خەلکێ شەرەفمەندێ پارێزگەها دهوک و دەڤەرا بادینان، ب هەلکەفتا هاتنا جەژنا رەمەزانا پیرۆز، جوانترین پیرۆزباهی یێن مە قەبیل بکەن، ئومێدەوارین جەژنا خێر و خۆشی و بەرەکەتێ بیت بۆ هەرێما کوردستانێ ب گشتی، ب هەموو پێکهاتێن وێ یێن ئایینی و نەتەوی ڤە.
جەژنا ئەڤ ساڵە یا رەمەزانێ، د دەمەکیدایە کو هەرێما کوردستانێ وەکو هەموو وەڵاتێن دەوروبەر و جیهانێ کەتییە بەر گەف و مەترسییا بەڵاڤبوونا ڤایرۆسێ کورۆنا، بهەوڵێن حکومەتێ و هەڤکاریەکا تمام یا وەڵاتیان، ڕێگریەکا باش ل بەڵاڤبوونا ڤایرۆسێ کوژەک هاتەکرن و هەتا نها کێمترین زیان و تووشبون ل هەرێما مە هاتینە تومارکرن، بڤێ هەلکەفتا پیرۆز، ژ خودایێ مەزن و دلۆڤان هیڤیخوازین ڤێ پەژیکێ بسەر خەلکێ مەدا دەرباز بکەت و پێکڤە ب سلامەتی ڤێ قۆناغێ دەرباز بکەین.
وەڵاتیێن بەرێز :-
هەرێما کوردستانێ یا کەتییە ژێر بار و فشارەکا داریی و ئابوورییا خراب و نالەبار، نەدابەشکرنا مووچێ فەرمانبەران و بلندبوونا ڕێژەیا بێکاریێ و ئالۆزبوونا ڕەوشا ژیان و ژیارا وەڵاتیان و ب تایبەتی خەلکێ مووچەخۆر و کێم دەرامەت، هەتا ڕادەکی یا گەهشتییە ئاستەکێ مەترسیدار، کو خەلکەکی دەست ب فرۆشتنا کەلوپەلێن ناڤمالیا خۆ کرییە بۆ دابینکرنا خوارن و دەرمان و پێدڤی یێن سەرەکی، و ژنەچاری وەڵاتی و فەرمانبەر و ماموستا، پەنایێ بۆ خۆپێشاندانێن مەدەنی و دورستکرنا فشارێ دبەن بۆ بدەستڤەئینانا مووچە و خانەنشینی و پاشکەفتێ مووچەی، کو سەرەکیترین مافێن وانن و ژێدەرێ ژیانا زارۆک و خێزانێن وانایە.
بهەلکەفتا جەژنا رەمەزانا پیرۆز، دووبارە داخوازێ ژ حکومەتا هەرێما کوردستانێ دکەین، لەزێ بکەت بۆ دیتنەڤا ڕێ و شێواز و میکانزمێن گونجای پێخەمەت دابینکرنا مووچێ فەمانبەر و ماموستایان، و پلانێن توکمە بێخیتە دبوارێ جێبەجێکرنێدا بۆ ئەنجامدانا چاکسازی و بنبڕکرنا گەندلیێ.
حزب و لایەنێن سیاسی و ڕێکخراوێن جڤاکێ سڤیل ل دەڤەرا بادینان
بناڤێ سەرجەم کادر و ئەندام و هەڤالێن ئێکەتی نیشتیمانی کوردستان ل سنورێ پارێزگەها دهوک، جەژنا ڕەمەزانێ ل هەوەیێن بەرێز و هەڤخەبات پیرۆز دکەین، هیڤیخوازین ئەڤ جەژنە ببیتە دەلیڤە بوو ئاشتبوونەڤا کۆمەڵایەتی، و بەرجەستەکرنا گیانێ لێبورینێ و هەڤدو قەبیلکرنێ، و پێکڤە کار بکەین بۆ پاراستنا دەستکەفت و بدەستڤەئینانا مافێن نشتیمانی و نەتەوی، و بەرپاکرنا ئازادیا ڕادەربرینێ و چەسپاندنا بنەمایێن دیموکراسیەت و مافی مرۆڤ، و بەرقەرارکرنا تێگەهێ هاوڵاتیبونێ و دابینکرنا مافێن مافخوازان.
دووبارە جەژنا هەموان پیرۆز بیت و هەموو ڕۆژێن هەوە جەژن و شادی بن.
مەڵبەندێ (4)ێ دهۆک یێ ئێکەتی نیشتمانی کوردستان
#23-05-2020#