قوماش 122
نووسینی: #ئوسامە جەمیل#

چەکدارەکە دەرکەی کردەوەو گۆتی: فەرموون! چووینە ژۆرێ و لە تڕومبێلی هاتینە خوارێ و چووینە ژۆرێ، بازۆ بە پێش کەتبوو، دیاربوو شاارەزای جێیەکەی بوو، لە پێش ژۆرەکی ڕاوەستاین، جاحێرەک ڕاوەستابوو، بازۆ پێیگۆ بڕۆ بە مستەر جۆرجی برێ بازۆ هاتیە، ئەویش چووە ژۆرێ و بڕەک پێچوو هاتە دەرێ و فەرمووی لێکردین، چووینە ژۆرێ و سەلاممان کرد، مستەر جورج هەستاوەو دۆقەی لەگەر کردین و بەخێراتنی کردین، بازۆ دەوری دە دەقەی بە سویدی قسەی لەگەر مستەر جۆرجی کردو بە دەستیش ئیشارەتی لۆمن دەکرد، ئەویش زۆر تەماشای دەکردم و سەری بادەدا، دیاربوو بە وەزعی من تێکچوو، جەڕەسەکی لێدا، جاحێرەکە هاتە ژۆرێ، مستەر جۆرج هەندە قسەی لەگەر کرد، ئەویش گێی دایێ و دوایێ چووە دەرێ، هەندەی نەبرد دوو زەلامیدی هاتنە ژۆرێ، دیاربوو ئەوانیش سویدی بوون، سەلامیان کردو دانیشتن، مستەر جۆرج زۆری قسە لۆ کردن و ئەوان گێیان دابووێ، دیاربوو باسی منیان دەکرد، ئەوانیش بێتاقەت بوون و سەریان بادەدا، پاشان ئەمنیان لەسەر کورسیەکی دانا، بابم عەللاگەکی پێبوو پڕی تەقریری دختۆرەکانی خۆمان بوو، دایە بازۆیی و گۆتی ئەوەشیان بدێ، بازۆ تەقریرەکانی دا مستەر جۆرجی، ئەویش وەریگرت و بە هوردی تەماشا هەمووانی کرد، ئەوجە بەهەر سێ دختۆران دەورەیان لەمن دا، هەموو لەشیان فەحس کردم، چاوو گێی و کەپوو و دەویشم، دەستیان برندو نوی دەکردم، پیاسەیان پێ دەکردم، هەندە ڕەسمیان پیشان دەدام و دەیانگۆ ئەوانە چیە، بازۆ ببووە موتەرجیم و قسەی وانی لۆمن دەکرد و قسەی منیش لۆوان، ئەمن بەخۆم نەمدەزانی مەسەلە چیەو لۆ ئەوها دەکەن، ئەسلەن بەشەکی زۆری قسەشم لەبیر کردبوو و بەبیرم نەدەهاتەوە، بەبابمیان گۆ لەگەر نان خواردنێ کووە؟ بابم گۆتی: باش نیە، دوو ڕۆژان نانی نەدەینێ نارێ نان، هەست بە برسیتی ناکا، گۆتیان خەوی کووە؟ گۆتی: لەکێ خەوی بێ لەوێ ڕاست پار دەداتەوە، جاری واشە لە ئاودەستی یەک سعاتی پێدەچی، بەزۆری دەریدەینین، ئەمە لەگەری خەریکین و وەکی مندارکی فێرە قسەی دەکەینەوە، خیدن و نووسینیشی بەبیر نەمایەو داک و بابیشی لێک ناکاتەوە، هەر ئەوەندەی دەزانی برێ ئەمن کێمەو ناوم چیەو خەرکی کێمەو لێرە چدەکەم!
ئەو سێ دختۆرە زیاتر لە دوو سعاتی خەریکی من بوون، لەگەر ئێکدی زۆر قسەیان دەکردو نەمان دەزانی چدەرێن، پاش فەحسەکی زۆر هورد، هەر سێکیان دانیشتنەوەو ئیشارەتیان دا بازۆی کەوا لۆ بابم تەرجوومە بکا، ئیدی مستەر جۆرج ڕووی لە بابم کردو دەستی بە قسان کردو گۆتی!

ئەو کوڕە سەری ئازاری پێگەییە لۆیێ ئەوهای لێهاتیە، پێدەچی لەوجێی لێ گیرابوو، کە مستەر بازۆ باسی کرد، لێیان دایەو ئەزیەتی سەریان دایە، لۆیێ مێشکی سفر بوویتەوەو هیچی بەبیر نەمایە، بێجگە لەوەش بە ئاسانی شتی تازە لە مێشکی خەزن نابی، ئەوە بە نەوعەکی چادەبی، ئەگەر حاڵەتەک دروست بوو، لێدانەکی گەورەتری بەسەری بکەوی و مێشکی لەگەر بجولێ، ڕەنگە ئەوکاتی هەرچی زانیاری سەر خانەکانی مێشکی هەیە دووبارە بێنەوە، ئەوە یەک، دووەمیش دەکرێ ئەمە لێرە خوولەکی ڕاهێنانی لۆ بکەینەوە و حەفتەی دوو جار بێتە ئێرە، ئەمە ڕاهێنانی پێدەکەین و وەکو مندارەک کە تازە لە داکی بووبی مامەڵەی لەگەر دەکەین، ڕەنگە لەماوەی شەش مانگ سارەک بتوانین کۆمەرەک شتی فێر بکەین، وەکو ئەوەی فێری هەندەک وشەو ڕستەی بکەین کە بتوانی ژیانی خۆی پێ تەرتیب بکاو بگووزەرێنی! مستەر جۆرج قسەی دەکرد و بازۆش تەرجومەی دەکرد، زۆرجار لەگەر تەرجومەکەی بازۆ هەردوو چاوی پڕی ئاو دەبوو، بەران نەیدەویست خۆی وا پیشان بدا، بابم زۆر بێتاقەت بوو، بەران پرسیارەکی کردو گۆتی: باشە دەکرێ ئەمە ژنی لۆ بینین؟ مستەر جۆرج گۆتی: خۆی هەموو ئەندامەکانی لەشی ئیش دەکا و کێشەی نیە، بەران کێشەی ئەوەی هەیە نازانی هەندەک ئەندامی کوو بەکار بینی، ئەگەر ژنیشی لۆ بینن، ئەوە کارەکە دەکەویتە سەر ژنەکەی، کوو فێری بکا ژیانی ژن و مێرداتی ئەنجام بدا، لە کۆمەڵگەی کوردیش ئەوە ئاسان نیەو ڕەنگە هەموو ژنەک ئامادە نەبی ئەو ئەرکە قورسەی باوێتە سەرشانی!
پاش ئەوەی بابم لە مەسەلەکەی گەیی، گۆتی: حەزدەکەم ئەنگۆ ناوی بنووسن و لێرە خولی ڕاهێنانی پێبکەن، بەشکوو فەرق دەکاو بەرەو باشی دەڕوا، بازۆ گۆتی: ئەمنیش هات و چووی پێدەکەم و نایێلم مەحتەل ببی لۆ هات و چووی، بابم گۆتی: وەڵلا کوڕم ئەزیەت مەخۆ، ئەمن بە دختۆر شێرۆی دەرێم هات و چووی پێبکات و مانگانە چشتەکی دەدەمێ! بازۆ گۆتی: شتی وانیەو ئەمن بەخۆم هات و چووی پێدەکەم، مستەر جۆرج گۆتی: ئەو فۆڕمەی پڕکەنەوەو هەموو زانیاریەکان بنووسن، بازۆ هەندی دەمێ هەموو پڕ کردەوەو دایە مستەر جۆرجی، مستەر جۆرج تەماشای کردو گۆتی: با لە حەفتەی دابێ هەموو دووشەم پێنج شەمان بێ، ئەگەر خەویشی باش نیە، با حەبەکی لۆ بنووسم، بابم گۆتی: ناوەڵلا خەوی زۆر باشە، مستەر جۆرج گۆتی: لە مارێ دائیم باسی ڕابردووی لۆ بکەن و ڕەسمی کۆنی پیشان بدەن و زۆر قسەی لەگەر بکەن و دائیم پرسیاری لێبکەن، چونکە ئەوەش لۆوی باشە!
بابم زۆر سوپاسی مستەر جۆرج و ئەوانیدی کرد و هاتینە دەرێ، سواری تڕومبێلی بووین و گەڕاینەوە، بازۆ گۆتیە بابم: ئەمن بە مستەرجۆرجم گۆ: ئەگەر لە ئەوڕوپای چارەی هەبی ئەمن هەوڵ دەدەم بیبەم، مستەر گۆتی: ئەوەی لێرە پێتان دەرێم، لە ئەوڕوپاش هەر ئەوەتان پێ دەرێن، بابم گۆتی: ئەمن درم زۆر ڕۆنەو ئەمەلم بەخوای گەورە زۆرە شفای ئەو کوڕەی من بدا، هەتا دەمرم دەست لە خوای بەرنادەم و هەر لەویش دەپاڕێمەوە فریای کەوی!

هەفتەی دوو جار دەچوومە ئەو بینایەی مستەر جۆرجی لێبوو، یان لەگەر بازۆی دەچووم یان لەگەر دختۆر شێرۆی، هەرچەندە هەستم نەدەکرد بەرەو پێش دەچم، بەران ڕاهێنەرەکان کۆڵیان نەدەداو هەستیان بە ماندی بوونێ نەدەکرد، زۆر خۆیان لەگەرم ماندی دەکرد، دەیانوویست هەرکووی هەیە گۆڕانکاریەکم بەسەر دابێ، هەندە شتیان بە شێرۆو بازۆی دەگۆ، دەیانگۆ لەمارێ ئەو ڕاهێنانانەی پێبکەن، لەمارێ بەبەردەوامی قسەیان لەگەر دەکردم و چشتی کەونیان بەبیر دەهینامەوە، ڕەسمیان پیشان دەدام و دەیانبردمە ئەو جێیانەی پێشترێ دیتبووم، بەران کێشەکە ئەوەبوو، ئەمن زۆر خاو بووم، زۆر جار هەندیان ماندی دەکردم، دادەنیشتم و تێر تێر دەگریام، داکم و بابم و بازۆش لەگەمن دەگریان!
ڕۆژەکی لەگەر دختۆر شێرۆی لە عەنکاوەی هاتینەوە مارێ، تەماشام کرد ژنەک و پیاوەک و کیژەکی جاحێر لەمارێمەنە، چاویان بەمن کەت، هەستانەوە، پیاوەکە باوەشی پێکردم و ماچی کردم، ژنەکەش سەری ماچ کردم و دوعای خێری لۆ کردم، کیژەکەش سەلامی لێکردم و زەردەخەنەکی لۆ کردم، داکم ئەمنی بردە ژۆرێ، جلکی گۆڕیم و هاتینە دەرێ و لەکنەوان دانیشتین، بابم گۆتی: کوڕم ئەوانە ناناسی؟ گۆتم: نەخێر! ئەوان هەرسێک تەماشا ئێکدیان کرد، داکم گۆتی: کوڕم ئەوە مامزی پلک و خەجەو بابینە، ئەوانە خزمی خۆمانن و بەینیان زۆر خۆشە لەگەرەمە، خەجە هەر تەماشای دەکردم، قونجرکەکی لە داکی داو ئیشارەتەکی دایێ، داکی چاوی لێ سۆر کردەوەو بێدەنگی کرد، دیاربوو داکم لەو ئیشارەتەی گەیشت و زۆر بێتاقەت بوو، بەران بەسەرەخۆی نەهینا، بابی خەجەی گۆتیە بابم: باشە هەتا ئێستا هیچ فەرقی نەکردیە؟ بابم گۆتی: بەرەو باشی دەڕواو ئیشاڵلا بەو زوانە دێتەوە سەرەخۆ! خەجە گۆتی: باشە خۆ دەست ناوەشێنی؟ بابم زۆر تێکچوو، گۆتی: لۆ کیژم ئەوە شێتە هەتا دەست بووەشێنی، ئەو قسانە چیە دەیکەی؟ پلکە مامز چەپەرۆکەکی لەسەری خەجەی گیرکردو گۆتی: هەی بابانت کۆربیتەوە ئەرێوەڵلا، نەخۆتکاو نە قسەتکا، سەر بەڕشک!
مایتی![1]

⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!