(جەلال مەدحەت خۆشناو)ی شاعیر و ئەندازیار لە چەند دێرێکدا:
1- ژیانی هۆنەر:
جەلال مەدحەت خۆشناو، لە ساڵی 1934 لە شەقڵاوە لەدایک بووە. باوکی (ئەحمەد مەدحەت) کوڕی (تەها)ئەفەندی کوڕی قازی (ئەحمەد). دایکی (حەلیمە) کچی (حەمەدی ڕسول بەگە) لە بەگزادەکانی شەقڵاوە. لەناو گوڵ و گوڵزارە ڕەنگینەکانی شەقڵاوە بەپا ڕۆیشتووە ڵەگەڵ ڕووبار و جۆگەلە خوڕەمە سازگارەکانی ئەو سەردەمی شەقڵاوە یاری کردووە. زۆر شەیدای یارییە فۆلکلۆرییەکان و ڕەش بەڵەک بووە جا بۆیە دەڵێ(جا لێم مەگرن ئەگەر بووکی شیعرەکانم ئاڵای ڕۆمانسیان بەسەر خۆیان دادابێ).
لە ساڵی 1946 خوێندنی سەرەتایی تەواو کردووە لە قۆناغی سەرەتایی هەستی نەتەوایەتی و ڕێزمانی کوردی لە مامۆستا (خەلیل محەمەد خۆشناو) فێربووە. زانیاری دەربارەی ئاین و زمان و ئەدەبی عەرەبی لە خاڵی (مەلا سادق) وەرگرتووە. لەکاتی منداڵیدا هۆنراوەکانی
(حاجی قادری کۆیی)و(شێخ ڕەزا تاڵەبانی) سەرنجیان ڕاکێشاوە.
لە ساڵی 1952 لە هەولێر قۆناغی ناوەندی تەواو کردووە.
لە ساڵی 1956 کۆلیژی ئەندازیاری بەغدای تەواو کردووە.
لە ساڵی 1962 کەوتۆتە پشکنینی دیوانی (مەولەوی) زۆربەی هۆنراوەکانی کردووە بە سۆرانی، بەڵام بەداخەوە ئەم بەرهەمە فەوتا.
لە ساڵی 1964 بووە بە بەرپرسی ڕێگاوبانی هەولێر.
لە ساڵی 1968 بووە بە بەڕێوەبەری ئەشغالی کووت.
لە ساڵی 1969 بووە بە بەڕێوەبەری ئەشغالی ناصریە.
لە ساڵی 1970 بووە بە ئەندامی بزوتنەوەی نووسەرانی کورد.
لە ساڵی 1971 بووە بە بەڕێوەبەری ئەشغالی هەولێر.
لە ساڵی 1975 بووە بە بەڕێوەبەری ئەشغال و ئیسکانی هەولێر.
لە ساڵی 1976 بەجێگری سەرۆکی یەکێتی نووسەرانی کورد هەڵبژێردراوە.
لە ساڵی 1982 بووە بە بەڕێوەبەری نەخشەو پلاندانان لە سەرۆکایەتی ئەنجومەنی ڕاپەڕاندنی کوردستان.
لە دووای ڕاپەرین بەماوەیەک بووە بە ڕاوێژکاری ئەنجومەنی وەزیران.
لە بەرەبەیانی یەکەم ڕۆژ ی جەژنی ڕەمەزان ڕێکەوتی 29-01-1998 دڵی لەلێدان وەستا لە گردی زەیتوون لەشەقڵاوە نێژراوە.
2- بەر هەمەکانی هۆنەر:
أ- ئەو بەرهەمانەی هۆنەر کە لەچاپ دراون:
1- کاروانی یار،ساڵی 1975.
2- سێ دەنگی توڕە، ساڵی 1975.
3- ئاسمان و ئاو خاک، ساڵی 1981.
4- نەوای حەیرانێکی چڕ، ساڵی 1982.
5- گرەو، ساڵی 2003.
ب- ئەو بەرهەمانەی هۆنەر کە لەچاپ نەدراون:
1- کاروانی یاد.
2- ژانی گەڵ.
3- هۆنراوەکانی هۆنەر لە ڕووی ڕووخسارەوە:
ئەو ڕەمزە ئەدەبیانەی کە هۆنەر بەکاری هێناوە زۆربەیان ڕەمزی ڕوون و سادەن، ئەو کێشانەی بەکاری هێناون کەمتر بەر عەروزی عەرەبی دەکەون. هۆنەر قاڵبی شیعری چوارین و پێنج خشتەکی لە هۆنراوەکانی بەکارهێناوە. هۆنراوەکانی بە زمانی کوردی دیالێکتی خوارووە، هەموو کەس تێیان دەگات و بۆنی ڕەسەنایەتیان لێدێت.
4- هۆنراوەکانی خۆشناو لەڕووی ناوەڕۆکەوە:
هۆنراوەکانی خۆشناو لەڕووی ناوەڕۆکەوە چەند مەبەستێک لە خۆوە دەگڕێت :
أ- هۆنراوەی دڵداری: دیمەنە جوانەکانی شەقڵاوە، خوڕەی ئاو، دەنگی شالوور ئەمانە و چەندین هۆکاری تر کاریگەربوون بۆ ئەوەی هۆنەر لەم بوارەدا هۆنراوە بنوسێت.نمونەش بۆ ئەوە:
چونکە دڵم دڵدارێکە
شەیدای دولبەری خۆشناوە
ب- هۆنراوەی نیشتمانپەروەری: هۆنەر بەردەوام هەستی بە ئازارەکانی گەلەکەی کردووە،خاکی لا پیرۆز بووە خەبات و قوربانی لەپێناوی نیشتمان پێ ی شەرەفێکی گەورە بووە. نمونەش بۆ ئەوە:
منی مرۆڤ،منی ئینسان
فرچکم بەو ئاوە گرتووە
هێزم لەو خاکە بردووە
هەر ئاواتمە لەوێ ژیان
کە دەشمرم لام وا چاکە
گۆرم بخرێتە ئەو خاکە
ج- هۆنراوەی کۆمەلایەتی: ئەوەی لە هۆنراوەکانی بەدیار دەکەوێت لەم بوارەدا خۆی لەچوار تەوەرەدا دەدۆزێتەوە:
1- خوێندن: هۆنەر نەخوێندەواری بە دابوو نەریتێکی چەوتی کۆمەلگە داناوە دەڵێ:
چەرخی ئێستا، چەرخی هەڵمەت بردنە
کــــــــــاتی هەوڵی بێوچان و خوێندنە
2- ژیان: لەو سەردەمەی هۆنەر دەژیا خەڵکان لەهەموو دونیا بەدوای بەدەست هێنانی ئەو مافانە بوون کە لێیان زەوت کرابوو، بەتایبەتی ئێمەی کورد،بۆیە هۆنەر دەڵێ:
ئەرێ تاکەی..........
ژیان ئالۆزوو شێواو بێ
خەڵک گیرۆدەی ماف و نان
لەسەرانسەری ڕووی جیهان
بەرەڵای دەشت و کێوابێ
3- مافی ئافرەت: هۆنەر لەم بوارەشدا درێغی نەکردووە، هەروەک لە یەکێ لە هۆنراوەکانی باسی بەزۆر بەشوودانی ئافرەت دەکات:
بیســــــــتووتــــــانــــــە
کـــــــچێ بەزۆر مارەبڕکەن
نەگریێتن، قژ نەرنێتن
بادەی بەختی ڕەشی پڕکەن
وەکو لافاو هەڵنەچەنێت
4- ئەدەبی منداڵان: هۆنەر لەم بوارەشدا درێغی نەکردووە، هەروەک لە یەکێ لە هۆنراوەکانی باسی یاری پەلیکانێ دەکات:
لە مناڵیم.............
بەحەزوو نازی ساوایم
کاتێ پەلیکانەم دەکرد
بە چەڵەنگی هەڵم دەبرد
کە پەلیکەکەم دەپەستا
قـــــــــۆز دەوەســــــتا
کەلێم دەدا
دوورم دەبردە بەر مەودا
هەر بە هەژمار
دەبووە تەغار
هاودژی من
دەکەوتنە بن