ەناوی خوای بەخشندەی میهرەبان
ئەمڕۆ 19/10/2017 #کۆمەڵی ئیسلامی کوردستان# و #بزوتنەوەی گۆڕان# بۆ هەڵسەنگاندنی ئەم هەلومەرجە نەخوازراوەی، کە لە ئەنجامی سیاسەتی بەرژەوەندیخوازانەو شکستخواردی دەسەڵاتدارانی هەرێمی کوردستان و هاوڕاکانیان، بەسەر گەلەکەماندا هاتوە کۆبونەوە. لە کۆبونەوەکەدا جگە لە تاوتوێکردنی ئەگەرەکان، نەخشەرێگایەک بۆ ڕوبەڕوبونەوەی ئەم قەیرانە و دەرچون لەم بارودۆخە داڕێژراو پەسەندکرا.
ئێمە لە کۆمەڵی ئیسلامی کوردستان و بزوتنەوەی گۆڕان بە پێویستی دەزانین جەخت لەسەر ئەم خاڵانەی خوارەوە بکەینەوە:
یەکەم: پاراستنی قەوارەی هەرێمی کوردستان و داکۆکیکردن لە مافە نەتەوەیی و نیشتیمانییەکانی خەڵکی کوردستان، و چارەسەرکردنی کێشەی ناوچە کوردستانییەکانی دەرەوەی هەرێمی کوردستان لە چوارچێوەی دەستوری عێراقدا. دژی هەمو هەوڵو نیازێکین بۆ پارچەپارچەکردنی قەوارەی دەستوریی هەرێمی کوردستان و گەڕانەوە بۆ دواوە.
دوەم: داوا لە هەمو هێز و لایەن و کەسایەتییە نیشتیمانپەروەرەکانی کوردستان دەکەین، کە هەمومان بەیەکەوە بەرنامەیەکی گشتگیر دابڕێژین بۆ پاراستنی دەسکەوتەکانی گەلەکەمان و دروستکردنی حکومەتێکی ڕزگاری نیشتیمانی بۆ ئامادەسازی بۆ هەڵبژاردنێکی بێگەردی گشتی بەچاودێری نەتەوە یەکگرتوەکان. هەروەها پشتیوانی خۆمان بۆ ڕاپۆرتی ئەنجومەنی ئاسایشی نێودەوڵەتی ڕادەگەیەنین لەمەڕ ئەنجامدانی هەڵبژاردنی گشتی و چەسپاندنی پرەنسیپەکانی دیموکراسی لە هەرێمی کوردستان و چارەسەرکردنی کێشەکانی نێوان هەرێم و حکومەتی فیدڕاڵی، لەرێگەی گفتوگۆ.
سێیەم: ئیدانەی هەمو ئەو تاوان و دەستدرێژی و پەلامارانەی هەندێک لە یەکەکانی حەشدی شەعبی دەکەین، کە لەچەند ڕۆژی ڕابردو بەرامبەر هاوڵاتیانی دوزو کەرکووک و شوێنەکانی تر کردویانە و سوکایەتییان بە ئاڵای کوردستان کردوە. پێویستە حکومەتی فیدراڵی ڕێوشوێنی پێویست بگرێتەبەر بۆ کۆتاییهێنان بەوکارانە و تاوانباران ڕادەستی دادگا بکات و بڕیاری پێویست بدات بۆ ئاساییکردنەوەی باردۆخی دوزخورماتو و گەڕانەوەی ئاوارەکان و قەرەبوکردنەوەیان. نابێت ئەنجامدانی ڕیفراندۆم لەم کاتەدا بکرێ بە پاساو بۆ جێبەجێکردنی ئەجێندای دوژمنکارانە بەرامبەر گەلەکەمان و تۆڵەسەندنەوە لە هاوڵاتییانی کوردستان.
بزوتنەوەی گۆڕان
کۆمەڵی ئیسلامی کوردستان
19-10-2017
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 2,972 keer bekeken
Schrijf uw commentaar over dit item!