ناوی هۆنراوە: قەسیدەی ئاو
نووسەر: #حەمە ئەحمەد جاف#
خوڕەی ئاوێکی سوور دێتە بەر گوێم
کە گەرووی پڕە لە نۆتەی برین
هاژەی ئەو ئاوەی ، بووبە چیرۆکی
مێژووی وڵاتی حەسرەت و وەرین
٭٭٭
وەک گەردەلولی بروسکەو باران
لە مەملەکەتی بەفرو خوێنمەوە
بۆ وشکە ساڵی نیشتیمانی تۆ...
دێم و (قەسیدەی ئاو) دەخوێنمەوە!
٭٭٭
(ڕەمزی) بەخامەی گیرفانی باران
قەسیدەی مەرگی نووسی بۆ هەتاو
هاواروهاژەو هەڕەشەی شەپۆل
(دانەر)ی کردە سەرکۆماری ئاو
٭٭
(ئومێد) لەسەر ئاو ، ژیانی نووسیەوە
لە مەرگیش خەمی باوکی پیریەتی
(دایکی دانەر)یش، هەربە(ئاو) دەڵێ
(مەیبە) دانەرم وەختی شیریەتی!
٭٭٭
هاواری (نەبەز) ، (ڕەمزیە)ک لە پەند،
(مامەند)ێک ئەشکی شمشاڵی خنکاو
ناڵەو نزولەی (دایکی دانەر) یش
بۆ بێشکەو شووشە شیری بەجێماو
٭٭٭
ناخ.. نیشتیمانی سووتاوی خەندەو..
دەنگم شمشاڵی خنکاوی شوانێ
سینەم جێژوانی کەژاوەی مەرگ و
گەمەی بەر بێشکەی (دانەر)م کوانێ !؟
٭٭٭
دڵ،..بۆ ئازارتان هەر هەڵدەقرچێ
لە مەئوای زێدو واری ژینمەوە
بڵێی جارێ تر (ڕەمزی) لە پۆل و
(دانەر) لەمێزی تۆ ببینمەوە؟!
٭٭
لە نێو یەختێکا گیرم خواردووە
بێ ڕۆخ و مەرزی وڵاتی هەتاو
یەختێک،.. تارمایی و ترس دەخاتە
سەرلێوی خامە و چەمی چامەی چاو
٭٭
زامی نیشتیمان،.. کۆچی گەنجیی من
سروشتیش، جوانی جارانی ڕۆیی
ئاگر لەجەستەی خاکم بەربووەو..
کردوومیە،..قەقنەس شەوی بێ تۆیی!
٭٭٭
لەوەتی خاک وخۆمان ناسیوە
عەوداڵین بەدوای خەمی نانەوە
لەنێو بەرداشی ئەم و ئەو ، وەتەن
کەوتووینە سەمای مەرگ و مانەوە!
٭٭٭
ئەفسوس (نیشتیمان)،بەدەست ئەم و ئەو
لەعابە ئاسا باڵەو باڵ دەکا
حەسودی دەبەم بە(قەرەج) خاکی
تەسلیمی دەستی یەک ڕەشماڵ دەکا
٭٭٭
نیشتیمانێکی پڕ خەم و خاڵیی
بۆ دوژمن بۆتە خەزنەی زێڕو زیوو
دوژمنێک ، نووکی نەشتەری زوڵمی
خستۆتە بینی خاکێکی تەزیوو
٭٭٭
(زارا)شم لەسەر زمانی زگماک و ...
پیرۆزیی وشە و زاراوەی کوردی
لەناودەسڕێژی چەپڵەو خەندەوە
لافاوی جەهلی زیندانێک بردی
٭٭٭
پەتک و زیندانی تارو ڕقی ئاو
کورد ناخنکێنێ ، خەیاڵتان خاوە
وەک (بێکەس)فەرمووی: لە ڕێی ئازادی
(بەراتی نەجات بە خوێن نووسراوە)
٭٭٭
#دارەتوو# - #هەولێر#
کانونی دووەمی 2022
شەوی هەینی 2021-12-17
لافاوی دووەمی هەولێر
کە زیاتر ئەو شوێنانەی گرتەوە
( دارەتوو - ڕۆشنبیری - قوشتەپە - ژیان)
کەبوو بەهۆی گیان لەدەستانی 12 کەس و زیانێکی زۆری ماڵیی و گیانی. [1]
=KTML_Bold=ئەم بابەتە بە ڕینووسی سەرچاوەی ئاماژەپێکراو نووسراوە کوردیپێدیا بەهیچ شێوازێک دەستکاری نەکردووە=KTML_End=