یاڎەوەریەکېم
بەشو: هەشتەمی
من تەوەنینا
ساڵھای ساڵێن گەرما و سەردام چەشتەن. ڕۊ بېیەن جە گەرمانە وەخت بېیەن تاویەوە و سەردایچنە لەرزی گرتەنا و گەرەکم بېیەن ڕېزوورە دلێ کووچە و کۊڵانی و دەمودەسا. چن لاسامە و لاسارە تاوێم پڕنەینێوە. کەسم عاجز نەکەردەن، نەتۆرنانم ھیچ، پەشت و پەناو شاریاوییەکا، سەبرو ئارامی، تووڕەیی، گرژی و ئاڵۆزیی، چاشت و خوانە قورس و سووکەکاتان بییەنا. ئەورایی و تەژنەیی تان گلم دانوە. تووڕەیی تان شارتەنمەوە. شەرم و حەیا و خېیاڵ و ئامێزێ و باوەشێ وەشێتان. گەرمیی و نەرمیی و دەنگ و ڕەنگ و جەستەی شیرینێ و ناشیرینێتان و وەشەسیاویتان، شارتەنمەوە.
فرەوەخت کەسی پەنە نەزانەیندێ و ئاگادارێ نەبېیێبیدێ ئی سفەتە بەرزو بۍ وێنەمان بییەن.ڕەنگەن ئیسەیچە کەس نەزانۆنە و کەس نەشناسۆنەش. حەسارێوە میاچەما گرژ و ڕەنگ و ڕوو ڕفتە بییەنان، بەڵام شیرین و قورس و پتەو. ئیسە پەرت و پەراوێز کریانا. لاشەم بېیەن بە وېرانە یاگێ. بېیەن بە میاچەمایېوە گرژتەر جە جارانی و شپرزتەر، تۆفان زەدېوە فڕڕەدریا و ئاوارە! جەستەم بېیەن بە یاگێ جڕووجانەوەریی و کەکوومۆریانەی. بېیەن بە یاگە تێڕەو یاگە سمۊرە و مار و مزووکیی! من ئەر یاگە تەوەنوو وېمنە بوونە و سرووشتەنە ھورنەکنیابوونە و دەمو تاشییەوە نەکەنەبووشانوە؛ میاچەمامرە تافێ تەقێنێوە و گرمەشان ئەی ئاوی ڕەمەڕەمالێش بێنە. ڕۊخانەنە بییەبوونە ھەناسەم نەڎان تاکو ئەرخەوانە سوورەو وەھاریی مدرابۊوە و جە وەحشیی گەریی کۆتەبۊنە. ئەریچ پاکڵەو پردێ بییەبوونە تاکوو ئاوێ نەبەردەبوو، یان نەتاوبۊنەش وڕنۆمرە، چنگەم ئەو ئاسمانیوە بېیەن و ڕاو ڕاوېیارام وەشەکەردێنە .
ئیسە کە من نەمەنەنان و قاڵم بڕیانەوە و ئاوارەو کووچەو کۊڵانە چۆڵ و ھۆڵەکاشان کەدەبوونە و فڕڕەشا دابوونە و جە لاشەو دیوارەنازارەکاو ئۊسا دەس ڕەنگینەکام دوورشان وستەبوە، نە کڵوو پردێ مەنەن و نە دیمەکوو داراو نەدار و پۆو دارەڕاو پردێ. دارەڕاکێ کەوتێنېرە و شپرزتەر جە لاشەو کەلاکی کرما دانەنە و پرتووکیان. دیمەکوو دیوارا ڕېزیانەرە و لار و لوېر کەوتەن. پاسنەشان پەنە ئامان کەس نمەوینۊشان و کەس نمەدۊنۊشان و نمەدیۆ پەیشان! یاڎگارییەکاشان مەنەنوە و ئێش و ئازارە و ڕۊحی نەپېچیاوەی و یاگە دەسەو ئۊسایا و بۍ دەنگیی شا و کەلاوەکۆنەشان.
بورهان ئەختەر.[1]