بابەت: ڕامیاری
نووسین: #لەتیف فاتیح فەرەج#
یەکەم/
بەرلەماوەیەک یەک دوو وتارم لە سەر سەرۆک کۆماری عیراقی فیدراڵ و پرسی کەرکووک و مەسەلەی کورد نووسی، دۆستێک دیاربوو بە دنە دانی خەڵکانێک پێی ووتم ئه و وتارانە دەچنە خانەی پیاهەڵدانەوە لە کاتێکا وتارەکان سەرنج و ڕەخنه و تێبینی و بەرچاوڕوونی بوون، کێشەی ئێمە لە باشوری کوردستان ئەوەیە دەبێت بە میزاجی حزب و کەس هەڵسەنگاندن و خوێندنەوە بۆ ئەوانی تر بکەین، یانی ئەوان گەرەکیانە لە چاوی خۆیانەوە سەیری دنیاو ئەوانی تر بکەین، لە کاتێکا خۆمان خاوەنی چاوو بیرکردنەوه و ئاوەزی خۆمانین.
جێی سەر سوڕمانە مرۆڤی کورد یان بەشێک له و بوونەوەرە ئاوا هەنگاو بنێت هەرکات لە کەسێک بخۆی یان خواستەکانت بە دیبێنێ ئیتر ئەوە مرۆڤی باڵایه و هەر کات پشتت تێکرد دەبێت بیدەیتە بەر تانه و تەشەر، ئەم ڕوانینە کوردیە لە هیچ کوێی تری دنیادا نیە، لای کورد نەبێت.
دووەم/
لە 2003ەوە تا ئێستا عیراق سێ سەرۆک کۆماری کوردی هەبووە، قسە لە جیاوازی و هەڵسەنگاندنی ئەوان ناکەم، قسە لەوەش ناکەم ئەمە بۆ وڵاتێکی وەک عیراق دیاردەیەکی دەگمەنە، باسی دەسەڵات و هەست و کەوتەکانیشیان ناکەم، قسەم لە سەر ئەوەیە ئەم سێ سەرۆک کۆمارە هەرسێکیان زۆرتر تیری نەیارو دژەکانیان لە نەتەوەکانی تر ئاراستەیان کرا، یان تیری خۆمانە، ئامانج له و هەموو نەیاریە کوردیە بەوان چیە، بۆچی لە بری پاڵپشتی و هاوکاری بەردەوام سەنگەریان لێگیراوە، بە تایبەت سەرۆک کۆماری ئێستا کە هەر لە سەرەتاوە کوردزمانەکە خۆی لێی چووە سەنگەرەوه و هەوڵی شکاندنی دا، کەچی هەر ئه و کوردەش لێره و لەوێ داوای زیاتر له و دەکات، تا ئه و ڕادەیەی داوای کاری نەکرده و خورمشی لێدەکات و دەڵێت دەبێت هەڵوێستی هەبێت.
لەلایەکەوە دەیشکێنێ و لە لایەکی دیکەشەوە داوای پاڵپشتی و هاوکاری لێدەکات، ڕاستی سەرۆک کۆمار هەرچی بۆ میلەتەکەی خۆی بکات دەکرێ وەک ئەرک و بەرپرسیارەتی و ئاکاری مرۆییانە سەیر بکرێت، لێ لەگەڵ ئەوەشدا خۆ دەبێت لە بری دژایەتی و سەنگەر لێگرتن لانی کەم وەک نوێنەری کورد لە عیراقدا چاوی لێبکرێت.
سێیەم/
ئەوەندەی من ئاگادار بم لە سەر پرسی هەرێمی کوردستان، پرسی پێشمەرگە، پرسی بودجەی هەرێم و هەموو ئه و بابەتانەی پەیوەندیان بە هەرێمی کوردستانەوەیە سەرۆک کۆماربێدەنگ نەبووە و بەردەوام قسەی خۆی هەیە، کێشەکە لە هەرێمەوەیە، هەرێم پێیەکی لە ئەستەنبوڵ و پێیەکی لە شوێنێکی تره و ڕووی دەمی لە بەغدا، ئەمەش لە تەک لۆژیک و ئاوەزا نایەتەوە، هەرێم سیمای حکومەتێکی پڕزەبرو زەنگ و پۆلیسی گرتوە، ڕۆژنامەوان و میدیاکاردەگرێت و تۆمەتی جاسوسی و کونسڵکوژی دەداتە پاڵ، هەرزەکاری شازده و هەڤدە ساڵ دەکوژێ، موچەی پێشمەرگە ئەمەریکا دەیدات و ئه و دەستی بە سەردا دەگرێت، نەوت دەفرۆشێت و پارەکەی ونە، ململانێی حزبی هەرێمەکەی کەلەلاکردووە، کەچی داوای هەڵوێست لە سەرۆک کۆمار دەکرێت.
هەڵوێست پرسێکی ئاکاریە و پەیوەستە بە هەردوو لایەنی پەیوەندیدار یان زیاترەوە ناکرێت لایەک هەیبێت و لاکەی تر نەیبێت، هەرێم پێویستە بەر لەوەی داوای هەر هەنگاوێک لە سەرۆک کۆمار یان هەر کەسێکی تر بکات، بە خۆیدا بچێتەوه و لە هەنگاوەکانی خۆی بپرسێ.
[1]
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 829 keer bekeken
Schrijf uw commentaar over dit item!