قوماش 128
نووسینی: #ئوسامە جەمیل#

دە دوازدە ڕۆژەک تێپەڕی و زۆرباش هاتمەوە سەرەخۆ، هەرچی شتی کەونبوو هەمووم بەبیر هاتەوە، چوونە ماری مام ڕەسوری لاسەیی و بەڕێکەتن لۆ چیایی و خیانەتی ئەو کەسەی تەسلیمی جاش و عەسکەری کردین، لەگەر ئەو هەموو تەعزیبەی لە دائیرەی ئەمن دەیندام، هەر لەو ماوەی سەرەکم لە شۆڕش و سەفینی دا، کۆمەرەک یادگاری کەونمان گێڕاوەو تێر پێکەنین، بابم زووزوو دەیگۆ بڕۆ دامەزرێ و ببە مامەستا، ئەمنیش ڕۆژەکی هەستام چوومە تەربیەی، فۆڕمەم پڕکردەوەو تەسلیمم کردن، گۆتیان حەفتەکی سەرمان لێدەوە، تەئکید ناوت دێتەوە، درم خۆشبوو بەوەی دادەمەزرێم، چونکە مەشغول دەبم و بەشەکی زۆر لە خەمەکانم لەبیردەکەم، هەرچەندە خەمی هەورینی لەبیر ناکرێ و ناکرێ، ئەمن بەشەکی مێشکم هەر لای هەورینی بوو، دەمگۆ دەبی ئێستا چبکاو وەزعی کووبی، لەگەر ئەو سەرۆک جاشە شۆڕشگێڕەی، دەبی خەم کوو پیری کردبی، ئەتوو برێی منداری لەو کابرایەی هەبی، دەبی بەرنامەی چبی و چبکا، بەو هەموو داڵغەو فکرو خەیارانە هاتمەوە لای مارێ، وەکی چوومە ژۆرێ، دەبینم پلکە مامز و مام حەمەدەمین و خەجە وا هاتینە مارێ، خەجە تەشتە هەویرەکی لەپێشەو قۆر و باسکی لێهەرکردیەو لەسەر چۆک دانیشتیەو هەویری دەشێلێ، ئەعسابم لێی نەما، بەران چونکە مێوانە، ناکرێ ڕوویم گرژکەم! هەرچاوی بەمن کەت قیت بۆوە، زۆر بەگەرمی ئەحواری پرسیم و گۆتی: وەی ئەگەر دەزانی چەند خەمی تووم بووەو چەندت لۆ گریایمە! خۆم پێڕانەگیراو گۆتم: ئەوجە ئەتوو لۆ لۆ شێت شوورەکی وەکی من دەگریای! خەجە ڕەنگی تێکچوو، داکم فریای وەزعەکەی کەتو گۆتی: دەبڕۆ کوڕم بڕۆ کن پلکم مامز و حەمەدەمینی مێردی، چوومە ژۆرێ و سەلامم کردو بەخێراتنم کردن، قیت بوونەوەو بە جوملە ماچبارانیان کردم، درخۆشی خۆیان زۆر دەربڕی بە چابوونەوەی من، ئەمنیش مەمنوونیان بووم و لەنێزیک مام حەمەدەمینی دانیشتم، بابم گۆتی: کوڕم چتکرد؟ گۆتم: فۆڕمەکەم پڕکردەوەو گۆتیان حەفتەکیدی وەرەوە ناوت دەردەچی! مام حەمەدەمین گۆتی: چیە دەرێی بەتەمای بچیە خاریج؟ گۆتم: ناوەڵلا، لۆ وەدەرێی؟ گۆتی: ئەدی نارێی بۆڕمم(فۆڕم)پڕکردتەوە؟ گۆتم: ناوەڵلا ئەوە لۆ تەعین بوونێیە، قەولە ببمە مامەستا، گۆتی: ڕەبی خوا موبارەکیکا، مادام دەبیە معاشخۆر دەبی ژنەکیش بینی، دەوجە بتبینم نەتناسم! بابم ویستی نەیقەومێنم، گۆتی: ئا ئا، ئیشاڵلا بەو زووانە هیممەتەکی لۆ دەکەین!
داکم سفرەی ڕاهێخست و نان داندرا، کفتەی بە کوردیە زەردی لێندرابوو، هەرمی لەسەر هەردەستا، گۆتم: ئەی دەستت خۆشبی دایە، دونێ ویستم برێم حەزم لە کفتەیە، پلکە مامز هەریدایێ و گۆتی: ماشەڵلا لەکاری خوای، بڕۆنێ کوو دری خەجەو مامەستای ئێکە، دونێ گۆتی: دایە سبەینێ با بچینە سەرەکییان لێدەین و کفتەکی بە کوودیە زەردی لێنێین و لۆیان ببەین! زەوق و میزاجم بە جارەکی تێکچوو، ئەگەر لەبەر عەیبەی نەبایە و ئەوان مێوانی مەبوون، وازم لە کفتەی دەهینا!
هێشتا نانمان بەتەواوی نەخواردبوو، لە دەرکەی درا، داکم ویستی بچی بکاتەوە، گۆتم: ئەمن دەچم، هەستام بچم دەرکەی بکەمەوە، گەیشتمەوە دەرکەیی و کردەوە، هەردوو چاوم زەق بۆوەو شاگەشکەبووم، چونکە قەت لەو باوەڕەی دانەبووم بەو وەختەی ئەو مێوانەم بێ!

نەمزانی چبرێم و دەوم تێکگیرا، باشبوو ئەو فریام کەت و بەچاوی پڕ لە فرمێسک گۆتی: پرتەقار دەمناسیەوە؟ گۆتم: کوو ناتناسمەوە، ئەتوو ئاگری هەناوم و فرمێسکی چاوم و خینی ناو درم و هەناسەی سییەکانمی! بەینەکی باش داماو دوایێ گۆتی: دەرێی نارێی فەرموو! گۆتم: فەرموو، فەرموو! چووینە ژۆرێ، وەکی داکم چاوی بە هەورینی کەت، پارووی دەوی ڕاگرت و قیت بۆوەو بە بێدەنگی تەماشای کرد، پلکە مامز و خەجە و مام حەمەدەمین تەماشا ئێکدییان کرد و سەرەکیان بادا، باشبوو داکم گۆتی: دەفەرموو کیژم فەرموو، گۆتییە بابیشم، ئەوە هەورینۆکەیە هاتیە! بابم هەستاوەو گۆتی: کیژم بەخێراتی، دەفەرموو فەرموو، هەورین چووە پێش و سەلامی کرد، وەراممان داوەو بابم گۆتی: وەرە کیژم لەکنە من دانیشەو پارە نانەکی بخۆ، گۆتی: زۆر مەمنون هەر هاتم سەرەکتان لێدەم و دریشم زۆر خۆشبوو کە خۆشی گەڕاوە ناو مارێ! گۆتم: دە فەرموو دانیشە، خۆ ناکرێ هەر ئەوها بە پێوە ڕاوەستی! گۆتی: ناوەڵلا زۆر بە پەلەمەو دەبی بڕۆم، با تووشی کێشەکی نەبم، مهیم ئەوەیە ئەنگۆم دیت! خەجە تەماشا هەورینی دەکرد و لچولێوی بادەدا، وەکی برێی وەزعەکەی بەدری نەبوو، هەرچی هەورینە زۆر گێی بەوی نەدا، هەر ئەوەندەیگۆ: ئیشاڵلا لەوەختەکیدی دێمەوە، مێوانتان هەیەو با زیاتر وەختتان لێنەگرم، ئەمن دەڕۆم و خواحافیز، جەماعەت خواحافیزییان لێکردو ئەمن لەگەری چووم هەتا دەرکەی حەوشێ، پێشی بچتە دەرێ، ڕووی تێکردم و گۆتی: گێبدەمن، ئەگەر ئەمن شتەکم لێهات گەردەنم ئازاکە، وای لۆ دەچم، ئەوە ئاخیر جاربی ئێکدی ببینینەوە! گۆتم: لۆ ئەو قسەی دەکەی، ئەتوو بەتەمای چی؟ گۆتی: بەخۆم دەزانم چدەکەم، ئەتووش لەوەختی خۆی دەزانی، ئەگەر ئەمن نەمام و ئەو سەرۆک جاشە ما، نەکەی لێبگەڕێی خینم بفەوتێ، تۆرەم بکەوە ئەگەر لەوپەڕی دنیاش بی!
زۆرم لەگەر هەورینی حەولدا بێ فایدەبوو، زۆرم پێگۆ: توخوا شتەکی مەکە، ئەمنیش تووشی کارەسات بم، گۆتی: بڕیاری کۆتاییم دایەو بەس هاتیمە پێت برێم، ئیدی ژیان لەکنەمن هیچ مەعنایەکی نەمایە، ئەمن یەکجار بمرم و کۆتاییم پێبێ باشترە، لەوەی هەموو دەمێ بمرم و بمرم! هەردوو چاوم پڕی فرمێسک بوون و گۆتم: ئەگەر ئەتوو شتەکت لێهات، ئەوە باش بزانە ئەوەی دەمری ئەمنم نەک ئەتوو، مردنی توو مردنی منەو ژیان پاشی توو مردنەکی پڕ خەم و ئازارە، کلینسەکی لەناو جانتای دەریناو فرمێسکی هەر دوو چاوی سڕیم و گۆتی: گەردەنم ئازاکە، پشتی تێکردم و ڕۆیی، بەدووی داچووم و زۆری لێپاڕامەوە شتەکی نەکا ئەمن بفەوتێنی، فایدەی نەبوو، سواری تڕومبێلی بوو و لێیدا ڕۆیی!

بەخەمباری چوومەوە ژۆرێ، داکم هەستی بە شتەکی کرد، بەران لەبەر مێوانەکان نەیوویست قسانبکا، چووم لەسەر کورسییەکی دانیشتم و دەستم بە نیوچەوانم وەنا، مام حەمەدەمین گۆتی: لۆ نایێی کفتەکەی تەواوکەی، خۆ ئەوەی لە قاپی هوردت کردیە، مایە! گۆتم: بەزیادبی تێرم خوارد، دەستی کابانی خۆشبی، خەجە گۆتی: دەترسێم ئەو ژنە سەر مازیلکەی هاتە ژۆرێ ماحیدەی(معدە)گرتبی، لۆیێ هیچت پێنەخورێ، پلکە مامز گۆتی: وەپێدەچی، ئەو نەوحانە(نەوعانە)بەس دەزانن تەبیحاتی(تەبیعات) پیاوی بگرن، چما هەونکە بیکوژی پیارە چایەکی پێ لێدەندرێ! توڕەبووم و هەستام چوومە ژۆرەکەی خۆم و لێمپارداوە، هەر فکرم لەوەی دەکردەوە، دەبی هەورین بەتەمای چبی، لۆ ئەو قسەی کرد، باشە ئەتوو برێی مەخسەدی کووشتنی ئەو سەرۆک جاشەی بی، باشە کوو ئەو ئیشەی پێدەکرێ، کوو بیگەمێ و نێلم ئەو ئیشەی بکا، ئاخر باش دەزانم تێدەچی!
لەو خەیارانە دابووم، داکم هاتە ژۆرێ، گۆتی: کوڕم عەیبە، هەستە وەرە ئەودیووی و لەگەر ئەو مێوانانە دانیشە، ئاخر ئەوانە لەبەرەتوو هاتینە، گۆتم: دایە، توخوا ئەوە قسەبوو کردیان، کەس نەما قسەی لەسەر بکەن هەورین نەبی! گۆتی: دەتێمبگەینە بزانم هەورین لۆ هاتبوو، باشە وەکی ڕۆیی، ئەتوو لۆ ئەوها تێکچووی، دەپێمبرێ بزانم چیپێگۆتی؟ گۆتم: دایە هیچ نیە، گۆتی: کورە کوڕم کوو هیچ نییە، ئەتوو هەستە لە نەینۆکی تەماشای خۆتبکە، چما ڕوحت لەبەرمایە! پێم باشبوو قسەی لۆ داکم بکەم و بزانی چ ڕوودەدا، لۆیێ گۆتم: دوعای بکە هیچ ڕوونەدا، وا هەستدەکەم هەورین بەتەمای چشتەکیبی! داکم شەپەکی لە سینگیداو گۆتی: ئەی کۆرەبم، هەورین بەتەمای چیە؟ گۆتم: پێی نەگۆتم، بەران گۆتی: ئەگەر شتەکم لێهات گەردەنم ئازاکە، داکم ڕەنگی پەڕی و گۆتی: هەبی و نەبی دەیەوێ زەڕبەکی لەو سەرۆک جاشەی بدا، وەڵلاهی ئەوجارە هەر شتەک ڕووبدا، ئەو سەرۆک جاشە ئاگر لەماریمەش بەردەداو ئەوەی ڕوحی لەبەربی دەیکوژی! گۆتم: جارێ لەگەر بابم قسان مەکە، هەتا بەخۆم بە هێوری پێی دەرێم! گۆتی: باشە کوڕم باشە، دەهەستە وەرەکن مێوانەکان، گۆتم: بەسەرچاو دایە، وا لەبەر خاتری توو دێم!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!