ویرەوەریێو جە چن ساڵا چێوەڵی
نویستەی: #هەورامان ڕۆستەمی#
چن ساڵێ چی وەڵ چنی دڤێ ڕەفێقام لڤەیمێ تاکو شاروو سنە ی، دمۆ چن ڕوا نیشتەی چاگە گېڵەیمێڤە ڕو بە کرماشان، پاسە ئاما ڤەرەوە کە مشېیایا من ڕوانسەر وەسەیانېرە و جە ئاڎیشا جیا بوەڤەو و وېم تەنیا بلو پەی پاوەی.
کرۆ ماشینی ئاڤەختە پەی پاوەی (500) تمەنێ بێ، منیچ ڕېک حەر ئاڼەمە پنە بێ. کۆتا ڕا لوانێ ترمیناڵ و مڎیۆ ماشینەکە فەقەڎ یەک نەفەرش گەرەکا تاکو گنۆ ڕا، حەر دوورەوە منش دیا چڕام ڤنە ماچۊ پاوە؟ واتم: بەڵۍ، ئێتر نەخیاناش بلوو ڤەرەوە و کۆت ڕا و ئاما پێوەێمەوە.
مڎیۆ دوێ خانمێ و پیایوی پیر ئینەی دلێ ماشینەکەیەنە.
خانمەکا ئژناسێنێ و ئاوەختیچە من دانشجوو بێنێ و ئاڎېچێ دانشجوێ شاروو سنەی بێنێ.
سوار بېیاو دماو وەشوو تشی کەردەی چنی کناچەکا و ڕانندەکەی دلێ شارېونە تازە زیەیبێنمێرە، مڎیۆ ڕانندەکە دەسش کەرد بۊڵەبۊڵ و دژمانی دەی بە کابرێوی کە مسافرو پاوەی بېیەن و نامانشا چنی و فرە ماتڵێش کەردێنێ، ماچۊ: تمخوڎاا کاکە حۆسەڎ (700) تمەنێ چېشا پاسە ئا کابرایە ماتڵێ کەردیمێ!
واتم چی جەرەیان چېشا؟ ماچۊ: کۊرە دماوە نەفەرێو پانسەڎا و ڤەرەوە حۆسەڎ!
کابرا ناما و فرە ماتڵێش کەردیمێ.
یا ڕەسوڵەڵڵاچېشم قۆمیا ڤنە!
منیچ حەر پاسە کە واتم پانسەڎ تمەنێو و قرانێوم نەبۍ پنە و لا کناچەکاچەنە بە حیچ قیمەتێو حازر نېیەنا وېم ماڕوەوە و گرفتار بیەبێنێ خراب.
کاکە ڕاو بەینوو ڕوانسەرێ و پاوەی بیێبێ دوێ دەیەقێ! کێ سۆعالێم پەرسێنێ ڤنە دەربارۆ دانژگەی و من حەر پار مەرڎەبێننێ!
حەر نەزانێنێ چېش جواب مڎۆوە، مات بیەبێنێ.
خوڎا نیمۆ ڕەێنە ڤەزوەرە؟ مەکریۆ ئاڎ حەر زەڕەکەم چنە مسانۆ، بلوو پەی جوانڕۆی ئەیزەن مەکریۆ
گیرم کەردە بێ.تا چەمېم کەردېوە یاوەیمێ دووریسان.ڤەروو وېمەرە واتم ڕەنگا ئی کناچېچە تەماڎاڕێ با من زەڕەکۆ ئاڎیچاش دۆ!
دلێ ئی فکرانە بێنێ مدیۆ سەڎاو زیبوو زەنجیروو کیف و ساکی ژەنانەی مەی!کەڕم کەرد و دیەی دیێنێ پا دلێ شارېونە و وېم خڵافنابێم، حەر ئێنەمە زانا مڎیۆ گۊشێ زەڕی زیەیڤە پاڵو سەرەیمەنە، دماڤە کناچەکێ یوەشا دوێ هەزارێش دا دەسو ڕانندەکەی ماچۊ: کاک هۆرامانیچ حەسێب کەرە.
نا مەکریۆ کاکە، عەسڵەن.ڕېک مەگنۆ، وېم هێنەکۆ شمەێچ مڎۆ!
قسێ فرێ، هەێتا هەێتا دەس کەرېنێ کیسەمەره و پانسەڎەکەی چنی دوێ قاقەزا بەر ئارێنێ و نیێنېشاوە کیسەم.تا یۊ جە کناچەکا بە قەبرۆ تاتەیش قەسەمش وارد و ڕانندەکە ماچۊ تازە قەسەمش وارد و قەیڎش نېیا با جارێو خانمێ حەسێبش کەرا.
کاکە مەزانوو چەنی حاڵو وەزعۆ ئا وەختیمە پەێتا واچوو. خۆلاسە یاوەێمێ تڕمیناڵ و ئاڎێ ڤەسێرە و پیا پیرەکەێج کوچېۋ ئۆلاتەرەوە ڤەسەرە، منیچ نەکەردم نامەردی پانسەڎەکەم دا بە کابرەێ واتم دەربەس بەرەم تاکو (زمین شاری) .[1]