نەورۆزی ئەمساڵ، گەرچی لە هەلومەرجی هێرشی تیرۆریستان و، ئاستەنگی ئابوری هەرێم دەگێڕین، بەڵام سەرەنجامی تێکۆشانی یەکێتی و لایەنەکانی ترو خەباتی مەدەنی خەڵکی هەڵەبجە، حکومەتی هەرێم وەڵامی بارودۆخە دژوارەکەی ناوچەکەو عیراقی، بە سوربون لەسەر مافەکانی گەلی کوردستان و خەڵکی دایەوەو هەڵەبجەی، وەکو چوارەمین پارێزگای کوردستان، کردە تاجەگوڵینەی نەتەوایەتی سەر ئارامگای شەهیدانو تێکڕای قوربانیانی دەڤەرەکە.
گەلی کۆڵنەدەری کوردستان!
بەدرێژایی مێژووی کۆن و نوێ، لەبەر عیشقی ئازادی و ڕزگاری، هەرگیز نەتەوەی کورد نەیهێشتووە مەشخەڵی جەژنی نەتەوایەتی نەورۆز، لە دەرون و دەستی وەچە جوامێرەکانی بکوژێنرێتەوە.
ئەم مەشخەڵە، هەمیشە ڕوناکیی بەرەنگاری بەخشیوەتە خەباتی ڕزگاری.
نەتەوەی کورد، نەک هەر گیانی بەرەنگاری، بەردەوام پاراستوەو پەرەپێداوە، بەڵکو لەوپەڕی ڕۆژگارە نەهامەتیەکانیشدا، ژیلەمۆی ناوبەناو تاوسەندوی خەباتی ئازادیخوازانەی دەروبەریش بووە، داگیرکەرەکانیش، بۆئەوەی دەسەڵاتی ستەمکارانەیان بپارێزن و بسەپێنن، بەشێک لە ستراتیژیان پەلاماردانی کوردستان بووە، هەربۆیە، لەسەدەکانی ناوەڕاستەوە، کەوتونەتە وێزەی میرنشینەکانی کوردستان و خاپوریان کردون. تاوانیان گەیاندە جەنگی چاڵدێران و ڕێکەوتنی عوسمانی و سەفەوی، هەروەها ڕێککەوتنەکانی ئەرزڕوم و هەردوو ڕێککەوتنامەی زەهاویش، دژی سەردارە سەروەریخوازەکانی کورد.
لەدوای جەنگی یەکەمی جیهان و ڕێککەوتنامەی سایکس پیکۆ، پەیمانی سنتۆ، ئاخریشیان ڕێکەوتنامەی جەزائیر، بەڵگەی درێژەی داگیرکەرانی کوردستانن بەرامبەر نەتەوەی کورد.
لەبەرامبەردا کورد، نەک وەڵامی ڕقی بە ڕقی پێچەوانەوە نەداوەتەوە، بەڵکو بە سیاسەتی ئاشتیو خەباتی بەدیهێنانی ئامانجە هاوبەشەکان وەڵامی داوەتەوە. گەرچی ئاشتیخوازی کورد، بەرامبەر سیاسەتی دوژمنایەتی، لەلایەن هێزە باڵادەستەکانی نەتەوە سەردەستەکانەوە، هەتا داگیرکردنی کوێتو کۆتایی جەنگی سارد، نەک پێینەزانراوە، بەڵکو ناسیۆنالیستە گۆشەگیرو سەلەفیەکان، وەکو تەواوکەری سیاسەتی داگیرکەران، شۆڤیەنیەتیان کردۆتە بەشێکی باوەڕی ڕای گشتی، کە ئاسەوارەکەی هەتائێستاش لە میدیای عەرەبی و فارسی و تورکیدا، ماوە.
مەشخەلڕ بەدەستانی نەورۆز !
گەلەکەمان گەلێکی لەخۆبوردووە، بۆیە، لەشۆڕشدا دیل ڕێزی لێگیراوەو لەراپەڕینیشدا، دیل، خزمەت کران.
ئەمە جگەلەوەی تەواوی هێزە ئۆپۆزسیۆنەکانی عیراق، بەسەر بەردەبازی پێشمەرگەو ئەزمونی حوکمڕانی کوردستانەوە، پەڕینەوە بۆ بەغدادو لەعێراقی نوێشدا، پاڵپشتی هێزەکانی کوردستان، کاریگەر بوو، هێزەکان شوێنی شیاوی حوکمڕانییان دەستکەوت.
چەندین جار لەجەنگی ئەهلی، بەهۆی سیاسەتی دووربینانەی سەرکردایەتی سیاسی کوردەوە، لەسەروی هەموشیانەوە، سەرۆک مام جەلال، عیراق دەرباز دەکرا.
بەداخەوە، لەعیراقدا، نە دەرس لە مێژووی خوێناوی کۆن، وەکو پێویست وەرگیراوە، نە خزمەتە بەردەوامەکانی مێژووی نوێی کورد، لەبەرچاوگیراوە.
لەکاتێکدا ئەم ڕاستییە تاڵانە بیردەخەینەوە، بێگومان، هەڵوێستی هێزە چەپ و هەتاڕادەیەکیش دیموکراتخوازانی عیراق و ناوچەکە لەچلەکانەوە، لەپشتیوانیکردنی کوردستان.
هەروەها، هەڵوێستی خوالێخۆشبوو سەماحەتی (سەید موحسین حەکیم) وەکو نەخشی مێژوو، کە تەحریمی شەڕی لەکوردستاندا لەشۆڕشی ئەیلولدا کرد، قەت فەرامۆش ناکەین.
کە هەتا ئێستاش لەناو شیعەدا کاریگەری هەیە.
ئەم هەڵوێستانە لەویژدانی گەلەکەماندا چەسپیون، بەڵام مەترسیمان لەوڵاتانی ناوچەکەداو لە بەشەکانی کوردستاندا، نەبونی دیموکراسیو چارەسەرنەکردنی کێشە لەمێژینەکانە، کە سەرەنجامی ئەو بارودۆخە لەمێژینەیەشە، ناوچەکە کەوتەوە ناو گێژاوی جۆراوجۆرەوە، بێئەوەی هەتائێستاش، ئاسۆیەکی ساماڵ لە بەدیهێنانی دیموکراسی دەرکەوتبێ. نزیکترین نمونەش ڕابونی ڕۆژئاوای کوردستانو دەسەڵاتی خۆبەرێوەبردنیانە، کە لەبری پشتیوانیکردنیان لەلایەن ئۆپۆزسیۆنی سوریاوە، کە خۆیان دوچاری شەڕی ئەهلی بون، دوژمنایەتی دەکرێن. تەنانەت لەعیراقیشدا، سەرەڕای ڕوخاندنی ڕژێمی سەدام و سەلماندنی دەستوری گەلپەسەندیش.
بەردەوام کێشەی چارەسەرنەکراو، لەسەر کێشەی تازەسەرهەڵداو، کەڵەکە دەکرێن و دۆخەکە خزێندراوەتە ئەگەری دۆخێکی مەترسیدارتر!
هاووڵاتی ئازیز !
یەکێتیی نیشتمانیی کوردستان، ڕاپەڕاندنی ئەرکە بنچینەییەکانی دیموکراسی، لەناو پرۆسەیەکی مێژووییدا دەبینێ. ئەم ئەرکانەش، بەئارەزوی هیچ کەسێکو لایەک دەسکەنە ناکرێ. پابەندبون بەدەستورو سیاسەتی بەدیهێنانی ئەرک بەئەرکی ئەرکەکانی دیموکراسیو سازانی نیشتمانی، دەبوایە بەکردەوە ڕەنگی ڕاستەقینەی بدایەتەوە. کەچی بەپێچەوانەوە، چارەسەرنەکردنی کێشەکان، لە مەترسییە ترسناکەکانی دۆخی ئێستان.
ئۆباڵی ئەم دۆخەش، جگە لە حکومەتی عیراق، دەکەوێتە ئەستۆی هەندێک لە هێزە سیاسیەکانی بەناو بەرهەڵستکاریش، کە بەهەڵوێستی هەڵەو سیاسەتی کاردانەوەو ڕقەبەرایەتی، دۆخەکەیان لەگرێژنە دەرکردووە!
لەکوردستانیشدا، گەلەکەمان، نیگەرانی بەرامبەر حکومەتەکانی عێراقو زۆربەی ئۆپۆزسیۆنیش هەبووەو هەیە. سەبارەت بەوەی:
- هەشت سالڕ بەسەر پەسەندکردنی دەستورو جێگیرکردنی مادەی (140) تێدەپەڕێ، کەچی کابینە پێکهێنراوەکان لەو ساڵانەدا، هەنگاوی بنەڕەتیان بۆ جێبەجێکردنی بڕگەکانی مادەی (140) نەناوە.
- زۆربەی ئۆپۆزسیۆن، بەتایبەتی ئەوانەی لەناو (العراقیە)دا کۆبونەتەوە، هاوشانی ڕەوت و هێزی مەزهەبی تریش، نەک پشتیوانی کورد بۆ گێڕانەوەی ناوچە دابڕێندراوەکانی دەرەوەی هەرێم ناکەن، بەڵکو لەناو ئەماندا، سیاسەتی شۆڤێنی مەترسیدارتر سەبارەت بە کەرکووکو خانەقینو ژەنگار، پەیڕەودەکرێ.
- پرسی نەوت، ساڵەهایە بە چارەسەرنەکراوی هێڵراوەتەوە، بەڵکو کێشەی بودجەو موچەو مافە مەدەنیەکانی کوردستانیشی خرایەسەر!
- چارەسەرنەکردنی ئەو کێشانە، کەلێنی سیاسی، ئابوری، کۆمەڵایەتی و ئەمنیەکانی لەعێراقو لەنێوان بەغدادو هەرێمدا، فراوانتر کردووە، ئەمەش، مەترسییە گەورەکانی ناوچەکەشی، پەلکێش کردە ناوەڕاست و خوارووی عێراق. ناوبەناو تیرۆریستەکان کنەی ئەنجامدانی تاوان لەکوردستانیشدا دەکەن.
- بەپارێزگاکردنی هەڵەبجە، کە هەموو لایەک فرمێسکی بۆ دەڕێژن، مەخابن، دوای ئەوەی حکومەتی عیراق پەسەندی کرد، دەیان گیروگازی لەپەرلەمانی عیراقدا، بۆ قوتدەکەنەوە.
- ئەو بارودۆخەی عێراقو چارەسەرنەکردنی کێشەکانی نێوان بەغدادو هەرێم، ئێمە بەقوڵی دەترسێنێ، بەتایبەتی لە نەبونی سیاسەتی لێبڕاوی چارەسەرکردنی کێشەکانو هێرشی تیرۆریستەکانو لێکترازانی هێزە سیاسیەکان لەناو خۆیاندا، کاریگەری نالەباری لەسەر پرۆسەی هەڵبژاردنیش دەبێ و هێزەکانی دەسەڵات و دژە دەسەڵات، دەخاتە ناو ململانێی ناتەندروستی هەڵبژاردنەوە!
گەلی کوردستان !
خەڵکی هەڵەبجە !
مەکتەبی سیاسی یەکێتیەکەتان، لەکاتێکدا جارێکی تر پیرۆزبایی گەرمتان، بەبۆنەی جەژنی نەتەوەیی نەورۆزو هاتنەوەی بەهار لێدەکات، لەناخەوە، پیرۆزبایی ئەم سەرکەوتنە لە سەراپا دانیشتوانی هەڵەبجەو ناوچەکەو نەتەوەکەشمان، بەبۆنەی بەپارێزگابونی هەڵەبجەوە دەکات. دڵنیاشین، لەمەودوا، پەرلەمانی کوردستانو حکومەتی هەرێم، توانایان دەخەنەکار، هەتا پێویستیەکانی پارێزگایەکی نوێ، لە هەڵەبجەی نوێخوازدا، لە ژێرخان و سەرخانی پارێزگاکەدا، بێننەی. هەر ئەمەش ببێتە سەرەتای سیاسەتی شێلگیرتر بۆ قەرەبووکردنەوەی قوربانیانی هەڵەبجەو تەواوی ناوچە کیمیابارانکراوەکان و ئەنفالکراوانیش.
یەکێتی، وەکو هەمیشە، دوپاتیدەکاتەوە، ئەرکی سەرشانی لە کابینەی هەشتەمو لەناو پەرلەماندا، بۆ بەدیهێنانی پارێزگایەکی هاوچەرخ، بەدیدێنێ. لەسەر ئاستی عێراقیشدا، یەکێتیەکان، دەبنە جەنگاوەری یاساییو ئیداریو ئاوەدانی.. دڵنیاشین، ئیرادەی گەلەکەمانو خەڵکی هەڵەبجەی شەهیدگای کوردستان، بەسەر کێشەکاندا، سەردەکەون.
دیسان پیرۆزبێ دوو جەژنەی کوردستان، نەورۆزی دێرینەو هەڵەبجەی پارێزگای بەرەو مۆدێرنە.
هەر سەرکەوتوو بێ.. ئیرادەی دیموکراسی و دادپەروەری.
مەکتەبی سیاسی
یەکێتیی نیشتمانیی کوردستان
20-3-2014