Ji destpêka Şoreşa 19'ê Tîrmehê ve, êrişên dewleta Tirk a dagirker ên li ser jinên pêşeng û fermandar ên ku li şûna cîhanê şerê çeteyan kirine û ew têk birine, nesekinîne. Dewleta Tirk a dagirker ji hêza jinan ditirse ku gelek serkeftî bi dest xistine û di domandina xeta têkoşînê de bi israr in.
Dewleta Tirk a dagirker a ku li ser zihniyetek faşîst, desthilatdar û înkarkirina aliyên din hatiye avakirin, hemû kesên ku li dijî nêrînên wê derdikeve, dike hedef.
Dewleta Tirk a dagirker û çeteyên wê di êrişên xwe yên li ser Bakur û Rojhilatê Sûriyê de di radeya yekemîn de jinên ku şerê çeteyên DAIŞ û dagirkeriyê kirine û di hemû qadên şoreşê de serkeftin bi dest xistine, dike hedef. Armanca dewleta dagirker ji van êrişan ew e ku serkeftiyên jinan têk bibe. Ev hemû jî di nava bêdengiya navneteweyî de tê kirin.
Dewleta Tirk a ku destekê dide DAIŞ'ê bi rêbazê şerê taybet û êrişên dagirkirinê li ser serdestiya xaka Sûriyê qanûnên navneteweyî bin pê dike.
Di vê raporê de em ê êrişên dewleta Tirk a dagirker ên li ser jinên pêşeng ên Şoreşa Rojava û Bakur û Rojhilatê Sûriyê bi bîr bixin.
19'ê Tebaxê salvegera yekemîn a şehadeta yek ji fermandarên YPJ'ê û Meclisa Leşkerî ya Til Temirê Sosin Bîrhat e. Sosin Bîrhat tevî 4 hevalên xwe, di êrişa dewleta Tirk a dagirker a bi rêya balafireke bê mirov a bi çek a li ser avahiya Meclisa Leşkerî ya Til Temirê de şehîd bû.
Sosin Mihemed (Sosin Bîrhat) 1'ê Çileya 1976'an li gundê Omara yê navçeya Şera ya kantona Efrînê ji dayik bû. Malbatekê Sosin ji dê, bavê 6 keçak pêk tê û ew ya 4 di malbatê de ye.
Sosin Bîrhat di nava malbateke welatparêz de mezin dibe ku di sala 1987'an de felsefeya rêber Abdullah Ocalan nas dike. Du xwişkên wê cihê xwe di Koma Agirî ya govendê de girtin.
Sosin Bîrhat di sala 1995'an de tev li Tevgera Rizgariya Kurdistanê dibe û 15 salan di nava refên gerîla de perwerdeyan dibîne. Bi destpêka Şoreşa 19'ê Tîrmehê re, Sosin vedigere taxa Şêxmeqsûd û beşdarî berxwedana şêniyên taxê ya li hemberî êrişên çeteyên dewleta Tirk a dagirker dibe û li gorî rêgezên şerê gel ê şoreşgerî destek da gel û yekîneyên parasatin.
Fermandar Sosin Bîrhat cihê xwe di berxwedana li taxê ya di navbera 2014 û 2016'an de digire û jî şervanan re çavkaniya îlham û moralê bû. Her wiha ji bo parastina taxê kedeke mezin da û mohra xwe li berxwedana taxa Şêxmeqûsdê da.
Her wiha fermandar Sosin Bîrhat di pêngavên rizgarkirina herêmên Bakur û Rojhilatê Sûriyê de cih girt. Heta kêliya dawî ya şehadeta xwe wekî endama Meclisa Leşkerî ya YPJ û Meclisa Leşkerî ya QSD'ê xebitî.
Di êrişên dagirkeriyê yên li ser Efrînê de ku di 20'ê Çileya 2018'an de dest pê kirin 56 jin şehîd bûn û 104 birîndar bûn.
JI BARÎN KOBANÊ HETA DILSOZ TIRBESPIYÊ
1'ê Sibata heman salê, dewleta Tirk a dagirker û çeteyên wê li navçeya Bilbilê ya Efrînê sûcekî hovane li dijî şervana YPJ'ê şehîd Barîn Kobanê pêk anî, cenazeyê şehîd Barîn Kobanê ket destê wan.
Di êrişên çeteyên Cebhet El Nusra yên 28 û 29'ê Gulana 2013'an ên li ser gundên Şêrawayê de şervana YPJ'ê Bêrîvan Nûcan û Silava şehîd bûn û bûn şehîdên yekemîn ên YPJ'ê.
12'ê Cotmeha 2019'an an ku bi destpêka êrişên artêşa Tirk a dagirker û çeteyên wê yên li ser Serêkaniyê û Girê Spî re, Sekretêra Giştî ya Partiya Sûriya Pêşerojê Hevrîn Xelef li ser rêya M4 ji aliyê çeteyên Enqereyê ve hate qetilkirin û bi cenazeyê wê hat lîstin.
13'ê Cotmeha heman salê, dema ku karwanê şêniyên herêma Cizîrê ji bo piştgiriyê diçûn Serêkaniyê, balafireke şer a dewleta Tirk a dagirker lê da, di encamê de bi dehan welatî, di nav de rojnamevan û yadê Eqîde Elî Osman (53) şehîd bûn.
22'yê Çileya 2021'an çeteyên DAIŞ'ê hevseroka Meclisa bajarokê Til Şayîr a Hesekê Seida El Hermas û Hind El Xidir qetil kirin. Ji bo tolhildana her du şehîdan, QSD`ê operasyonek li dijî şaneyên çeteyên DAIŞ'ê pêk anîn û qatilên her du jinan girtin.
SÛCÊN BI BALAFIRÊN BÊ MIROV DEWAM KIR
Dewleta Tirk a dagirker rêbazên êrişên xwe da guhertin û balafirên bê mirov ên bi çek xistin dorê.
Di 23'yê Hezîrana 2020'î de balafirke dewleta Tirk a bê mirov a bi çek li gundê Helincê yê bakurê rojhilatê Kobanê mala dayika bi navê Emîne Weysî kir hedef. Di encamê de Emîne Weysî û endamên Kongra Star Hebûn Mele Xelîl û Zehra Berkel ku di male de bûn, şehîd bûn.
Di 25'ê Hezîrana 2021'an de dewleta Tirk a dagirker bi balafireke bê mirov a bi çek careke din li bajarê Kobanê li malekê da. Di encamê de 6 endamên Tevgera Ciwanên Şoreşger a Sûriyê û Yekitiya Jinên Ciwan şehîd bûn.
Her çiqasî ku jin li Bakur û Rojhilatê Sûriyê destkeftiyên nû pêk anîn, êrişên li dijî wan zêde bûn.
30'yê Gulana 2020'î dewleta Tirk a dagirker erebeyek li ser rêya Qamişlo kir hedef, di encamê de şervana YPJ'ê Mizgîn Botan şehîd bû.
2'ê Tîrmeha 2022'an de li gundê Til Semin ê Reqayê li erebeyekê xist, di encamê de fermandara YPJ'ê Mizgîn Kobanê şehîd bû.
20’ê Nîsana 2022’an, şervanên YPJ’ê Cîhan Elî, Ronahî Kobanê û Dilar Heleb di encama êrişa balafirên bê mirov ên dewleta Tirk de li Kobanê şehîd bûn.
22'ê Tîrmehê 2022'yan, balafireke bê mirov a bi çek a dewleta Tirk a dagirker rêya Qamişlo-Tirbespiyê kir hedef, di encamê de fermandar YAT û QSD'ê Jiyan Tolhildan, fermandara YPJ'ê Roj Xabûr û şervana YAT'ê Barîn Botan şehîd bûn.
28'ê Tîrmehê jî dewleta Tirk a dagirker li balafireke bê mirov a bi çek erebeya Hêzên Ewlekariya Hundirîn li Eyn Îsayê bombebaran kir. 4 endamên Hêzên Ewlekariya Hundirîn Cîhan Mihemed, Sara Mihemed El-Hisên, Selma Elî Mistefa, Beşar Mihemed Elî Bozan şehîd bûn.
9'ê Tebaxa 2022'an dewleta Tirk nuqteya Hêzên Erka Xweparastinê a ku parastina nexweşxaneyên Qamişlo dikir, bombebaran kir û di encamê de 4 şervan di nav de Dilsoz Tirbespiyê şehîd bûn.
Hêjaye bi bîrxistinê ye ku QSD'ê 31'ê Tîrmehê di Operasyonê Sondê de şaneya sîxuran a ku bûn sedema şehadeta fermandar Rênas Roj û Sosin Bîrhat û hevalên wan girt.
[1]