پەرلەمانتارێک ئاشکرای دەکات، بڕیاری خەرجکردنی 100 ملیار دیناری پارەی گەنمی جووتیارانی کوردستان دەرچووە و بەم نزیکانە دابەش دەکرێت.
#نەجیبە نەجیب#، پەرلەمانتاری لیژنەی دارایی لە پەرلەمانی عێراق، لە لێدوانێکی تایبەت بە (باس)ی ڕاگەیاند، بڕیار دەرچووە بۆ خەرجکردنی پارەی گەنمی 2017ی جووتیارانی هەرێمی کوردستان، گوتی: ”بڕیار لە حکوومەت دەرچووە سەدا سەد پارەی گەنمی 2017 ی جووتیارانی کوردستان خەرج دەکرێت و نووسراوی خەرجکردنەکەش لای منە“.
ئاماژەی بەوەدا، بەدواداوچونێکی زۆری کردووە لەسەر خەرجکردنی شایستە داراییەکانی جووتیاران، گوتیشی: ”لە نووسراوەکەدا هاتووە کە بە بڕیاری سەرۆکایەتیی ئەنجومەنی وەزیران، بڕیار درا هەموو شایستە دراییەکانی جووتیارانی پارێزگاکانی #هەولێر# و #دهۆک# و #سلێمانی# بۆ گەنمی 2017 خەرج بکرێت“.
لە کۆی 1 ملیۆن و 260 هەزار تەن گەنمکی هەرێمی کوردستان، بەغدا تەنیا بڕی 882 هەزار و 645 تەنی وەرگرت.
نەجیبە نەجیب ڕوونی کردەوە، نووسراوەکەی سەرۆکایەتیی ئەنجومەنی وەزیران بە واژۆی عەبادی دەرچووە و بۆ وەزارەتی بازرگانی ئاراستە کراوە، گوتیشی: ”بەپێی بڕیارەکە 100 ملیار دینار دەچێتە سەر حیسابی سایلۆکانی هەرێمی کوردستان و پارەکەی تریش دواتر دەدرێت، ئەوەی ماوەتەوە ئەوەیە پارەکە لە بانکی ناوەندی تەحویل بکرێت بۆ بانکەکانی هەرێمی کوردستان، تەنیا ئەو ئیجرائاتە ماوە“.
بە گشتی بۆ پارەی گەنمی 2017ی جووتیارانی هەرێمی کوردستان، پێویستە 149 ملیار دینارە خەرج بکرێت، 100 ملیار دینار ئامادەیە و 49 ملیار دینارەکەی تریش دواتر دەخرێتە سەر حیسابی هەرێمی کوردستان.
ئەو پەرلەمانتارە ئاشکرای کرد، بۆ پارەی گەنمی جووتیارانی هەرێمی کوردستان بۆ ساڵانی 2014 و 2015 و 2016، زیاتر لە 728 ملیار دینار تەرخان کراوە، گوتیشی: ”ئەو بڕە پارەیەش پەسند کراوە و ماوەتەوە لە ڕۆژنامەی (وەقایعی عێراقی) بڕیارەکە بڵاو بکرێتەوە، دوای بڵاوکردنەوەی ئەو پارەیەش دێتە خەرجکردن، ئەویش دوای تەواوبوونی ناردنی پارەی 2017.
نەجیبە نەجیب جەخت دەکاتەوە، زۆرترین هەوڵ دەدەن و بەردەوام لە بەدواداچوونن بۆ خەرجکردنی شایستە داراییەکانی جووتیارانی هەرێمی کوردستان. [1]
ماڵپەڕی باسنیوز: 22-08-2017