قۊناغەو هەرزەکاریم
بەشۍ: چوارەمە
چا سەروبەنیچەنە دوکتۆر سەباح (کونە هامکلاسمو ڕەفیقو گەڕەکەو ئۆلای)ما، کە ئا وەختە تەلەبەو یەکی پزشکی بیەبۍ جە ئێران، سەرو ئەفکاری چەپیش جە ڕژیمو تازەو خومێنی ڕەمابۍ و ئاماوە هەڵەبجە. دوەبارە برادەریما دەسش پەنە کەردۆ، بەڵام ئی جارە بە گوڕو تینێ تەرۆ. ئاڎ فرە چەپ بۍو منیچ (خشیوم) چەنە بی. کە ئاماوە بیجگە کتېبی پزیشکیی تەعدادیوی فرە ئەدەبېیاتی سیاسییو پیسەو کتیبو (کەپیتاڵو مارکسی) و ڕۊمانە چەپەکاو گۆرکی و چیخۆفی و تۆلستۆی و ڤیکتۆر هوگۆیو و حەرەکەتو جیڤارایش ئاردېبینێ. منیچ کە مەکتەبم تەمامنابۍو بەتاڵ و حەتاڵ گېڵېنۍ، فرەو جارا یانەنە یان بە پیاسە پێ عەنەبی کۊنۍ یام جەریڵەی ئا کتیبا وانېنمێ، من کە فارسی نەزانېنۍ سەباح پێم شەرحە دۍ. سەرگەرمیوی فرە وەشو موفید بۍ. زیاتەر وەشم ئێ جە ڕومانەکاو (مادر، دانشگدهای من، سی ڕفیق، چ گونە فولاد ئابدید میشود، لب خند، نانو شەراب، شیعرەکی خیامی کە فرېشا وەرېم کەردېبېنۍ.
ڕاسیەکەش من زیاتەر ئەدەبېیاتەکەشا، هونەرو زەرافەتو تەرحو نویستەکاشاو ومتەرەی وەسفو سەحنەکاشا سەرنجېم کېشېنۍ تاکو هەدەفو ویر و باوەڕەکېشا. حەر ڕاڕا بېنۍ حەتا وېم هەشتاکانە ئامانۍ ئۆروپاو بەچەمۍ وېم وەزع و گوزەرانو ئا وڵاتە کۊمۆنیستاو ئۆروپای شەرقیمە دی، ئیجا پێم بەرکۆت بەڕاسی دەنگو دەهۆڵی دورۆ وەشا.
جەنگو میانو (عێراق و ئێران)ی توولش کېشت، جەلبو عەسکەری منیچ ئاماو، فکرو لوای پێ ئێرانیم دوەبارە گەش بیۆ.
چەنی ئەڎێم و کاک شەریفی تەگبیر کریاو ئیزنم چەنە هۊر گېرتۍ. مانگەو ششو (1981ز) لوانۍ پەی شانەڎەری پەی یانەو مەتی مینێم کە چاگۆ ئەر کریۊ بە قاچاخی وزام پۆڎیمەرە.
مەتی مینێم ۋستا گەلو خاڵۆ مینە بەگی، چنارەرەو سورێنەرە پێ دەگاو وێسەی، یانەو خاتوو کافیەی واڵۍ لالو کەریم بەگی و خېزانو شەریف بەگی. چەنی خاڵۆ مینەی کە ئەجۍ شمقاڕا پا سەرەکویایەنەو دلۍ ئا دارستانە نەژاکیاو چڕڕاو حدودیەرە دېر ویرەگانێو یاوایمۍ وێسە، یەکەم دەگاو کوردستان و ئێرانی پەشتەو کەشو سورێنېوە. دماو خێر ئامای و وەش ئامای و خزمەتی عال، پەی ساحبیش جە خاڵۆ مینەیو ساحیب یانەی خوڎا حافیزیم کەردو وستاشا گەلو مەرحوم کاک ماجدی، گەنجېوی فرە عال، کوڕە تاقانەو خاڵۆ شەریف بەگی بۍ جە ژەنە گولانەکېش. کە (فرە بەداخۆ ئانە دیڎاری ئەوەڵو ئاخر بۍ، حەر زوو بە حادیسەو مینی فۆتش کەرد) . چەنی کاک ماجدی سواری تراکتۆری بېیەیمۍ، پا ڕا پېچ و خەمو تەپو توزیەنە یەواش یەواش سەرەما مەریوان بەر ئاورد. یانەو کاک شۆکەتیما ئېستۆ. خاس ویرما وېش سەرو زیارەتو مەرحوم کاک مەژنوون تەوېڵەیۆ بۍ کە چەنی جەمېو تەری شەهیڎۍ بیېبېنۍ.
جەنگو کۊمەڵەی و حکومەتو ئێرانی گەرمەش بۍ، جادەو بێنو مەریوانی و سنەی گېریابۍ، زاڕوڵەکی کاک حەمەڕەشیڎی تاریق و لهۆن بە سەردای ئامێبېنۍ پەی مەریوانی، یانەو کاک شۆکەتی بېنۍ. ۋەرو ئانەیە زەڕەکەم نەفۆتیو میقدارېوش لا کابرێوی ڕەفیقو کاک شۆکەتیۆ نیارە، کە دوکانو شوشەو وەسائیلو دلۍ یانەیش بۍ، کە تاکو من ئیحتیاجم پەنەش نېیا ئاڎ کاسپیش پەنە کەرۊ، بەعزیوچش هۊرم گېرت پەی خەرجی وېم.
ماوېوی مەریوان بېنۍ، دماتەر بە قاچاخە ڕارە، تاریق و لهونم چەنی وېم ئاردۍ پەی سنەی، چاگەیچۆ پەی کرماشانی.
ماوەو ساڵېوی زیاتەری چاگە بێنۍ ئیسەر و ئۆسەرو مەریوانیو پاوەی کەرېنۍو بەعزێ قۆمو ڕەفیقی عالېم پیڎا کەردۍو ئەژناسێ، بەڵام بی سەرگەرمییەنە وەزعەم وېش نەبۍ. گەرەکم بۍ بوو بە ماموساو ئیگلیزی، کیاستانېشا پەی مەکتەبېوی، دیم پاسدارېوی فارس ئاما، کەتەلۆگو قابلەمېوی بوخاریش بە ئینگلیزی نیان بنەو دەسیش، نیاش وەرو دەمیمو ماچو ئانەیە کەرە بە فارسی پێم، منیچ نە فارسی مزانو نە ئا ئیگلیزیچە، کوچېو مڵینگە مڵینگم کەرد، ماچو دەستی شما دەرد نەکونە، ئیتر ئانەبۍ کە دیمۆ.
فاروق سان ئەحمەد.[1]