مامۊسا گیان چڼم پەی منیەیرە
گیڵناوە، ماموسایێ دەرسو ڕەسمی بە تەلەبەکا ماچۊوە،
دوۍ ڕوېش مەنۆ پەی وەهاری، ملۆ پول
ماچۊ: گۊشگېردێ تەلەبە زیرەکەکا، دوێ ڕوېش مەنەن پەی وەهاری، وېتا زاندێ ئێساڵ تەڕوتوشی بێ وەهارێ وەشبۊ ئینشائەڵا، دەرو دەشت وېش ڕازنۆوەو، کەشو کۆو کەمەرەکێ وېشا مڎا تەدارەک، حەتمین شمەیچ ئی وەهارە ملدۍ دەرو دەشت، ئاگاتا جە گۆڕاڵەکاو وەهاریبۊو، پاشێلێشا مەکەردېو، مەکەردێشا باقە، وە عەزیەتو هیچ پەلەوەرێچ نەڎەیدېو هیچ گژوگیواوێ ڕیشەنە بەرناردېو جوانە مەرگش نەکەردێ، واچدێچ بە قەومو ئەقرەبایو کەسوکاریچتا واز جە گرد نۆعە ڕاوێ بارا، چوون تەبێعەتو ئی کەشو کۆیە ئەپینیشاوە زەریفا، پەی دماو تەحتیلو وەهاریو کە دەوام کریاوە، هەر یۆتا ڕەسمێ وەهاری کېشۆنەو، بە‌ڕەنگ کریایی باردێش پەی مەکتەبی.
دماو ئانەی کە دەوام کریۊوە عەیێزەن مامۊسا ملۊوە سنفەکەو پەی دایۆ دەرسەکەیش، تەماشەو ڕەسمەکاو گردی کەرۊ، هەر ڕەسمێ بە عەڼازەو زەریفیش دەرەجێش پەی منیۊرە، تەماشەو ڕەسمو کناچڵێوە کەرۊ، هەتتا حەز کەرۊ ڕەسمێ عال و زەریفش کېشتەن، کە وردبۊوە مڎیۊ ڕۊجیارەکەش بە قەڵەم ڕەساس ڕەنگ کەردەنو، جیای زەردی سیاوش کەردەن، معەلیمەکە ماچۊ: عالێ گیان ئانە چی ڕەنگو ڕۊجیاریت سیاو کەردەن؟
تەلەبە کناچڵەکێچ کەرۊوە جوابو ماچۊ: کەمدەسێنمێو تاتەم هەرمانبەری کەرۊ، پەوچی بە سیاوی ڕەنگم کەرد، واتم با وەرو ڕۊجیاری گېرونەو تینیش نەڎۆ تاتەیمو گەرمش نەبۊ، مامۊسا گېیان چڼم پەی منیەیرەی؟
مامۊسایچ: ژیرێ گیان ئی ڕەسمو تۊ دەرەجێ مەتاوا حەقش بڎا.
عەفان دەرەمەڕی.[1]