زەرێ و فەخری ڕازی
بەشەی یەرەمە
عەباس واتش: مەڵڵا تۊ مشۊم قەسەم بوەری کە فەخری ڕازی شاعێر بېیەن و چن ساڵېچەن مەردەن.
مەڵڵا واتش: بە خوڎا، بە پیر بە پەێغەممەر، بە قورعان قەسەم فەخری ڕازی شاعێر بېیەن و مۆفەسێروو قورعانی سەڎ ساڵې چیوەڵی فەوتش کەرڎەن.
عەباس واتش: درۆ مڎەی.
مەڵڵای واتش: پەی چێ درۆی بڎەو؟
عەباس واتش: بۊنەو ئانەیوە سەرو عەباسی قەسەمت نەوارد، قەسەمت سەرو خوڎای وارد.
مەڵڵای واتش: یەرێ جارێ سەرو دەسی بڕیاو عەباسی قەسەم ئا فەخری ڕازیە هەکە تۊ هەڕەشێش سەر کەری و گەرەکتەن ونیش مجی، چن سەڎ ساڵېن فوتیان و لاشەش پوویان. ئیسە شمەیچ دوە برا هۆربئێزدێ یانەنە لویدێ بەر، کاری وزدێ دەسو ژەنا تا چارەسەرش کەرا.
ڕەسووڵی واتش ملوە پەی دەگای، بەڵام ئەر بزانوو ئی مەلعوونێتا بەرڎېنە دوکتر هەم ئاڎێ و هەمیچ وېم مکوشوە.
عەباس دیسان دەسش پەنە کەردوە و واتش: مزاندێ پەی چێ نامې دۆسەکەیش نمەڎو؟
باوەڕم نېیەن دانە و دوە با.
ڕەسووڵ بە عەباسی واتش: تۊ ئێتر لاڵ بە. عەباس و ڕەسووڵ کەوتێ گېیانوو یۆترینی شەڕە کوتەکشا دەس پەنە کەرد.
بکوشەش بکوشەش.
عەباس واچې بە ڕەسوولی: تۊ ئەسڵەن ژەنیت ئاوردێنە و دلې دەگاینە مژیوی، ئێتر پا مەنیە دلې شاری و فزوولیێ کەرە. من مشۊم هەر چی ڕۊی خوڎایینێ خەجاڵەتیێنە بوونێ ئاوی و سەرەو شەرمی وزوورە.
گرڎو جوانەکاو مەحەلێ تا چەمشا گنۊ من وېشا شاراوە چەنەم.
هیزیکە ئەسغەر ڕەزا شۆماڵ واچېم پەنە: عەباس کڵاوەکێت مەنامنەرە.
حەر ئا ڕۊ ئاغە محەمەوڎ دووکاندار واچې: ئېمە ئارۊلایی قەرزتا پەنە نمەڎەیمێ.
تۆ ئیسە دەگاوە ئامێنی و قسێ ڕەقێ و ناجۊرێ منیەی سەرو دڵوو گرڎیماوە.
تۆ نېیەنی ویروو لەمەو ئی ساحێو مەردە سەڵیتێنە.
چینەیە عاجزەنی کە گاوەکێت 55 تمەنێ هەرزانتەر ورەتێنێ. دیسان عەباس داش دڵش و نەما ئەو پەلو زەرێ و هۊرشبڕنا و بە گېیانی نیمە و ناتەمامشوە فڕەش دا دلې حەوزەکەی و واتش: هەر ئە چیگەنە وەرو چەماو گرڎیتاوە مخنیکنووش.
مەڵڵا واتش: ڕوڵە داڎو بېیاوندێ لاو کەسیە. گرڎیما پێوەرە قێڕنێنمێ و هاوارێ کەرېنمێ: بېیاودێ داوماوە.
ئاغە حسیەنی هامساما ڕەما و یاوا و پەلە پەل وېش وست دلې حەوزەکەی و زەرێ داماگە بە پا و پلی سووچیاشوە و لاشەی هاڕیاشوە دلې ئاوەکێنە کېشاش بەر.
عەباس و ڕەسووڵ دابېشا چیروو پرمەو گرەوای و هەرسی مجێنېرە و ماڵێنێ سەرەشارە و واچېنێ دیت چەنی ئابڕوو و حەیاما لوا.
مەڵڵا واتش: من هەر ئەوەڵوە واتم گرمووقاڵ مەکەرڎې وزدێش دەسو ژەنا وېشا زانێنێ چېش کەرا.
ئاغە حسەینی هامسا دەسو ڕەسوولیش گېرت و واتش: ڕەسوول تۊ بۊ بلۆوە سەرو یانە و ژیواو وېت ئېمە چیگەنە هامسێنمێ و هۊشما هەن بە عەباسی وە.
ڕەسوول سەرەش نېیا سەرو شانەو ئاغە حسەینی و تێرتێر گرەواو واتش: ئابڕووما شی. پی زوڵەزایە چېش کەرمې؟
ئاغە حسەین واتش: ڕەسووڵ گېیان با ئینەتە پەنە واچوو. ئانیە بزانە چی زەمانەنە دلې دە نەفەرانە یۆشا زۆڵەزان، بەڵام خۊ کەس نمەزانۆ چوونکوم کەس جاڕ نمەڎو، گرڎ کەس هەن ویروو ئابڕوو وېشەنە.
شمە وېتا ئەپی گرمووقاڵە دەنگتا زڕنا و ئابڕوو وېتا بەرد. ئی کناچېچە خۊ نامې ئا کەسیە نمەدرکنۆ بنەمدێشەنە بەرڎېش قەراخێوە با بزۆ و زاڕوەکەیچش بنیەیدێ سەرو ڕایېوە و وېتا نەجات بڎەیدێ.
ڕەسووڵ بەرەنە زیارە و من تا دوێ ساڵې چاوەدماتەر ڕەسووڵم نەڎیوە.
ڕەسووڵ لوابێوە دەگانە دار و نەڎاروو وېش هەراج و تاڵان کەرڎە بې و یەزدەنە بارش کەرد.
پېسە چېوێو دلې یەزدینۆ خووزستانینە وېش سەرقاڵوو کاروو کەشاوەرزی کەرڎەبێ و چڼە ساڵېو چا مەنەبېوە و تا ساڵەو 1378 حەر چاگەنە فەوتش کەرد.
هەر ڕوێو یۊ زەرێ داماگێ دێ وەرو شەقا.
ڕوێو لالوەکېش ئێنێ و نیشێنێ ملشرە، ڕوێو ئەو چن براکاش. زەرێ داماگەکێچ ڕۊ بە ڕۊ ڕەنگ و ڕۊخسارش زەرد و زەردتەر و لەمەیچش گەورێ و گۆرەتەرە بې.
شەریفی_بېساران.[1]