جەماوەری خۆڕاگری کوردستان!
کەسوکاری سەربەرزی شەهیدان!
چل و دوو ساڵ بەر لە ئەمڕۆ، هێشتا زۆر نەبوو شۆڕشی نوی خەباتی یەکێتی دەستی پێکردبوو، کاتیک شەهیدانی سەرکردە (شیهاب شێخ نوری، ئەنوەر زۆراب، جەعفەر عەبدولواحید)، کە لە زیندانی بەعسیە فاشیەکاندا بوون، بێ سڵەمینەوە، چوونە بەردەم پەتی سێدارەو دروشمە مەزنەکەی کەم ژیان، کەڵ ژیانیان کردە سەرمەشقی شەهیدبوون‌وبە ئازایەتی و جوامێریان وزەو تینیان دایەوە بە شۆڕش و فاشیەکانیشیان مایەپووچ کرد. هەر بۆیە ڕۆژی 21/11ی هەموو ساڵێک لە مێژووی گەلەکەماندا وەک ڕۆژی شەهیدانی #یەکێتیی نیشتمانیی کوردستان# تۆمارکراوە.
یەکێتی وەک هێزی ڕچەشکێن، کە بەرپرسیارێتی گەورەی مێژوویی، نەتەوەیی، نیشتمانیی لە ئەستۆ گرت، وەک هێزێکی شۆرشگیری ڕاپەرێنەری ئەرکە سەختەکان، لە مەیدانەکەدا بووە پشت و پەنای گەلەکەمان و مژدەهێنەری گزنگی خۆری سەرفرازی. هەر لەو ڕێگایەشدا بە هەزاران لە ئازاترین ڕۆڵەکانی لە سەنگەری پێشمەرگایەتی و کونجی زیندانەکاندا کردۆتە قوربانی و شەهیدبوون، بەجۆرێک نەڕۆژ و نە شوێن و نە سەنگەرو و نە قۆناغێکی کوردایەتی هەیە، کە خوێنی #پێشمەرگە# و تێکۆشەرانی یەکێتی تێدا نەکرابێتە خەڵاتی ئازادی و سەرفرازی کوردستان، کە دوایین کاروانیش سەدان فەرماندەو پێشمەرگە بوون، کە لە شەڕی ڕووبەروبونەوەی تیرۆریستانی #داعش#دا گیانی خۆیان بەختکرد.
ئێمە لە یەکێتیی نیشتمانیی کوردستان، هەموو شەهیدانی ڕێگای ڕزگاری کوردستان، بەبێ جیاوازی بە شەهیدی کوردستانیان دەزانین و بە تاجە گوڵینەی وەفا و ئەمەکداریەوە لە ئاست گلکۆکانیاندا سەری ڕێزو نەوازش دادەنەوێنین، خۆشمان بە خزمەتکاری خێزان و کەسوکارە سەربەرزەکانیان دەبینین.
شەهیدانی گەلی کوردستان بۆ گەلێک ئامانجی پیرۆز گیانی خۆیان بەختکرد، کە بەشێک لەو ئامانجانە بەدیهاتوون و زۆریشی هێشتا ماون و پێویستیان بە خەبات و قوربانیانی زیاتر هەیە بۆ بەدیهاتنیان.
لە بیرەوەری ڕۆژی شەهیدی شۆڕشی نوێی گەلەکەماندا، بە پێویستی دەزانین، کە وەبیر هەموولایەکی بهێنینەوە، بەتایبەتی کاربەدەستان لە پەرلەمان و حکومەتی هەرێمی کوردستان، کە هەموومان قەرزارباری لەدەستدانی ژیانی هاوڕێ و هاوسەنگەرە شەهیدەکانمانین خێزان و کەسوکارە سەربەرزەکانیان ئەمانەتی سەرشانی هەموومانن لەدابینکردنی ژیانێکی سەربەرزو شەرفمەندانە بۆیان. بۆیە ئەرکی سەرشانمانە، کە درێخی لە خزمەتکردنیان نەکەین.
لەم ڕۆژە پیرۆزەدا دووپاتی دەکەینەوە ئەرکەکانمان سەختن. لە ئاستی عێراقدا، سەرەتاکانی قۆناغێکی نوێ سیاسی بەدەرکەوتوون، ئومێدی چارەسەرکردنی کێشەکان باشترە، یەکریزی و تەبایی لایەنە کوردستانیەکان پێگەی کوردستان لە بەغدا بەهێز دەکات و هەوڵەکانیش بۆ ئاساییکردنەوەی دۆخی #کەرکووک# و #خانەقین# و ناوچە کوردستانیە دابرێنراوەکان بەگۆڕتر دەکات.
لە ئاستی کوردستانیشدا، کە هەنگاوەکان بۆ ڕێکەوتنی لایەنەکان بۆ پێکهێنانی کابینەی نۆیەمی حکومەتی هەرێم دەستی پێکردووە، باشترین وەفاداری بۆ شەهیدەکانمان، چارەسەرکردنی کێشەکان و بنەبڕکردنی گەندەڵی و چەسپاندنی دادپەروەری کۆمەڵایەتی و سەروەری یاسا و بەدامەزراوەیی کردنی حوکمڕانی و باشترکردنی گوزەرانی هاوڵاتیانە.
لە ئاستی یەکێتی –یشدا، وەفاداری بۆ شەهیدان، درێژەدان بە خەباتەکەیان و پابەندبوونە بە ڕێبازی سەرۆک #مام جەلال#، پاراستنی یەکێتی ناو یەکێتی و نوێیکردنەوەی ژیانی ڕێکخراوەیی و سازادنەوەی ئۆرگانەکان بۆ ڕاپەراندنی ئەرکە نیشتمانی و دیموکراسیەکان.
لەم ڕۆژەدا، پەیمان بە شەهیدەکانمان، کە گەورەترین و پیرۆزترین سەرماییەی مەعنەوی یەکێتی و گەلەکەمانن نوێ دەکەینەوە، کە درێژەپێدەری ڕێگاو ڕێبازەکەیان بین، کێڵی هەموو شەهیدەکان دوورنمای خەباتمانن، لە ئاستیاندا سەردادەنەوێنین.
- سڵاو لە ڕۆحی بەرزەفڕی سەرۆک مام جەلال ڕابەری شۆڕشی نوێ و کوردایەتیمان.
- سڵاو لە شەهیدانی یەکێتی و هەموو شەهیدانی کوردو کوردستان.
- سڵاو لە پێشمەرگە کۆڵنەدەرەکان، تێکۆشەرانی یەکێتی.
- سڵاو لە کەسوکاری سەربەرزی شەهیدان.
مەکتەبی سیاسی
یەکێتیی نیشتمانیی کوردستان
#20-11-2018#