سەفەری خەو...
دونیا کپ و مات چرا خامۆشە
چاوگەلم قەتیس حاڵم پەرۆشە
ئەستێرە میوان تاریکی شەوە
سرتە و جریوەی لایلایەی خەوە
نیگار و نازی پڕ لە ڕەمز و ڕاز
شەمەندەفەری خەیاڵ دەکا ساز
هاوسەفەر ڕۆح و دڵی بیمارم
ناکامی ئەشق و ژینی خومارم
ڕێبواری ماندووی کەویری بێ ئاو
هەمووی سەرابە و دەسووتێ هەناو
چرکەی کاتژمێر هاوڕێی شەوانم
خەو لە سەفەرە وەپەی دەرمانم
بەستویە پەیمان لەگەڵ بای شەماڵ
بڕواتە حزوور یاری خۆش خەیاڵ
بزڕێنێ خەوی، بیکات ئاگادار
لە شەونخوونی دڵی پڕئازار
بەڵکوو بۆم بێنێ باوەشی گەرمی
مژینی شیلەی لێوی پڕشەرمی
تێرتێر بڕوانم لە چاوی مەستی
سەرخۆشم بکا لە بۆن و هەستی
سەر دانێم لەسەر سینەی چیمەنی
یاریی نێو پەنجان جوانی دیمەنی
یەک بلاوێنین بە شیعر و ئاواز
ئەو بە ئەشقبازیی، من بە مەکر و ناز
لە یەک بئاڵێین وەک جووتێ ڕەشمار
دوور لە کردەوەی ژینی پڕقومار
ئیحساس و شادی و گەنجی میوانە
حەسرەت و ئاﮪ و ڕازی شەوانە
هەمووی دەبێتە بێ خەوی و خەیاڵ
خەزانی جوانیی بزەی لێوی ئاڵ
#12-03-2018#
دیوانی #پێکەنین بەتامی گریان#
هۆزانەوان #نەسرین تەنیا#
[1]