ناو: مەوجود
ناوی باوک: مامە کەریم
مەوجود سامان- شاعیر
نوسینی: #خالید عومەر عوسمان#
ناوی تەواوی (مەوجود مامە کەریم) ە، ساڵی 1957 لە شاری #هەولێر# لە خانەوادەیەکی ناسراو لە دایک بووە، خانەوادەیەکەیان هەر لە زووەوە بە ڕۆشنبیریەکی شۆڕشگێڕانە و کورد پەروەرانە لە شاری کۆنە هەولێری قەڵاو منارەدا پەروەردەکراون، بە هۆی باوکیانەوە کە لە شۆڕشی ئەیلولدا پێشمەرگە بووە تووشی دەربەدەری و گرتن و دوورخستنەوە و نەفی کردن بوونەتەوە بۆ باشوری عێراق، برا گەورەکەیان مامۆستا تەلعەت سامان کۆڵەکەیەکی گەورەی شانۆی کوردی بووە لە شاری هەولێر، مەوجود سامان سەرەتای ساڵی 1970 دەستی بە نووسین و کاری ڕەخنەیی کردووە، ساڵی 1975 دوای نسکۆی شۆڕشی کورد چالاکانە بە گوڕوتێنێکی زۆرەوە بەشداری لە چالاکی ئەدەبی و ڕۆشنبیریدا کردووە لە هەولێر و بەغدا و سلێمانی، لە زۆربەی ڕۆژنامە و گۆڤار و بڵاوکراوەکانی ئەو سەردەمە بەرهەمی ئەدەبی شیعر لێکۆڵینەوە و گوتای جۆراوجۆری بڵاوکردۆتەوە لە (گۆڤاری بەیان- هاوکاری- بیری نوێ و ڕۆشنبیری نوێ)، لە ساڵی 1980 ەوە چۆتە چیا و لەوێش بۆ ماوەی هەشت ساڵ وەک پێشمەرگەیەک دەمێنێتەوە و دەیان گوتار و شیعر و لێکۆڵینەوەی بڵاوکردۆتەوە و لە کۆڕ و کۆبوونەوە ئەدەبیەکاندا بەشداری کردووە، سەبارەت بە ئەدەبی بەرگری هەر لەوێش دوو دیوانی شیعری بە چاپ گەیاندووە لە بڵاوکراوەکانی یەکێتیی نوسەرانی کوردستان بە ناونیشانی(پەڕینەوە ساڵی 1986) دیوانی (هەر تەنها بەفڕە شیوەنت دەکات ساڵی 1987)، دوا تر ساڵی 1988 دەچێتە سوریا و لەوێش دیوانی (فرمێسکی بەرد)ی لە دیمەشق چاپ دەکات، پاش ئەوەش ئاوارەی هەندەران دەبیت و لە شاری ئەمستردام لە هۆڵەندا دەگیرسێتەوە، مەجود سامان خوێندنی زانکۆی تەواو کردووە و لە هۆڵەنداش دەست بە خوێندن دەکات ماجستێری لە ڕشتەی کۆمەڵایەتیدا وەرگرتووە، لە سەرەتای دامەزراندنی ڕێکخراوی میدیا لە ساڵی 1989 لە ئەمستردام ڕۆڵێکی گرنگی لە دەرکردنی گۆڤاری میدیادا بینیووە و ئەم دیوانە شیعریانەی چاپکردووە (دۆنای دۆن- پەرت بوون- فرمێسکی بەرد)، هەرەوەها لە هەولێریش چاپکراونەتەوە، جگە لەوە سەدان گوتار و شیعر و لێکۆڵینەوەی لە ڕۆژنامە و گۆڤارەکاندا بڵاوکردۆتەوە، بەڵام لە دووتۆێی کتێبدا کۆ نەکردونەتەوە، مەوجود سامان پاش پرۆسەی ئازادی عێراق گەڕاوەتەوە بۆ وڵات و بووە بە مامۆستا لە زانکۆی سەلاحەدین، پاشان لە گۆڤاری (کاروان) لە هەولێر بووە بە سکرتێری نوسینی ئەو گۆڤارە،
خۆنەشاردنەوە
هەندێک هەن لە نێو جلی ئەستوردا خۆ دەشارنەوە
هەندێ هەن
لە پەچە و سمێڵ و نیقابدا
هەندێ هەن لە نێو ئاو و ئاگر، بەفر و باراندا خۆدەشارنەوە
هەندێ هەن لە نێو من و مردندا خۆدەشارنەوە
هەندێ لە بادا خۆیان دەشارنەوە
هەندێ خۆیان لە ناو یاسادا دەشارنەوە.
هەندێ خۆیان لە نێو خەندەی سواڵکەریکدا
هەندێکیش لە فرمێسکی قوربانییەکی ئەنفال و
هەندێکێش لە نێو تێکدانی دوو دڵدا[1]
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 4,465 keer bekeken
Schrijf uw commentaar over dit item!