ئاخروو عەمریچش خەبەرېوە وڵکڵەی نەپەرسێ و پەیجۊرش نەبۍ.
خەساروو ئی بەشی ئانەن کە کاراکتەر پەی وانەری تووشوو دژایەتیبۊ و عاقیبەت بایسبۊ وانەر نەتاوۆ وېش بنیۆرە (هم ذات پنداری) یاگێو کەسەکا.
فەرشید ڕۊستەمی.[1]