ئاسکێوە دلیٛو تەویلەو هەرانە
هورگیٛڵنای: #ئیبراهیم میکە عەلی#
بەشۍ دوەمە
هەرێوشا هەکە جە گردی زلتەربیٛ و سنعەش چەویشا فرەتەرەبیٛ و چەمو ئەویشای تەرینە کوچێ فامیڎەتەربیٛ ڕوەش کەردە هەرەکاو واتش: ئاخر ئاڎە توخمو ئیٛمە نیەنە و چیٛگەنە و دلیٛ ئیٛمەنە ویٛش بە غەریب مزانوٛنە، چوون زاڕوٛڵیٛ و گولانیٛچەنە گیٛرە چەنەما تەرسوٛ، نمەبوٛ ئیٛمەیچ فرەتەر ناڕەحەتەش کەرمیٛ، هەرچی بوٛ میٛمانەمانە و ئەشوٛ سەرو ویٛ بیمیٛ و کردێ نەکەرمیٛ یاسە بوٛ چەنەما و چانەی فرەتەر تەرسی نیشوٛ وەرش.
هەرەکیٛ گرد قسیٛ ئا هەرەیشا لاوە پەسەندیٛ بیٛنیٛ و ئارامیٛ بییٛوە.
وڵاخە فامیدەکە لوا وەرۆ پەیلاو ئاسکەکیٛ و ڕوەشکەردەنە و واتش: بوٛ ڕوٛڵەگیان... بوٛ لاو ویٛم و دلیٛ ئاخوڕەکیٛ ویٛچمەنە ئاڵف بوەرە، بڎیە سمەرەکیٛ چنڎ ناسکیٛ و وەشیٛنیٛ، زەردیٛ و زەهاڵیٛ ئەجوٛ زەعفەرانا، دشتیٛ پیٛسەو گەڵاو درەختا، نەرم و شلیٛ پیٛسەو یونجە تەڕا، شیرینیٛ پیٛسەو توٛکڵ شوٛتیا، هیچ نەتەرسی گیان، کەس کارش نیا سەرو توٛوە، بوٛ لەوەڕەکەیت بوەرە.
ئاسکەکیٛچ وات: سپاس پەی نەجابەتی و دڵسوٛزیت قوربان، وەلێم من سمەری نمەوەروو، زاڕوٛڵیٛچ نیەنا، هەرچنڎ کەم تەمەن مرمانوونە و قەد و باڵام گولانەن وەلێم من بەشو ویٛم عومرم هەن و یاوێنا پەنە، ئەگەر ئاسکی نەبیێنیٛ پیٛسەو پیرە ژەنێوە ئەرمانیٛنیٛ.
وڵاخەکیٛ گرد پیٛوەرە سەڕە سەڕ دەسشا کەرد خوای بە قسا ئاسکەکیٛ.
دمای ئانەی یوٛیشا وات: خاسا زاڕوٛڵیٛ نیەنی و پیرەنی... ئادەی پیرە ئاسک بوٛ لاو ویٛم یەویٛ بوەرە.
دیسانۆ گردو هەرەکا سەڕەسەڕ دەسشا کەردۆ خووە.
ئاسکەکیٛ واتشۆ: من هیچ نمەوەروونە و هیچم گەرەک نیا، سمەر و یەو پەی شمە عالیٛنیٛ هەکە خڎیٛتا دێنە واردەیشا، دڎانیٛ من دەردەو یەو و سمەری نمەوەرا، بازدیٛ با بە دەردەو ویٛمۆ ساکیەورە.
هەرێ تەریشا وات: ئاها... حاڵیم بی ئی پیریٛ دڎانیٛش نیەنیٛ، بەڎبەختو ویٛت پیرەی بیٛچاریٛ، خاسا توٛ پا کەش و کوۆ چیٛش وەریٛنی؟ بە ۋا ژیویٛنیٛ یام کەسێ چاشتیت پەی نیۍ سەر؟
دیسانۆ پرمە پرمو سەڕە سەڕو هەرەکا بەرز بیۆ و دەسشا کەردۆ خوای.
ئاسکەکیٛ وات: بەخشدیٛم چینەی زیاتەر سەرە مەنیەیدیٛ سەرم، شمە نمەزاندیٛ من چیٛگەنە خجڵا خنیکیای خنیکیەو، یاگیٛ من تەویلەو هەرا نیا، مەرامم ئانەنیا سوکایەتی بکەرو بە شمە، وەلێم گردما مزانمیٛ هەر هەرا و وڵاخ وڵاخا و ئاسکیچ ئاسکینە، هەریوشا و بە تەشکێوە درووس کەردەن، من هەمیشە دلیٛ کەش و کوٛی سەوزیرە گیٛڵێنا و لەوەڕی سەوز و ناسکم واردەن، سەرنجە دەیدیٛ، من گوناحێم نیا.
یوٛ جە هەرەکا وات: خاسا جەماعەت... ئیٛنڎە ڕووەتا داپەنە تا ڕووەش کریاوە و دەسش کەرد دەم دریٛژیی و قسیٛ قوٛڕیٛ. خجڵا چیٛگەنە خنیکیای خنیکیۊ، کەش و کوٛی سەوز و لەوەڕی سەوز و ئی قساکەروٛ، هەتا یاوا ئانەی واچوٛ: ئاسکی هەر و وڵاخ نیا، بەڎبەختیٛ ئی سمەر و یەوە عالەشە بەدڵیٛ نیەنیٛ و داواو لەوەڕی سەوزیما وەنەکەروٛ. کورە ئەسڵەن ویٛت نەفامەنی، ڕووەش کەردە هەرەکا و واتش: کورە ویٛڵەش کەردیٛ با ئاوراییٛ بمرۊ.
ئاسکەکیٛ وات: دەی منیچ هەر ئانەمە گەرەکا، وازم باردیٛ چەنە و چینەی زیاتەر دڵم مەسوٛچندیٛ.
ئاسکەکیٛ فرە خەمبارە بییٛبیٛ و نەزانیٛ چیٛش کەروٛ خاسا، دڵش پەڕ بیەبیٛ و چەمیٛش پەڕیٛ بییٛبیٛنیٛ هەرسی، ویریٛ کەریٛوە و وەرو ویٛشەرە واچیٛ: وەشڵەی کابرای ڕاوچی فڕەشدێبێنیٛ دلیٛ چاڵێوە و نەکیانێنیٛش پەی ئی تەویلەیە، هەچ جوٛرە ژیوایێوەتەر خاستەر و وەشتەرا هەتا ژیوای چەنی ئی ناکەسبەچە نەفام و نەزانا.
ئا هەرە هەکە ژیر و دلیٛ هەرەکا بیٛ، وەختێ هەرسەکیٛ ئاسکەکیٛش دییٛ چڕوچەمشۆ، بەزەیش سیاوە پوٛرە و لوا لاشۆ و واتش: وەشڵیٛ گیان بڎیە پەیم، مەگرەوە چوون گرەوە هیچ دەردێوە دەرمان نمەکەروٛ، خەم و خەفەت واردەی و لوک ئاستەیرەیچ هیچ کەلکێوەشا نیا، قەڎیمیا واتەن بخووە دەمو دنێوە هەتا دنیا بخووٛ دەمتۆ، بڎیە پەی ئیٛمە خوٛمێ و هەرگیز مەگرەومیٛ، ئەگەر واچی ئیٛمەیچ پیٛسەو توٛ توڕیٛنمیٛ چی ژیوایە و ناڕازییٛنمیٛ چەنەش، وەلێم باوڕ کەرە ئی سمەریٛ فرە لەزەتییٛنیٛ، ئەگەر تویچ سمەر و یەویٛ بوەری تویچ پیٛسەو ئیٛمە زلە بی و بی بە ئاژەڵێوە پەنەیاوا و پەی ویٛت مژیوی، وەلێم ئەگەر هەر لەوەڕی سەوزیچت گەرەکا ئانەیچ کریوٛ، من هەوڵیٛ مڎەو هەرچی لەوەڕی سەوز هەن دلیٛ سمەرەکا ئیٛمەنە جیاش بکەروە و دەوت پەنە.
ئاسکەکیٛ هەکە حاڵیە بییٛبیٛ هەرەکیٛ مەیاواشەنە، بیٛتاقەتە بیٛ و نەزانیٛ چیٛش جواو بڎوٛوە.
چا وەختەنە هەرێوشا کونجێوی تەویلەکەیۆ سەڕناش و بە لاقرتییٛوە واتش: ئاها... بەیدیٛ تاڵێ لەوەڕی سەوزم دیۆ، جەماعەت هەرکەس لەوەڕی سەوزش پیٛڎا کەرد بنیوٛش کەنارۆ پەی ئا ئاسکە نازاریٛ، ئەگەر تالبیٛ خەیر و خاسەیندیٛ، لەوەڕە سەوزەکا دەیدیٛ پا ئاسکیٛ، تاوەو گرەوەکەیشەنە خجڵا دڵم پەیش بریٛژیوٛ، ناسدیٛ ئا داماگیٛ گرەووٛ، خوڎا قبڵوش نیا.
ئاسکەکیٛ ڕووەش کەردە ئا هەریە و پەیواچو قسەکاشەنە واتش: پەنەواز نیا دڵو ویٛت تەنگ کەری و خەمو من بوەری، خەم واردەیەکەیچت هەر هەرانە و نەفامانەن، خوٛ من گەڎا و سواڵکەرە نیەنا هەتا خەیرەم پەنە کەردیٛ و چیٛوێوەم دەیدیٛ پەنە، گەڎا شمەندیٛ نمەتاودیٛ من بشناسدیٛ و بیاودیٛمەنە هەکە من ئاسکینا و شمەیچ هەریٛ و وڵاخیٛندیٛ[1].