داستانۊ شېخی سەنعانی
بەشۊ ویس و دوەمۍ
شۊنەو تەرسای گاۋرېرە کەشیشەکۍ دینو مەسیحی گردشان ئیمانشان ئاوەرد بە دینو پېخامئاوەرو ئیسلامی (ص) . تەمامو قۆمو خوېش، ناحیەو شار موسڵمانۍ بیۍ، بت و بتخانەشان وېران کەرد. دەسشان کەرد بە ئاهەنگ گېڵنای. جە دین لاداکەو شېخی سەنعانی بەرهەمێ خاسش بۍ، سەرەڕاو ئانەی شېخی سەنعان گوزەرێش بە دنیاو عەشقی مەجازیرە کەرد، لەزەتش بەرد، گېڵاوە پەی دنیاو عیرفانی و پاکی و نەزاکەتی، ئیتر چاگۆ هەنگامەی کەردەییەش نېیا سەرو ڕاو عەشقی هەقیقیۆ.
کەشیشان دەرلاد، حازر بین جە لاش
هەر یەک جە لایێ مەکەردەن سەناش
بەردشان، وە شار قەسری زەڕنگار
بت و بتخانان، کەردەن یەختەسار
دولبەر، چەنی قەوم، خوېش و تەبارش
عېل و ئەحشامات، ناحیەی شارش
یەکتای بۍ هامتا، کەردشان قبووڵ
ئیمان، ئاوەردەن بە دینی ڕەسووڵ
ئیمان ئاوەردەن، بەو خوڎای بېباک
ئیجاد کونەندە، نە چەرخی ئەفلاک
هەققا، کە مەعبوود هەم بېباکەنی
ئیجاد کونەندە، نە ئەفلاکەنی
بە ئایین و دین، شەرعی پېخامبەر
بەستشان نکاح، ماهی موڼەوەر
نازک مەهوەشان بۍ پەروا جە خەم
دەستەی چۊپیشان، دا بە دەستی هەم
مەگېڵان هەر یەک، چوون ئاهووی تەتار
مەنمانان وەتەرح، گوڵخونچەی بەهار
سێ شەبان و ڕۊ، شادیی، بیی وە پا
یە گشت جە ئەڵتان، ئاشقانی ئەڵڵا
سەنعانشان بەرد، وە قەسری دولبەر
هۊرېزا وە پا، چوون شەمسی خاوەر
داخڵ بی، وە بورج، ماهو موشتەری
لوا، وە بابۊس، هومەیلای پەریی
سڵام کەرد وەنەش، نیشتەن وە زەمین
کەردەن شوکرانەی، ڕەببولعالەمین.[1]