بابەت: هەڵبەست
نووسین: #سەیدی هۆرامی#
ئەم هۆنراوەیە، دەچێتە خانەی ڕېبازی ئەدەبی کلاسیکی کوردییەوە، شاعیر بەشێوەزاری گۊرانی- هۆرامی هۆنراوەکەی نووسی وە:
لە ڕووی ڕووخسارەوە ئەم تایبەتمەندییانەی هەیە:
1- بەکېشی عەرووزی عەرەبی نووسراوە.
2- هەموو هونەرەکانی ڕەوانبێژی بە پێی پێویستیی هۆنراوەکە، تێدا بەکارهاتوە. (بەکارهێنانی وشەیەک، بۊ زیاد لەواتایەک).
3- سەروای یەکگرتوە پەیڕەوکراوە، واتە (یەکێتی سەروای پاراستییەوە)
4- یەکێتی بەیت و بابەتی پاراستوە. واتە هەموو هۆنراوەکە وایەکی هەیە و هەر دێڕەش واتای تایبەتی خۆی هەیە.
5- وشەی بێگانەی تێدا بەکارهاتوە، بە تایبەت وشەی (عەرەبی، فارسی و تورکی).
6- دووبارەکردنەوەی نازناوی شاعیر لە دوا دێڕدا، یا پېش دوا دێڕی هۆنراوەکە.
$وە یادی ساڵان$
وە یادی ساڵان، وە یادی ساڵان
دڵە تۊ بە یاد وېیەردەی ساڵان
وەس نیشە خەمناک چەنی خەیاڵان
با بشمێ وە سەیر بارگەی «عەوداڵان»
کۊمای خەرمانان خەم دانت وە هەم
نیشتەنی جەلاش پەژارە و ماتەم
بای شەماڵ نېیەن بدەیش وە باوە
تاکەی سەرگەردان مەبیش وەلاوە
عەوداڵان بەرزەن، شەماڵش تێزەن
نەسیمش بۊی عەتر عەنبەر ئامێزەن
با کۆگای خەمان هۆرگېرمێ بە کۊڵ
بەرمێش وە کۆی بەرز عە وداڵانی چۆڵ
چەوگە ئېمە و تۊ هەردوېما بە هەم
بڎەیمۍش وە باد، بە «کەم» کەرمۍش کەم
دڵە تۊ سادار دېوانەی وێڵی
جانشینی قەیس بېیابان گېڵی
نیشتەیت بێ سوودەن جە ماڵانەوە
با بشمێ وە کۆی عەوداڵانەوە
ئەر پەی وایەی دڵ وەر پەی سەوابەن
سەیری عەوداڵان پەی ئېمە بابەن
سەیری سەر بەرزان گەشتی سەر کاوان
شادی خەمانەن، ڕۊشنی چاوان
سا با ڕاگەی چۆڵ بگېرمێ نە وەر
تەی کەرمۍ هەردان، کەش و کۆو کەمەر
جە هیچ مەنزڵێ نەگېرمێ قەرار
تا بشمێ وەبان پای دامانی غار
وەبانی ئەو تەخت حاجەت نما کەین
پەی وایەی موراد دەست بە دۆعا کەین
بشمێ نە ئەیوان غاری هەیبەتناک
تەکیەگای خاسان ئەوداڵانی پاک
دوو دەست پەی دۆعا هۆردارمێ گوشاد
«یا حیّ»، «یا قیّوم»، دەهندەی موراد
بە عەشقی ڕەسوول شای «یڤرب» مەقام
بە شەوق و نووری ئەسحابان تەمام
بە عەشقی بازووی درازی «حەیدەر»
زۊر ئەرمانای دەرب دەروازەی «خەیبەر»
بە عەشقی خاسان دڵپاکانی ساف
نەڕووی سەرزەمین جە قاف هەرتا قاف
«یا ڕجال الغَیب»، یا هەفت عەوداڵان
جە کۆی «پیر ڕۊسەم»، هەم جە «کۊساڵان»
یا ئەوداڵ فەریاد، نامت مەشهوورەن
هیممەت یار کەری کار بە زەروورەن
سەودای عەشقی یار ها نە کەللەمدا
وستەناش نە گێج دەریای ماتەمدا
خەریکی خەمنا، خەم خەڵاتەنان
دوور جە یار کەفتە، کش و ماتەنان
زام زەدەی دەوران هیجرانی یارم
سەد عوقدە پەرێش کەفتەن نە کارم
چوونکە بەد ئیقباڵ سیا ستارەم
سەنگی بەدبەختی نەخشەن نە چارەم
ئەر بشوون وەلای ئەفلاتوونی ژیر
پەی دەوای دەردم ئاد مەوەرۆ گیر
ماچۆ تۊ بە عەشق سەد پارە جەرگەن
دەوای دەردی تۊ وەسڵەن یا مەرگەن
یا شاهی شاهان، یا حەیی خاسان
ئاسان کەی کارم بە دەستی ئاسان
هەر من بێ چارەم یاڵڵا چارم کەی
خاتر شاد بە وەسڵ باڵای یارم کەی
ئارەزووی دڵان یەکسەر حاسڵ کەی
دۆست بە دۆستی وېش بە خەیر واسڵ کەی
سەیدی دڵ پوڕ ئێش، جگەر پوڕ زامین
«يا الله» دۆعاش قبووڵ کەی، ئامین
[1]