بانگەوازێک بۆ ئازادیخوازان و لایەنگرانی دەنگی ئازاد لەناو ڕەوەندی کوردی
با لەدژی پەلاماری یەکێتی نیشتمانی و هاوپەیمانەکانی بۆسەر خۆپیشاندەرانی سلێمانی بوەستینەوە
ئەمڕۆ لەدرێژەی هەڕەشه و گواستنەوه و دەستگیرکردن و سەیارەسوتاندنی هەڵسوڕاوانی ناڕەزایەتیەکانی مامۆستایان و فەرمانبەران و توێژە ناڕازیەکانی کوردستان، هێرش کرایە سەر خۆپیشاندانی مامۆستایان و خەڵک لەشاری سلێمانی. سەرەتا ناوچەی نزیک خۆپیشاندانەکەیان بەهێزە ئەمنی و سەرکوتگەرەکان میلیتاریزە کردو دواتر هەوڵیان دا بەلێدان و سوکایەتی پێکردن و ڕشتنی گازی فرمێسک ڕێژ و دەستگیرکردنی خۆپیشاندەران بڵاوە بەخۆپیشاندەران بکەن بەڵام لەژێر فشاری خۆپیشاندەراندا ئازادیان دەکەن. هاوکات هێزێکی ئاسایش هەڵدەکوتنە سەر ماڵی چەند مامۆستای ناڕازی و دەستیگیریان دەکەن کە تائێستا ئازاد نەکراون.
حکومەتی هەرێم، لەباتی وەڵامدانەوە بەخواستی مامۆستایان و فەرمانبەران و توێژە زەحمەتکێشەکان، بەشێوەی بەڵتەجی مامەڵە لەگەڵ خۆپیشاندەرانی ناڕازی و بێمووچە دەکات. یەکێتی نیشتمانی دەیەوێت وەکو پارتی دەنگی ناڕەزایەتی خەڵک خەفە بکات و ڕێگا نەدات دژی بڕینی قوتی خۆیان و خێزانەکانیان و شیری مناڵەکانیان لەلایەن حکومەتی مافیاکانی کوردایەتیەوە دەنگ هەڵبڕن! یەکێتی هاوکات دەیەوێ وەکو هێزێکی بەشداری حکومەت لەپاڵ بێدەنگی بزوتنەوەی گۆڕانی هاوپەیمانی کەپۆستە ئیداری و سیاسیە گرنگەکانی ناوچەی سلێمانی بەدەستەوەیە، وەڵامی پارتی بداتەوە بۆ ئەوەی کۆتایی بەناڕەزایەتی مامۆستایان بەتایبەتی و فەرمانباران و خەڵکی ستەمدیدە بەگشتی بهێنێ.
بۆیە ئێمە بانگەوازی هەموو ئازادیخوازان و مرۆڤدۆستان دەکەین لەدەرەوەی وڵات، کەدەنگی ناڕەزایەتی بەدەسەڵاتی یەکێتی نیشتیمانی و پارتی هەڵبڕن و ئەم کردەوە سەرکوتگەریەی یەکێتی سەرکۆنە بکەن و بەرگری لەژیان و گوزەران و ئازادی و شکۆی کەسوکاریان لەکوردستان بکەن کە بەدەست کۆمەڵێک مافیاوە قوتی ژیانیان تاڵانکراوەو ئێستاش دەیانەوێ بیدەنگ و سەرکوتیان بکەن. بچنە بەردەم نوسینگەکانی حکومەتی هەرێم و نوسینگەکانی یەکێتی نیشتمانی و لەناوەندەکانی شارەکاندا بەدژی هەڕەشەکردن و سزادان و سەیارە سوتاندن و ڕاونان و گرتنی مامۆستایان و کارمەندانی ناڕازی، بەهەر شێوەیەک دەکرێت دەنگی ناڕەزایەتیەتی بەرزبکەنەوە. خەڵکی کوردستان پێویستی به پشتیوانی ئێمە و بەرەی ئازادیخوازو مرۆڤدۆست هەیه. نابێ مامۆستایان و کارمەندان و خەڵکی هەژاری کوردستان بەتەنها جێ بهێڵین. شەقامەکانی شارە گەورەکانی ئەوروپا و ئەمریکاو ئوسترالیا بکەین بەسەنگەری بەرگری لە نان و ئازادی و شکۆی خەڵکی کوردستان!
رێکخراوی دەرەوەی حزبی کۆمۆنیستی کرێکاریی کوردستان
01-12-2016
بۆ پەیوەندی: 0044747420204121
00447856032991
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 5,258 keer bekeken
Schrijf uw commentaar over dit item!