سامی پێش پشکۆ مرد
#گۆران ڕەئوف#
0
مردوویەکتان بینیوە دوای مردنی پیاسە بکات و سیگار بکێشێت؟ مردوویەک پاش مردنی بیر لە مردنی کەسانی تر بکاتەوە؟ مردوو یەک غەم بۆ ئازاری لەدەستدانی دۆستانی مردووەکانی تر بخوات؟ دڵنیام کە نەتانبینیوە! بێگومانم قورسە زۆر قورسە، باوەڕ بە ئاشنابوونی وەها مردووەیەک بکەن! دژوارە مردوویەکی وەهاتان بێته پێشچاو، بەرکەوتنێکی سەیرە حیکایەتی مردوویەک بخوێننەوە کە خودی مردووەکە حیکایەتخوانە، یان جوانتر وایە بڵێم من لە ئێستادا ڕێک ئێستا ساڵێک بەسەر مردنمدا تێدەپەڕێت و ڕووداوەکانی مردنی خۆمتان بۆ دەگێڕێمەوە چۆن مردم؟ کەی بوو مردم؟ بەچی مردم؟ ئایا من بە شێوەیەکی ئاسایی مردووم و تەواو؟! یاخود کوژراوم؟ ئەی بەچی کوژراوم؟ لەهەمووی سەیرتر ئەوەیە پێتان دەڵێم کەی بوو کە هەستمکرد من ئیتر مردووم!
1
ساڵی پارتان لە بیردێت؟! ئەها شەوی تەقە زۆرەکان تەقەی خۆشیبوو، باش یادم نەماوە بۆ کامە خۆشی سەرکەوتنی ئەم نیشتمانە بریندارەبوو؟ پێش ئەوەی دەستبکرێت بە تەقەکان لەسەربان پیاسم دەکرد و سیگارم دەکێشا ماڵی ئێمە سێ نهۆمە، نهۆمی یەکەم من و دایکم و باوکمی لێیە، دووەم کرێچییەکەمانە، سێیەمیش دو ژورە زۆربەی کاتەکان من لەوێم، یەکێک لە ژورەکان شوێنی خەوەکەمی لێیە و ژوری دوەم وەک چێشتخانەیەک وەهایە، یانی تێکەڵەیەکە.. ئه و شەوە من لە سەربانی نهۆمی سێیەمدابووم.
کە دەستکرا بە تەقەکان من مردبووم! بەڵام بینیم کوڕە دراوسێکەمان مرد، بەم چاوانەی خۆم بینیم کە مرد! گوللەی وێڵ کوشتی، منیش هەمان شه و مردم بەڵام پێش ئەو، پێش ئەوەشی دەنگی تەقەکان بێت مردبووم و لەسەربانی نهۆمی سێیەمەوە سیگارم دەکێشا.
2
باپیرم بە شێرپەنجەی قوڕگ مرد، نەنکم لەم ساڵانەی دوایدا چەڵتەی دڵ کوشتی، کوڕە مامێکم لە ڕوداوی ماشیندا مێشکی پژا و مرد، کوڕە دراوسێکەشمان لەشەوی تەقە زۆرەکاندا مرد، شەوی خۆشییەکانی نیشتمان ئه و گیانی سپارد، هێشتا تەلەفۆنەکەی بە گوێیەوەبوو کە گوللەیەک مێشکی پژاند، هێشتا ڕاز و نیازی دەگۆڕییەوە، دڵی لە لێدان کەوت!
من! ئەی من چۆن مردم؟ کەسێک هەیە نەزانێت چۆن مردووە؟ کەسێکتان بینییوە مردنی خۆی لەیاد نەمابێت؟ مرۆڤ هەیە هەرگیز چرکەی مردنی لەبیرنەبێت؟
نا نا مرۆڤ نییە نەزانێت چۆن مردووە، کەسێک نییە چرکەساتی پێش مردن و مردنی خۆی لەیاد نەبێت، منیش مرۆڤێکم مردنێکی تایبەت بەخۆم هەیە، وەک تەواوی ئه و مرۆڤانەی مردوون، هەستێکی سەیرە مردبیت و باسی مردنی خۆت بکەیت، تەواو دۆخێکی تراژیدییە لەپاش مردن باس لە ساتی مردنەکەت بکەیت! یان بە قوڵی بیر لە مردنت بکەیتەوە و کەس ئاگای لێت نەبێت.
3
ئەهاااااای خەریک بوو شتێکی گرنگ لەیاد بکەم، شتێک کە زۆر مەبەستمە ئێوە بیزانن! ئەها ئه و کوڕە دراوسێیەمان کە وتم لەشەوی تەقە خۆشییەکاندا بە گوللەی وێڵ مرد، ئه و کوڕە ناوی (پشکۆ) بو، کوڕێکی شەرمن و بێدەنگ، زۆر نەبوو خوێندنی زانکۆی تەواوکردبوو، هەندێ شه و کە بەتەنیا بووم ئەویش پاش تەواوبوونی لە تەلەفۆنکردن دەهات بۆلام، دەچووینە سەربان ئه و هێشتا هەر نامەی دەگۆڕییەوە، باسی خۆی بۆدەکردم، بەنیازی چییە و لە چ دۆخێکی ژیاندایە، هەندێجار بە هەندێ پرسیار کەمن لێم دەکرد، ڕەنگی سورهەڵدەگڕا وەک پشکۆیەک دادەگیرسا، ئه و شەرمن بوو چاوەکانی قاوەیی بوون، زۆرجار هەستمدەکرد ڕەنگی چاوی دەگۆڕدرێت، چونکە لەبەر خۆردا زێدەتر لە زەرد و سەوزباوبوو، شتێکی سەیربوو کە ڕەنگی چاوەکانی دەگۆڕا، من پێمدەوت تۆ ڕەنگی چاوەکانت لە ڕۆژێکەوە بۆ ڕۆژێکی تر و لە شەوێکەوە بۆ شەوێکی تر دەگۆڕێت؟! پێدەکەنی و دەیوت خۆشم ئەوە دەزانم! بەڵام تەنیا کەسی کە ئەوەت لەمندا درککردوە! من زۆر بەی جار بە (پشی) بانگم دەکرد، بەشێک لە دۆستەکانی بەهەمان ناو بانگیان دەکرد کە من بەسەریدا بڕیبوم، هەتا دایکیشی، هەروەها خۆشەویستە گەرمیانییەکەشی هەر به و ناوەوە بانگی دەکرد، زۆربەی شەوان کە من لە سەربان بووم ئەوم دەبینی، بەردەوام بۆ تەلەفۆنکردن دەهاتە سەربان، منیش هەندێجار بە تەنیا سیگارم دەکێشا و پیاسەم دەکرد، هەندێجاریش لەگەڵ چەند هاوڕێیەکمدا دادەنیشتین و دۆمینەمان دەکرد، زۆری جار پشیم دەبینی لەسەربان تەلەفۆنەکەی بەگوێیەوە بوو، دەمزانی لەگەڵ ئه و کچە گەرمیانەدا قسەدەکات کە خۆشیدەوێت، ئه و کچەی بڕیاربوو لە بەهاری ئەمساڵدا هاوسەرگیری بکەن.. پشی زۆرکات بەدەم تەلەفۆنکردنەوە بە ئاماژەی دەست سڵاوی لێدەکردم و خەندە لەسەر لێوەکانی بوو، هەستمدەکرد لەکاتی سڵاوکردنیشدا شەرم دایدەگرت، من بیرم لە ڕەنگی چاوەکانی دەکردەوە، دەبێت لە چ ڕەنگێکدابێت!
پشکۆ بە گوللەی وێڵ مرد! لە تەقەی خۆشیدا، من دڵنیام ئه و کەسەی ئه و گوللەیەی تەقاندووە هیچ مەبەستی نەبوو پشکۆ بمرێت، هیچ نەیدەویست دڵی دایکی پشکۆ لەت لەت بکات، نەیدەویست خۆشەویستە گەرمیانەکەی ڕەنجبەبا بکات، بەڵام پشکۆ مرد، بەڵێ مرد بیر لە ئه و کچە گەرمیانە بکەنەوە کە چۆن پشکۆی لەدەستدا؟! بیر لەدایکی بکەنەوە چۆن پشی لەدەستدا؟ من تا پشکۆ نەمرد نەمزانی منیش مردووم، نەمزانیبوو کەمنیش ماوەیەک پێش ئه و مردم، پێمبڵێن مردن لای ئێوە چۆنە؟ ئەسڵەن مرد یانی چی؟
4
پێش ئەوەی بمرم، ئەوکاتەی هێشتا نەمردبووم.
لەخوارەوە لای دایک و باوکم دانیشتبووم، دوای نانخواردن، چام دەخواردەوە، کوپێک چام بەدەستەوەبوو، جارجار کەمێکم لێدەخواردەوە.
بەدەم چاخواردنەوە، کۆمپیوتەرەکەم پێکرد، ڕۆیشتمە ماڵە ئەلیکترۆنییەکەم، مەبەستم فەیسبوکە.
دو نامە و چەند چالاکییەکی فەیسبوک سورببوون، لەبیرم نییە چەند چالاکی بوو، بەڵام نامەکان دوانبوون.
نامەکانم کردەوە، یەکەمیان نامەی کوڕە پورێکم بوو، پرسیار دەربارەی تێکچونی ئەکاونتەکەی دەکات، کە گوایە لایک و کۆمێنتی بۆ ناکرێت.
ئاخر بەحیساب من کەمێک لە ئەلیکترۆنات شارەزام و هەرلەخۆوە وەها ناوم ڕۆیشتووە کە شتێکی لێدەزانم، هەستەکەم ئەوەش بۆ فزولیم دەگەڕێتەوە.
نامەی دووەم! ئاااای نامەی دووەم!
نامەی دووەم کوشتمی!
من بە نامەیەکی فەیسبووک مردم.
مردنێکی کۆمیدییە؟
پێتان سەیر نەبێت، هەر کە کردمەوە و خوێندمەوە مردم! یان باشترە بڵێم له و کاتەوە من مردووم، بەڵام کەمێک دواتر زانیم، پاش مردنی پشکۆ تێگەیشتم منیش مردووم!
5
مرۆڤ فزولە! ئێوەش مرۆڤن، دەتانەوێت بزانن ناوەڕۆکی نامەکە چی تێدابووە؟
یان بۆ دەبێت کەسێک بە نامەیەک بمرێت؟
گەر ناوەڕۆکی نامەکەتان بۆ باس نەکەم، ئێوە یەکسەر تۆمەتبارم دەکەن بەزۆر شت.
دەڵێن: ئەمە هەر چیرۆک نەبوو بۆ ئێمەت گێڕایەوە، بابە درۆی وەها گەورەش عەیبە، یان ئەوەتا دەڵێن: بێماناییە مرۆڤ هەبێت، بە نامەیەک بمرێت! زۆر شتی تر دەڵێن.. گەر هاتوو ئەم چیرۆکە لە فیستیڤاڵێکدا خەڵاتی یەکەم بەرێت، دواتر دەڵێن: جاتوخوا ئەوە چیرۆک بوو، کەسێک بەنامەیەک مرد؟! یەک دنیا جنێویش دەدەن بە لیژنەی فیستیڤاڵ!
خۆشم قەلەقم لە دەرخستنی ناوەڕۆکی نامەکە؟! ڕەنگە هی ئەوەبێت دوای مردنم باوەڕموایە نەدەبوو به و نامەیە بمردمایە! یاخود ئەوەتا بیر لەوەدەمەوە، ئه و سەگبابە بۆ فەیسبوکی دروستکرد تا کەسانێکی وەک منی پێ لەناوبەرێت! بۆچی من فەیسبووکم چێکرد؟ تا ببێتە هۆی ئه و بەدبەختییە گەورەیە بۆم؟ ئەم هۆیانە وادەکات دودڵبم لە باسکردنی ناوەڕکی نامەکە.
6
دڵی پشکۆ چەندان ڕاز و نیازی تێدامابوو کە وەستا، خەیاڵەکانی پشکۆ هێشتا وەک تەمێک نەڕاژابوون بەسەر ژیاندا، پشکۆ بە خەیاڵە نەڕژاوەکانییەوە مرد، بە نهێنییە تایبەت و نەزانراوەکانییەوە مرد.. حەزمدەکرد بڕۆمە گەرمییان تا ئه و کچە ببینمەوە کە دڵداری پشکۆ بوو، بزانم حاڵی چۆنە؟ یان لەدەسدانی پشکۆ چ مانایەکی تر دروست دەکات بۆ ژیانی؟ ڕاستیتان بووێت من کەمێک فزولم، یان باشترە بڵێم جارجار حەز بە فزولی دەکەم لە هەندێ ڕووداو و بابەتدا، بۆیە حەزمدەکرد ئه و کچە ببینم تا بزانم چرکەیەک بەر لە مردنی پشکۆ، چی پێگوتووە؟ باسی چی بۆ کردووە؟ حەزێکی ئاوا بۆمن زۆر شت دەگەیەنێت، چونکە منیش مردووم! ڕەنگە ئێوە حەزبکەن بزانن مردنی من چۆن بووە؟ یان چرکەیەک بەرلەوەی من بمرم چم گوتووە؟ بیرم لەچی کردۆتەوە؟ بەدەم کام خەیاڵەوە مردووم؟
ساڵی پار!
بەرلەوەی پشکۆ بمرێت.
من مردم!
هاتمە سەربان، سیگارم کێشا، پشکۆش مرد، گوللەیەک هات و مێشکی پژاند.
بیرم لە خۆشەویستەکەی پیشکۆ دەکردەوە، چەند سەختە پشی لەدەستدا!
بیرم لە دایکی دەکردەوە، چەند قورسە کوڕەکەی لە دەستدا!
7
بەڕێزم، کاک سامی تۆ دیارە تێناگەیت! من نەتۆم خۆشدەوێت، نە دەتوانم گوێبدەم به و قسە هەلەق و مەلەقانەت، نە هیچ. بڕۆ وازبێنە، یەک تۆز واقیعی بە و خۆت ببینە، بزانە تۆ کێیت و من کێم؟! بڕۆ شوێن ئه و خەونە سەیرانەت بکەوە کە من پێکەنینم دێت پێیان! ههههها، من دیسانەوە پێت دەڵێم نەک هەر تۆم خۆشناوێت، بەڵکو وەک شێتێک تەنیا دەتوانم لەوەختی خوێندنەوەی نامە دورودرێژەکانتدا پێبکەنم، هەندێجاریش توڕەم دەکەن. بەڵام لاموایە تۆ شیاوی ئەوەش نیت توڕەیی خۆمت بۆ بەیانکەم، بالەمە زیاتر بێڕێزیت پێنەکەم، من کچێکم خەونی خۆمم هەیە و حەزم لە هەر کوڕێک بێت خۆم هەڵیدەبژێم، نەوەک وەک تۆ، بێت و هەڵمبژێرێت! ئێستا ئیتر باسی عەشق و خۆشەویستی ئه و شتانەم بۆ مەکە! تێگەیشتییییییییی؟! ئەوە بلۆکیشت دەکەم.
ساڵی پار!
پێش مردنی پشکۆ..
من بەدەم چاخواردنەوە، بەرانبەر کۆمپیوتەرەکەم، لەنێو ماڵە ئەلیکترۆنییەکەمدا و به و نامەیەی سەرەوە مردم! باشترە بڵێم کوژرام!
8
پشکۆش دوای من مرد، مردنی پشکۆ بووە هۆی ئازاری لەدەستدان بۆ خۆشەویستەکەی! بووە هۆی وردوخاشبوونی دایکی، ڕەنگە ئه و چرکەیەش جۆرێک بێت لە مردن بۆ کچە گەرمانییەکە، وەک مردنی من! یان مردنی بەشێک لە ڕۆحی ئه و کچە بێت.. گرنگ ئەوەیە ئه و کچەش مرد بە گوللەیەک کە بەری نەکەوتووە! منیش مردووم بە نامەیەک! ئەوانەی کە پشکۆیان دەناسی زانیان کە پشکۆ کردووە و بەچی مردووە، بەڵام ئەی من؟! کەس نازانێت منیش مردووم مردووم مردوووو.[1]