تەمسيلی ئاڵوگۆڕکردن
خوان خۆسێ ئەڕييۆلا
وەرگێڕ: #ئارام ڕەشيد#

گاليسکە ڕەنگاوڕەنگەکانی پياوە بازرگانەکە بەدەم جاڕدانی: هاوسەرە بەتەمەنەکانتان بۆ دەگۆڕمەوە بە هاوسەری گەنج. بەناو کۆڵانەکانی گوندەکەدا دەگەڕان.
ڕێکەوتن لەسەر نرخە جێگيرەکان، خێرا ئەنجام دەدرا و کەسانی نەشارەزا گەرانتينامەيەکيان وەردەگرت. بە قسەی پياوە بازرگانەکە، گشت شۆخەکان عەيارە بيست و چوار بوون. سەرجەميان سپی پێست و قژزەرد بوون. تەنانەت ئاڵتوونيی بوون.
ئەو خەڵکە، بە بينينی ئەو شۆخانەی کە بە نسيبی هاوسێکانيان بوو بوو، بەدوای پياوە فرۆشيارەکەدا ڕايان دەکرد. زۆربەی زۆريان لەم مامەڵەيەدا زيانيان کرد. پياوێکی گەنج کە تازە هاوسەرگيريی کردبوو لە بەرانبەر هاوسەرەکەی، يەکێک لەو شۆخانەی وەرگرت. ژنەکەی خۆی چاک بوو و دەيتوانی لەگەڵ هەر کام لە ئەوان کێبرکێ بکات، تەنيا جياوازی ئەوە بوو کە وەکوو ئەوان قژزەرد نەبوو.
لە کاتی تێپەڕينی گاليسکە ڕەنگاوڕەنگەکان، من لەبەر پەنجەرەکە ڕاوەستابووم و دەلەزريم. شۆخێکی نوستوو کە لە بەينی پەردە و قاڵيچەکاندا بە پڵنگێک دەچوو، وەکوو ئەوە وا بوو نيگام بکات. منيش تووشی ئەو پەتايە بووبووم. خەريکبوو لە پەنجەرەکەوە خۆم فڕێبدەمە خوارەوە، بەڵام تەريقبوومەوە و لە پەنجەرەکە دوورکەوتمەوە، پاشان ئاوڕم دايەوە تاکوو لە سۆفيا بڕوانم.
سۆفيا لەسەرخۆ بوو، لەسەر دەستەسڕێکی نوێ، هەمان گوڵدۆزييە هەميشەييەکانی خۆی دەکرد. گوێی بە هاتوهاوارەکەی دەرەوە نەدەدا. تەنيا من کە دەيناسم، دەمزانی کە بە شێوەيەکی هەستپێنەکراو، نەختێک ڕەنگی پەڕيوە. پياوە بازرگانەکە لەوسەری کۆڵانەکە بۆ دوايين جار، جاڕی پێشنيارەکەی دايەوە: هاوسەرە بەتەمەنەکانتان بۆ دەگۆڕمەوە بە هاوسەری گەنج. بەڵام من کە پێم چەقيبوو بە زەوييەکەدا، گوێچکەکانم بەڕووی ئەم بانگهێشتەدا داخست. لە دەرەوە، خەڵکی گوندەکە هەوای ئاوێتە بە بێئابڕووييان ڕا دەدايە دەرەوە.
من و سۆفيا، بێتوانا لەوەی کە بچووکترين تەفسيری پێشهاتەکە بکەين، لە بێدەنگييەکی ڕەهادا نانمان خوارد، بەڵام دواجار بەدەم کۆکردنەوەی دەفرەکانەوە پرسی: بۆچی منت نەگۆڕييەوە بە ژنێکی تر؟
نەمزانی چ وەڵامێکی بدەمەوە، هەردووکمان ڕۆچووينە ناو بێدەنگييەکی قووڵەوە و خێرا پەنامان بۆ سەرجێگە برد، بەڵام کەسمان نەمانتوانی بخەوين. جودا لە يەکتر و کڕ و بێدەنگ ڕاکشاين، ئەو شەوە يار و ياوەری تابۆکان بووين.
لە دوای ئەوە، ئێمە لە دورگەيەک بچووکی چۆڵ دەژياين کە پڕ دەنگەدەنگترين خۆشبەختييەکان ئابڵۆقەی دابوو. گوندەکە، بە کولانەيەک دەچوو کە تاوسە شاهانەکان دەستيان بەسەردا گرتبێت. شۆخە تازەکان، بێکار و سێکسی، بەدرێژايی ڕۆژ لەناو جێگەکانيان پاڵکەوتبوون. دەمەو خۆرئاوا، درەوشاوە وەکوو ئاڵای ئاوريشمين، ئاڵتوونيی لە ژێر دوايين گورزە تيشکەکانی ڕۆژدا، دەردەکەوتن.
مێردە گوێرايەڵەکان، بۆ يەک دەقەش ژنەکانيان جێنەدەهێشت. دڵخۆشانە ماڵکاول بووبوون، لە کاروبارەکانيان غافڵ بووبوون و بە هيچ کلۆجێک بيريان لای سبەی نەبوو.
من لە پێش چاوی هاوسێکان گەمژە دەمنواند، ئەو چەند هاوڕێيەشی کە هەمبوون، لەدەستم دان. هەمووان وايان دەزانی دەمەوێت وانەيەکيان پێ بدەم و نموونەی پووچی وەفادارييان پێ نيشان بدەم، بۆيە ناوناتۆرەی ناشرينيان خستە پاڵم. دواجار منيش لەو بەهەشتی چێژوەرگرتنەدا، خۆم بە خەساو دەزانی.
سۆفيا وردە وردە، بێدەنگتر دەبوو. خۆی لەوە دەدزيەوە کە لەگەڵ من دەربکەوێت، تاکوو پێش بەو بەراوردکردنە بێتامە بگرێت کە لە دەرەوە هەبوو. بەڕاستی خەممان لەو خۆشەويستييە ناچيزە خێزانييە دەخوارد.
حاڵەتی مەحکومبوونی ئەو لە هەموو شتێک زياتر هەستی سووکايەتيکردنی پێ دەبەخشيم. ئەو خۆی بە خەتاباری ئەو بابەتە دەزانی کە منيش هاوسەرێکی وەکوو ئەوانی ترم نييە. هەر لە سەرەتاوە خۆی قايل کردبوو کە ناتوانێت کەڵکەڵە دەروونييەکانم لێ دوور بخاتەوە. لە بەرانبەر شۆخ و شەنگی داگيرکەرەکاندا، قڕوقەپ تاکوو دوايين سەنگەری هەستەکان پاشەکشەی کردبوو. منيش ئەو پاشەکەوتە ناچيزەی خۆمم خەرج کرد تاکوو متوموورو، عەتر، ئاڵتوون و کراسی بە دياريی بۆ بکڕم.
سۆفيا دەيگوت: بەزەييت پێمدا نەيەتەوە.
پشتی دەکردە هەموو ديارييەکان. ئەگەر بمويستبا بيلاوێنمەوە، دەمودەست هانکە هانکی گريانی بەرز دەبووەوە: هەرگيز لەبەر ئەوە ناتبەخشم، کە نەتگۆڕيمەوە.
لەسەر هەموو شتەکان لۆمەی دەکردم. سەبروتەحەمولم نەمابوو. ئەو ژنەی کە بە پڵنگ دەچوو مێشکی داگيرکردبووم، بۆيە لە ناخی دڵەوە تەمەنام دەکرد پياوە بازرگانەکە بگەڕێتەوە.
بەڵام ڕۆژێک، شۆخە ئاڵتوونييەکان دەستيان کرد بە ژەنگهەڵهێنان. ئەو دورگە بچووکەی تێيدا دەژياين بووبوو بە کانياوی ناوجەرگەی بيابانێک. بيابانێکی پڕ لە هاواری دڕندانەی ناڕەزايەتی. پياوەکان کە بەڕاستی کوێر بووبوون، هەر لە سەرەتاوە تێبينی ژنەکانيان نەکردبوو. هەر بەڕاستی سەيريان نەکردبوون، تەنانەت بيريان لەوەش نەکردەوە کە کانزاکانيان تاقی بکەنەوە. ئەو ژنانە، ئەوە هيچ کە نوێ نەبوون، بەڵکوو دەستی دوو و دەستی سێ بوون، يان بەس خوا دەزانێت دەستی چەندەم بوون. پياوە بازرگانەکە بەس تەعميراتێکی پێويستی تێدا کردبوون و ئەو زاخاوی ئاڵتوونەش کە لێی دابوون هێندە تەنک بوو کە بەرگەی يەکەم بارانی نەگرت.
يەکەمين پياو کە بەمەی زانی، وای نواند پەی بە هيچ شتێک نەبردووە. پياوی دووهەميش هەر وای کرد. بەڵام پياوی سێهەم کە عەتار بوو، ڕۆژێکيان بۆنی سولفاتی مسی لە بەرامەی ژنەکەيدا ناسيەوە. ئەو بە هەستێکی تەسەورنەکراوەوە تاقيکردنەوەيەکی وردی کرد و پەڵەی گوماناويی لەسەر پێستی ژنەکەی بينی. دەستبەجێ ئەم مەترسييەشی ڕاگەياند.
وەکوو ئەوەی نەخۆشييەکی گوازراوە لەناو ژنەکاندا بڵاوبووبێتەوە، بەخێرايی نيشانەگەلێک لەسەر سيمايان دەرکەوتن. پياوەکان عەيب و عاری ژنەکانيان لە يەکتر دەشاردەوە، بەڵام لە ناخەوە ئەو بەدگومانييەی بەرانبەر ئەم کەموکووڕييە هەيانبوو، ئازاری دەدان. وردە وردە هەقيقەتەکە ئاشکرا بوو و هەر کەس دەيزانی کە يارو ياوەرێکی نائاياسيی بەنسيب بووە.
زاوا گەنجەکە کە ئێجگار بەو مامەڵەيە خرۆشابوو، قووڵ تووشی سەرلێشێوان بوو. ئەو پەيکەرە سپييە گوماناوييەی داگيری کردبوو، هەر زوو نيشانەگەلێکی تێدا دەرکەوتن. ڕۆژێک بە ئەسيدێکی سووتێنەر لەسەر پاشماوە ئاڵتوونييەکەی دەستيکرد بە وێنەکێشان و کاتێک بينی ژنەکەی بووە بە مۆمياييەکی ڕاستەقينە، دەستی لێ هەڵگرت.
لەو کاتەدا بوو کە من و سۆفيا بووينە جێی ئيرەيی پێبردنی ئەوانی تر. لە بەرانبەر مەترسی سيتايشکردنی هەمووان، هەستم کرد ئيحتيات واجبە، بەڵام سۆفيا دڵخۆشيی و ڕازيبوونی خۆی بەباشيی نەدەشاردەوە. لە جياتی ئەوەی ڕێز لەو خۆپارێزييە بگرێت کە من گرتبوومە بەر، نەيدەتوانی پێش بە خۆی بگرێت و بە جوانترين جلوبەرگ و متومووروەکانيەوە لە ماڵ نەچێتە دەرەوە، کە لە کاتێکدا وا دڵتەنگکەردا وروژێنەر بوو. سۆفيا وای دەزانی ئەگەر من ويستبێتم لەگەڵ ئەو بمێنمەوە، هۆکارەکەی تەنيا و تەنيا ترس بووە، ئەگەرنا مەيل بۆ ئاڵوگۆڕکردن لە منيشدا هەبووە.
ئەمڕۆ گرووپێک لە پياوە خەڵەتاوەکان، بۆ دۆزينەوەی پياوە بازرگانەکە گوندەکەيان جێهێشت. مشتيان لە ئاسماندا ڕادەوەشاند و سوێنديان دەخوارد کە تۆڵەی خۆيان دەکەنەوە. ژنەکان جلی پرسەيان لەبەر کردبوو، ژاکاو و ماتەم، بە گەڕوگولەکان دەچوون. تەنيا پياوێک کە ماوەتەوە ئەو زاوا گەنجەيە، کە هۆکاری مانەوەکەی بنيادەم پەرێشان دەکات. ئەو کە ئێجگار وابەستەی شۆخەکەی بووە، ئێستا بانگەشەی ئەوە دەکات بەرانبەر ژنەکەی کە ئێستا ئيتر تەواو ڕەش هەڵگەڕاوە، تاکوو مردن بەوەفا دەبێت. ئەو ژنەش هەمان ئەو شۆخەيە کە ئەو بە ئەسيدی سولفوريک سەراپای ڕەش کردووە.
نازانم لەگەڵ سۆفيا چۆن دەژيم، لە کاتێکدا کە نازانم گەمژەيە يان خۆپارێز. بەدڵنياييەوە بەم زووانە ژمارەی ستايشکارەکانی کەم دەبێتەوە. بەڵام حاڵی حازر ئێمە لە دورگەيەک دەژين کە لە هەموو لايەکەوە تەنيايی ئابڵۆقەی داوە. پياوەکان پێش ڕۆيشتن ڕايانگەياند تاکوو دۆزەخ بەدوای ئەو قۆڵبڕەدا دەڕۆن. کاتێک وايان دەگوت، هەر بەڕاستی قەڵافەتێکی دۆزەخييان هەبوو.
سۆفيا بەو ڕادەيەش ئەسمەر نييە کە دەردەکەوێت. لەبەر تيشکی گڵۆپەکە، سيما خەتووەکەی بە هۆی تيشکدانەوەی ڕووناکييەکەوە گيانی وەبەر دێت. هەر دەڵێی بيرکردنەوەگەلی ئاڵتوونيی و لووتبەرزانە لە خەونەکانيەوە فيچقە دەکەن.[1]