قەڵاڕۊچن
بەشۍ یەکەمە
چن ڕوؽ جە مانگەو هامنی لوابؽ، دنیا گەرمش کەرڎەبؽ، دەگایچ فرە ئاوەﮆانەنە، حەریۋ مەشغوڵو هەرمانوکارو وؽشا، مەکتەبیچ تەمامیان، وەلؽ ئا تەلەبؽ هەکە بەکەلۆریشاهەن، بە تایبە یەرؽ متوەسیتەی تازە خەریکؽ ئیمتحانی بؽنؽ، گەنمؽ درونؽنؽ و گزرەیچ کۆیان..
جە زەمانو منەنە کاتؽ من عومرم (9-12) ساڵانی بؽ، هەم خەلە، هەم گزرەیچم بە گاوؽ (گاوهیت)، نۆبەنؽ، هەم بە هەرو هەسەرم چەم پەنەکەوتەن هەکە گەنمؽ و یەوؽ وگزرەو دڕەی قنگەراشا پەنە کوؽنؽ.
ئیتر دماتەریچ عانؽ مەکینە (تراکتۋری عنتر حەوتا و حەوتاویۋ) ئامؽ دەگاو پؽڎؽ بیؽ، ئیتر کوای بە (گاو هەرو هەسەر) کەمتەر بییۋ، بە چؽوؽتەر (ئالەتؽ) تەر گەنمؽ و خەلەو گزرە کوؽنؽ، پەنەش واچؽنؽ (چان) حەر مەکینە و تراکتۋر کؽشؽش شۆنەو وؽشەرە (دوؽ ئاسنؽ گەورؽ پەڕ تەوەرؽشا جە ئاسنی پەی دروسکەرڎەبؽ سەرشا بە تەختە پۋژیابؽرە، مەکینەکە خولنؽشۋ (سوڕنؽشۋ) سەرو گەنم و گزرەکەیرە قەﮆی سەعاتؽ کەم یام زیاﮆ تەمامنؽشا، (کوؽشا) هەرمانەکؽ فرە ئاسانتەرە بیؽبؽ.
دماو بارکەرڎەیچما (1978ز.)، ئالەتؽ تەرؽ فرؽ بیؽ و ئامؽ ڕوەوکاری، ئیتر هەم گەنمؽو یەوؽ بە دەڕاسە درونیؽنؽ. گەنمەکا بەجیاو قاشاخەکەیچشا ( سرووتەکەشا بە جیا نیؽرە، هەم بەمەکینە ئالەتؽ تەر وەڵکەوتە جە چانەکەی پؽڎا بی ئاﮆیچ هەم پەی کوای گەنم و یەوؽ وگزرەو نوەی بەکار ئؽ، ئی نەوعشا دلؽ خەرمانەکەینە مردؽ نە سوڕؽوە پؽسە چانەکەی، ئؽڎ گەنمو گزرەو نوەیەکەش دؽنؽ دەمۆ، کەرؽنؽش دلؽ، پەنەش واچؽنمؽ (قازانە/ هەباشە)،
ئیتر گەنمؽ و گزرەو نوەی کەرؽنمؽ دلؽ هەباشەکەیرە، پەیما کوؽ و نوەیەکایچ کوؽو جیاشا کەرؽوە، دماتەر سەرو خەرمانەکەیۋ بە مەکینە و سەیارە ئارؽنمؽشاوە پەی یانەی.
فرە لوایمؽ، با بەیمؽوە سەرو ئەسڵو مەسەلەکؽ و باسو بابەتەکەما، یانەو بابایم هەم سمەریشا بؽنؽ هەم گزرەیچ،
جە دەرە دڵشاﮆو چنازەرکؽ (وەردەگا)، وؽتا زاندؽ منیچ کوڕؽ زیتەڵ، یانەو بابایچم (تاتەو ئەﮆؽم) وەروؽڕکشا چا عومرەنە نەبؽ گرﮆ هەرزەکارؽ بؽنؽ، من وەردەسشانە خزمەتکاریشا کەرؽنؽ بە ئیسەیچۋ، ئای چن وەشؽم گەرەکؽ بؽنی (بابام و مامام و لالوام)، ئەڵبەﮆ ئاﮆؽچؽ منشا وەشگەرەک بؽنؽ.
جا دیسان من مەرگانیمەنە..ئادەی کوڕو بابایش چەنی لالوەکات لۋدؽ ئا سمەرو گزرەیە باردؽوە هەکە پەرؽوەن کوؽنؽما، جە دەرەدڵشاﮆ و جە چنازەرکؽ (وەردەگا)، بە هەرو هەسەرەکەی باردؽوە.
ئؽمە چوون کەمتەر کشتوکیار کەرؽنمؽ، باخما بؽ، باخو یانەو بابایم (تاتەوتاتەیم)، هەم تاتەیچم خەیات بؽ، فرە هەرمانؽ قورسؽما پەنە نەکەرؽ، ئیتر هەرمانوکاری چانەما نەبؽ، ئیتر مەجبور من یارڎی یانەو بابایم دؽنؽ، دەوروبەرو یانەو بابایمەنە نەماشیؽنؽوە..
ئانەبؽ منیچ واتم خاس بابا گېیان سەروچەما هەروهەسەر حازر کەرؽنمؽ، ئەر نەبؽنؽچما یانە هامسایەکەو یانەو بابایم بە (دەسەوام) ئارؽنمؽ، دماتەریچ هەم لالوؽم و هەم وڵاخەکؽچ لوؽنمؽوە دەسەوام، ئیتر هەرمانوکارو دەگؽ گرﮆ هامکاریو یارڎیدای یۆترینی بؽ، ئیتر ژیواؽ برایانەو هامماڵانەو هامیانانە بەرؽنمؽ سەر، کەس پەی هەرمانؽ قورسؽ دنیاش وەنە نؽوە یۆ، گرڎما پؽسەو یوە یانەو یوە عەڼام و خانەواﮆؽوە گرﮆ دەسبارو یۆترینی دؽنمؽ بەتایبە هەرمانە قورسو سەنگینەکا.
دکتور هیدایەت گوڵپی.[1]