لاچەمێوی گولانە سەرو ڕۊمانو دێڕ بە دێڕ حەسەرەت
بەشەی یەرەمە
دەورانوو ئاشقی سارای:
کریۆ واچوو ئی دەورانە ژیوای سارای کەرۊ دوې بەشېوە، وەڵێ ئاشقی و دماو ئاشقی.
ئاخرین دەوران کاتېوا کە ئیتر سارا ساقە نییەنە و ڕۊح و ڕەوانش نەوەشا و مەلوولەنە.
پەیلوای و سەرنجەکې وېم سەرو ئی ڕۊمانیە:
ئی ڕۊمانە هەتا واچی دەوڵەمەندا جە وات و واچە هۆرامیە ڕەسەنەکا.
ساختار و پیرنگ:
ئی داستانە بنەڕەتش فرە وەش منریۆرە، وەلێم جە درێژشەنە کوچېو وانەری ماڼۆ. ئەوەخوا کەرڎەی بڕېو واچا و بەسەرئامایا، بەتایبەت دەورانوو نەوەشیە دەروونیەکەیشەنە، وانەری تووڕە کەرۊ و تۊرنۊش جە وېش. (ئینە بڕېو یاگېنە متاوۆ کېشێ وەشێ کەرۊ و بۊ بە خاڵێوە عالە تاکو وەردەنگی بازۆوە دلې داستانەکەیەنە، وەلێم نەک گرڎ لایوۆ. دلې تەکنیکوو ڕۊمانییەنە ئینە ڕیسکێوی فرە گۆرەن)، پەی نموونەی: لرخە لرخوو پیرە پیاو دلې خیاڵا سارای ئاڼە دووبارەو سەد بارە کریۊوە وانەری بېزار کەرۊ.
هەرپاسە واتم ئینە نمەلۆنە دلې هەڵێوی تەکنیکی، تەنیا متاوۆ ڕیسکێوی گۆرە بۊ و گنۊ وەرو دەسو ڕەخنەگیرا و نەقد کەرەکا.
چەولایچۊ ئېمە مزانمې دلې ڕۊمانییەنە فاڕیای کەسایەتیەکا بەپاو لوای کات و زەمانی ڕوە مڎۆ. دلې تاریکتەرین ژیوایەنە نوقتێوە گولانې هەنە کە ئۆمێدېو وەش کەرۊ، هەر سەرو ئا نوقتە گولانې ڕۊمان نویس متاوۆ مانۆڕێ فرێ دۆ. ئی ڕۊمانوو دێڕ بە دێڕ حەسرەتیە کېشێ و لکێ فرێش چەنە هەنې، ئینە خاڵێوە موسپەتە و عالەنە، وەلێم ئەوەکەرڎەی لەکەکا وانەری ڕازی و ئاسوودە نمەکەرۊ.
دیسان نموونێ فرێ متاومې چی بارۆ بارمێ، ئەشقو سارای
وانەر تەماڎارا ئی ئەشقە بېیاوۆ بە یاگېو کوچېو چا تاریکی ژیوایەنە ڕۊشنایێو پەی سارای وەش کەرۊ. وەردەنگ ساراش وەشە مسیۆ و بۊ بە بەشېو جە خیاڵاش. هەر پۆکەی هەمیشە تەماڎارو قۆمیایێوا ڕوە دۊ تاکو هەم دڵوو سارای و هەمیچ دڵوو وانەری فەرێحێوە گېرا. وەلێم پاسە نمەی وەرۆ. ئی ئەشقە فرە بە کوت و پڕی مەی و ژیوای سارای چاو سیاوتەر کەرۊ. تاکو ڕادېویچ ئی ئەشقە ڕیال نیا، ئەشق پرۆسەن و جە لوای زەمانییەنە کامڵ بۊ. سارا چن جارێ زېیاتەر عېرفانی نمەوینۊ و فرە کەم قسێچ بەینشانە ویەرا. (ئینە کریۆ بۊ بە وەشیسیایێوی کاتی و موەقەت، وەلێم ئەر درېژەش نەبۊ ویر مشۊوە و بڕیۊوە). ئەشقو سارای جە زەمانێوی کەمەنە تەنیا بە واچېوە ماشەڵڵا سارا بەژنت گېیانش وستەنەنە ولە گوڵاواو گجیەکەیت! وەش بۊ و هەر ئی واچې تاکو ئاخروو داستانی چن جارێ ماچیۊوە و ویر و خیاڵوو سارای گېرۆرە و ژیوایش بەرۆ ڕوەو تاریکیەرە!
هەرچن ئی ڕۊمانە جە بڕېو یاگېنە ئا گیرێشە چەنە هەنې، وەلێم ئینە نمەتاۋۊ جە گۆرەیی و زەریفی واچەکا و وەسفوو یاگەکا کەم کەرۊوە. بې گومان ئی ڕۊمانە ملۆنە دلې گەنجینەو ئەدەبېیاتی هۆرامی و بۆ بە کۊڵەکێوە هێقمە پەی هەرزەلە پان و بەرینەکې زوانی هۆرامی.
جارێوتەر ئارەزو ساقی و سڵامەتی و شاڎیی ژیوای پەی خاتوو ژوانێ موازوو. ئی ڕۊمانە شایەنو ئانەیە هەن کە کاتش پەی بنیەیدێرە و بواندێشۆ، مادام ژەنێوېچ نویسەن، دەرکوو بەسەرئاماکا و ڕوەداوەکا، پەی خانمەکا ئاسانتەر و سەرنج کېشتەرا.
ڕەزا بەهمەنی.[1]